AZIKA YU 29 - AMÜSA BAIBEL (BSI)

Moab la Azengtacho

¹ Abüdongba-nü Mosa te Moab lih la Israelrü te azengtacho hiri külüpnung yocho; hiri apüm hi Abüdongba-nü arüh te Sinai zong la külüpbala alahkeh licho.

² Mosa-nü Israelrü atümung shibülungsohpü arüh te yocho, “Abüdongba-nü Ijip yangthsaba, thsazirüti ko yucho apüm chah tu nguchicho nührübürünü nguko.

³ Adrünung rümra, thsayahiya ko anyemüyangnung Abüdongba-nü nguchicho nührünü nguko.

⁴ Ta chünye yingcheh nührü chah tu tikehcho hütsü münyicheh.

⁵ Kang yüre Abüdongba-nü akungaselih la nührü norore ko nührü jengki ko jingkhüm müthrehsoh.

⁶ Nührü atsunung hümdhse ko ayongnung yongkha mahkhang phüpkih mülicho, ta Abi tsü nührü Tsingrangepü nührü khyang müdhesohnung Abinü hütsüri chixicho.

⁷ Ko Ihsa hiba müdüm chii rode, Heshbon yangthsaba Sihon ko Bashan yangthsaba Og nyühnü Ihsa nyüm khatanung rocho. Ta Ihsanü arüh kohchehcho,

⁸ arüh lih khyüjücho ko hütsü Reuben hung, Gad hung ko Manase hung achangsho khyang changnah jücho.

⁹ Hütsüeko, nührü nguchi lüpchola akoh ngunung nengdang, azengtacho yu hiri apüm yuje cho bichieng.

¹⁰ “Chünye Abüdongba jingte nührü langnürü, thsazirüti, dhrezarü

¹¹ ko lazarü, azarü ko nührü yola liba shuparü nührü khyang singyukikha jürü atümung yale.

¹² Chünye nührü hila Abüdongba nührü Tsingrang-nü nührü te külüpba azengtachola khyüchonung yale.

¹³ Hütsünü ade nührü jümürü Abraham, Isak ko Jakob te nyengchocho kyo, nührü Abi müyurü ko Abi nührü Tsingrang thsanung Abüdongba-nü khyüchoungtü.

¹⁴ Abüdongba-nü azengtacho külüpba hi nührü te du mah.

¹⁵ Ta chünye Abüdongba jingte yarü Ihsa atümung te ko ade mükhohla lirü Ihsa trah nengdangsü lile.

¹⁶ “Ijip la akang tsü tu kyocho ko aparü yucho lahkhu shitsehnung tsü tu kyo licho nührünü lümchehng.

¹⁷ Arühnü sing, lung, hon ko taripinü kyothri külüp licho tsü nührünü nguko.

¹⁸ Chünye hila yarü adhrerü, khingkurü, kukhi mahkhang yucho, sünüsü Abüdongba Ihsa Tsingrang pehpü apa tsingrang mübünung ximüla mütsinung müdheing. Hütsü singra khüdu akha ko müyüh kang zicho kyonung.

¹⁹ Chünye hila yarü sünüsü yuchüm hi yuchipü, apu lümcho du nguchinye tu müthsanungepü tülüm. Hütsünü nührü atsa amütsa atümung changjünung.

²⁰ Abüdongba-nü hütsütari nyitsarü khyang mülang müpehjünung. Hütsü mahpü, Abüdongba rihlong apüm abi chah trunung ko abi riri müchangjüde, hiba vakhala thrah liba achangba apüm abi chah küdunung.

²¹ Abüdongba-nü abi Israelrü atümung bete adüzü kangsohnung ko Abüdongba adoba azengtaba vakhala thrah liba chokehchola apüm achangba abi chah küdunung.

²² “Aronung shangla nührü shümtsurü ko apalang liba shuparünü nührü lih la Abüdongba-nü achangba ko chongcha hirocho ngunung.

²³ Alih tsü akungse kangnung, mihtru ko mihnü bhümtipü tusü müchisichehnung ko hütsüla za mii müchinung. Nührü lih tsü Abüdongba-nü Abi rihlong chüro changjüba Adma ko Zeboim yo Sodom ko Gomora yangdi kyo linung.

²⁴ Hütsüde lihküpnü, ‘Tuepü Abüdongba-nü arüh lih la hita nguchicho, pü tsingdhingnung. Tu chahnü Abi rihlong chürocho?’

²⁵ Ko alalingba tsü, hütsü arüh Ijip lanü nochürode, ‘Abüdongba-nü arüh jümürü te külüpba azengtacho müyurünü thsangnyangcho ngang lile.

²⁶ Arühnü khodesü akhulang mümübücho, Abüdongba-nü arüh te yaticho tsingrang arühnü dikehcho nengdangnü lile.

²⁷ Hütsünü müyurü te Abüdongba zichüro hiba vakhala thrah licho achangba apüm hirojücho.

²⁸ Abüdongba rihlong chürocho ko Abi rihlongla Abinü arüh lih lanü arüh rohcheh shuparü lih la pehcho ko arüh chünye hütsüla lile.’

²⁹ “Abüdongba Ihsa Tsingrang-nü rang yohpücho khürü lile; ta Abinü Abi Yuzeng mishako ko hütsü Ihsa ko Ihsa shümtsurünü achangka müli bichinung.