AZIKA YU 25 - AMÜSA BAIBEL (BSI)

¹ “Adüzünü Israelrü nyüh anyüh khiyu khüdu nengdang yukhajilang wüko ko khüdu langjüko ko khüdu mülangjüko.

² Mülangba tsü xüpnahnung yukhajükhang, yukhaba tsünü abi tsü mühüplangnü yüpjosohpü xüpnungbae. Khüdopi xüpnungnang hütsülü abi mülang aichi lile.

³ Yürepi chah alaa müxüpnung; hütsü chah alaalü misha abi mükhimüngure.

⁴ “Ma nyehde misüpung be türahjü.

Asüba Amung te Anguchinung

⁵ “Jüni nyüh aroh lipü tsuzarü müthsapü khüdu sopehkhang, anitpü tsü aparü khyang mükhyüsohnung; hütsü asuu ani tsünü khyünung.

⁶ Ko anyüh chahnü aukhuba tsü asuu tsurü roh-i khichinung, hütsünü du Israel la arüh tsutpu chung tsü müchangnung.

⁷ Ta asuu ani tsünü abükyü tsü mükhyünyükhang, abükyünü wünü yangzirü bete yonung, ‘I nii nirünü abi anguchi münguchire; abinü Israelrü yola amung trah müyohpüjünyüre.’

⁸ Hütsüde yangzirü tsünü abi dsi abi te chotanung. Abinü hütsüpü mii abükyü tsü mükhyünyükhang,

⁹ chomitpü tsünü yangzirü bete tsü abi yang küdunung ko ajingkhüm khüdu khyücheh aromih chah müjü müchohkehjo yonung, ‘Sünü amung khyang atrah müyohpüjünyünang abi chah hita tikehre.’

¹⁰ Abi kukhi tsü Israel la ‘jingkhüm phungchehba nyitsarü kukhi pü dsinung.’

Yuzeng Apa

¹¹ “Nyüh anyüh yübütade khüdu nitpünü anii tronung akhüuba nyitsarü ayola chayehkhang,

¹² abükyü te yanglilüm tüngusoh; abükyü kheh kyüsahpehjüng.

^13-14 “Nührünü ahosing ko akihsingla türahmütsa.

¹⁵ Abüdongba nührü Tsingrang-nü nührü khyang jüba lih la tsü kutsüp linungthsa nührünü ahosing ko akihsingla yuje cho bichieng.

¹⁶ Abüdongba-nü kihyochürü thrünyire.

Amalek-rü Kyüsehnung Yuzeng

¹⁷ “Nührü Ijip lanü chürode Amalek-rünü nührü chah tu nguchicho hütsü lümchehng.

¹⁸ Arüh Tsingrangba drüba mühle, hütsünü nührü kyahseh ko südo lide, arühnü akhanglangnü nührü mahcho ko akarü apüm kyüsehcho.

¹⁹ Hütsüeko khode Abüdongba nührü Tsingrang-nü alih tsü jünang ko nührü mükang liba arorüh tenü nührü khümcho linang, hütsüde Amalek-rü tsü apüm kyüseh pehng, hütsünü du sünüsü arüh mülümkehnung. Hi tünbüchü!