AZIKA YU 22 - AMÜSA BAIBEL (BSI)

¹ “Nührünü ajünirü Israelrü yo misü mahkhang san lang thrümeh rachi ngukhang, tüpehjü, nowüjüng.

² Ta abüdongrü tsü ashula likhang mahkhang abüdongrü mümüdhekhang, nührü kulang nowüng. Abüdongrünü yangchi rode, jüng.

³ Hütsü kyo gadu ngude, shüthreh khüdu ngude mahkhang ajünirü Israelrü yo achahcho lango dusü ngukhang, hütsüta nguching.

⁴ “Ajünirü Israelrü yo gadu mahkhang misü yongroh la dhrümyoh ngukhang, hütsü tüpehjü; hütsü khamüsu yasohng.

⁵ “Khingkurünü adhrerü jengki tükhyü, ko adhrerünü khingkurü jengki tükhyü; Abüdongba nührü Tsingrang-nü hütsütari nguchirü thrünyire.

⁶ “Singdong chah mahkhang alih la uza süp khüdu akyü chahnye aza yolanye atpa püm ngukhang, atpa tsü tükhyü.

⁷ Aza tsü khyünung kohle, ta atpa tsü tsisohng, khang nüh kutsüp ko bholo linung.

⁸ “Kuh asi thsade, kumung mükangmüla akhau yohnung müdheing. Hütsükhang, khürü jüpheh longcho müpsehnye nü bha müthsanung.

⁹ “Shükusih luh la apa tsahma tu tüchisi; mahkhang, shüsinye mahkhang apa tsahmanye tsunung mümülare.

¹⁰ “Luh xünung misüpung ko gadu nyüh tüxohrita.

¹¹ “Shunbüh ko anana she nyüh kyahrütacho shü tümüpi.

¹² “Nü shü jongnah müyüdinglang shüyo müthsükehng.

Mükhongcho nengdang Yuzeng

¹³ “Adüzünü adhrerü khüdunü khingkurü khüdu khyüpü akhanglang mükhyünyo kangko.

¹⁴ Hütsünü abinü arahkheh yuzinü abükyü nyüm anyüh kukangde abükyü tsü amüdhsengcheh müthsachoepü mülangjünung.

¹⁵ “Hita tikehkhang, abükyü tsü amüdhsengcheh-epü yuzithsanung kukang romang khyangba ashüh kehba shü tsü abükyü tpurünü hiwü yukhachah yangdila langnürü te ngusohnung.

¹⁶ Khingkutpü au tsünü arüh te yonung, ‘Ihnü I tsulatpü hiba nyitsarü te kuh kangsohcho ko ade abinü abükyü mükhyünyüre.

¹⁷ Abinü abükyü khyüde abükyü tsü amüdhsengcheh müthsachoepü arahkheh yuzi külüp mülangjüre. Ta I tsulatpü tsü amüdhsengcheh thsacho yuzi hila lile; kuh kangba shü khyangsing chah ashüh hi ro dhing!’

¹⁸ Hütsüde yangdila anüchirütinü adhreba tsü nowü lahnung.

¹⁹ Arühnü abi te taripi thsih khüdu akhang khyünung ko hütsü khingkutpü au khyang jünung, tunüo adhreba tsünü Israel-larü khüdu michah ashah hirojüko. Hütsü du mah, ta abükyü tsü mütozah apu nitpü thsanung, ko abi akang lidelü abükyü khodesü tsisohnung mükoh.

²⁰ “Ta mülangjüba tsü yuje thsakhang ko abükyü tsü amüdhsengcheh thsacho yuzi mülikhang,

²¹ arühnü abükyü tsü aurü kuh trahtri yang nowünung ko hütsüla yangdi nyitsarütinü abükyü tsü lungnü kengseh süsohnung. Abükyünü aurü jingte lidenü, kuh mükangepü adhrerü te mükhongnü müyurü khyang ashah hirojüko. Hütsüta nguchi hiba amünyi tsü pehnung.

²² “Adhrerü khüdu bürü nitpürü te mükhong ya rangkhang, anyüding süsohnung. Hütsüta nguchi hiba amünyi tsü pehnung.

²³ “Adüzünü adhrerü khüdunü aparünü idhsemüseh yohpücho khingkurü khüdu te yangdila tsü thsangnyangta rangchehkhang,

²⁴ anyüh tsü yangdi lanü nücheh nowü kengseh süsohnung. Khingkutpüsü süsohnung, tunüo bürünü yuchinung kohba yangdila thsanye abükyünü müzüde. Adhreba tsü süsohnung, tunüo idhsemüseh licho khingkurü khüdu te khingnü thsangnyangko. Hütsüta nguchi hiba amünyi tsü pehnung.

²⁵ “Adüzünü adhrerü khüdunü aparünü idhsemüseh licho khingkurü khüdu rangmü la khing thsangnyangko. Hütsükhang, adhreba du süsohnung;

²⁶ khingkutpü chah tu münguchinung, tunüo sünung aleng amünyi müshitpah. Hiba hi nyüh khüdunü aparü khüdu beti müpsehcho kyo lile.

²⁷ Adhreba tsünü idhsemüseh liba khingkutpü tsü rangmü lanü khing thsangnyangcho ko abükyünü züdenye, hütsüla atrorü sü mühle.

²⁸ “Adüzünü adhrerü khüdunü mümüxingcho khingkurü khüdu te khing thsangnyangta ya rangko.

²⁹ Khang, abinü khingkutpü au khyang abükyü mii taripi dhünyang jünung ko abükyü tsü abi nitpü kangnung, tunüo abinü khing abükyü te thsangnyangko. Abi akang lidelü abinü khodesü abükyü tsisohnung mükoh.

³⁰ “Adhrerü sünüsü au nitpürü masüte thsangnyang au ashah khyüsohnung mükoh.