AZIKA YU 23 - AMÜSA BAIBEL (BSI)

Abüdongba Müyurü Yolanü Pehcho

¹ “Axangmicho mahkhang abi yo tsehpehcho adhrerü süsü Abüdongba müyurü yola mükhiyohnung.

² “Matsu mahkhang hütsütari chahnü trahchocho süsü, shang dhüre chii Abüdongba müyurü yola mükhiyohnung.

³ “Amon-rü mahkhang Moab-rü mahkhang arüh chahnü trahchocho süsü shang dhüre chii Abüdongba müyurü yola mükhiyohnung.

⁴ Nührü Ijip lanü rode arühnü nührü khyang tsuyongnung jünung mii yaticho ko nührü chokehcholasohnung arühnü Mesopotamia la Pethor lanü Beor tsurü Balaam mülih norocho.

⁵ Ta Abüdongba nührü Tsingrang-nü Balaam te mühnyicho; hütsü mahpü abinü chokehchola tsünü amüwa kangsohcho, tunüo abinü nührü müicho.

⁶ Nührü yucho khüdu litashi hiri yuchoti türüku mahkhang pungrohiro tüthsasoh.

⁷ “Edomrü tümüchümükeh; arüh tsü nührü tsutpurü lile. Ko Ijiprü tümüchümükeh; khüdupi nührü arüh lih la licho.

⁸ Shang asang khanglang arüh chahnü trahchochoti Abüdongba müyurü yola khiyohnung kohle.

Rothsarü Müdongchah Müsa Yohpücho

⁹ “Khata shikhe khode nüh amüdongchah linang, ayahnü nüh mümüsa kangnung apüm lanü müri lieng.

¹⁰ Nyüh khüdu melangnü kyangnü mümüsa kangkhang, abinü amüdongchahnü chüdu dongkhu libae.

¹¹ Nyüzeh rode abinü mütsahnung, ko nyü züdupü abinü thali ronung.

¹² “Nührü müchoh-müyahnyüde wünung dongkhu müdüm khüdu rungnüm libae.

¹³ Nührü thsunohrü yola ja khüdu yohpüng ko khode nührü müchoh-müyahnung wünang, hütsünü jupü pehyahng ko wohtipehng.

¹⁴ Nührü müdongchah tsü müsa yohpüng, tunüo nührü tsungtinung ko nührü khyang akoh jünung, Abüdongba nührü Tsingrang nührü müdongchah nührü yola lile. Abüdongba hütsü khu ximüla tsinungthsa amümüsa tu tünguchi.

Yuzeng Alang Papa

¹⁵ “Ayurü khüdu abi abüdongrü tenü rang tside kumünyinung nüh yang rokhang, abi thali tümütheh.

¹⁶ Abinü linyücho nührü yangdi masü khüdula linung ko nührünü abi mütsa tübichi.

¹⁷ “Israelrü adhrerünye khingkurünye, süsü amübükuh la shutsa-irü mükangnung.

¹⁸ Abüdongba nührü Tsingrang kuhyang yuchüm mübü nengdang, khingkurünye adhrerünye shutsa-icho lanü shehcho amii mühironung. Tunüo Abüdongba nührü Tsingrang-nü anyüding thrünyire.

¹⁹ “Nührü ajünirü Israelrü khyang thsinye, fürünye mahkhang tutunye nyasohde ajehyoh tükhyü.

²⁰ Shuparü chahnü ajehyoh khyünung kohle, ta ajünirü Israel chahnü khyünung mükoh. Yuzeng hi bichieng ko Abüdongba nührü Tsingrang-nü nührünü khyünung liba lih la tsü nührünü nguchicho lüpchola müwajünung.

²¹ “Khode nührünü Abüdongba nührü Tsingrang te yuchüm külüpnang, nühnü nyengchocho tsü münguchipü tüpehjü; Abüdongba-nü yuchüm tsü nü bha kangsohnung ko hütsü münguchiba tsü amünyi.

²² Abüdongba te yu müchümba tsü amünyi mah,

²³ ta nühnü lümkhung lümpü külüpkhang, hütsü nguching.

²⁴ “Khode nührünü bürü shükusiluh lahkhu tsinang, nührünü tsuxah tsunung kohle, ta bha la layoh mühitsinung.

²⁵ Bürü luh lahkhu tside, nührünü khehnü müyeh tsunung kohle, ta yavinü fürü khüdusü xasahnung mükoh.