AZIKA YU 21 - AMÜSA BAIBEL (BSI)

Akyühsehcho Mürangchehcho

¹ “Adüzünü, Abüdongba nührü Tsingrang-nü jünung lih la nyüh khüdu luh khüdula so jo nguko ko sünü müpsehchonang nührünü mütsüp.

² Nührü langnürü ko yukharünü wü me jochola tsünü amünyeh-u yangdi kahla adukah tsü kii dhing.

³ Hütsüpü me jocho lanü amünyeh-u yangdi lanü khodesü münguchidhingsohcho misü aza khüdu throcheh hirung.

⁴ Arühnü hütsü münyehthsa yongkhi shündhün ko khodesü xünah fürü mükhyümdhingcho müdüm khüdu yang nojowüng, ko hütsüla arühnü ahong xisahjünung.

⁵ Hütsülasü Levirü bebürü wünung, tunüo shühkhatohcho khiyu atümung arühnü khanung. Abüdongba nührü Tsingrang-nü abi dikehnung ko abi nengla müwajünung arüh throchehko.

⁶ Hütsüpü me joba tenü amünyeh-uba yang la langnürüti atümungnü misü michah tsü arüh kheh mütsapehnung

⁷ ko yonung, ‘Ihrünü nyitsarü tsü mükyühseh ko sününang mümüdhe.

⁸ Abüdongba, Nühnü Ijip lanü nüchehba Nü nyitsarü Israelrü khyang mülang pehjüng. Ihrü khyang mülang pehjüng ko achomükeh nyitsarü müpsehcho ihrü tümütang.’

⁹ Ko hütsüta, Abüdongba-nü yocho nguchinü, amüpsehcho tsü nührü bha müthsanung.

Khatala Rangyohcho Khingkurü Nengdang

¹⁰ “Khode Abüdongba nührü Tsingrang-nü nührü khyang khatala akoh jonang ko nührünü arangyohrü khürü khyonang,

¹¹ arüh yola atsah atsa lazarü ngu khyünyükhang,

¹² abükyü tsü nührü kulang nowüng ko abükyü kuva hehpehsohng, müzi müjüpsohng,

¹³ ko ajengki mülihjüng. Abükyünü arüh tpurü nengdang nührü kuh la choo khüdu meshüsohng; hütsüpü khanglang, nühnü abükyü khyünung kohle.

¹⁴ Akhanglang, nühnü mükhyünyükhang, abükyü lehcheh tsisohng. Nühnü khingnü abükyü te thsangnyangrü tsü, nühnü abükyü ayurü kyo bichi ko inung mükoh.

Aukhuba Thsiking Nengdang

¹⁵ “Adüzünü, nyüh khüdunü anitpü anyüh khyüko ko anyüdingnü adhrerü nümüsujüko, ta aukhuba tsü abinü mürulatpü tsurü tsü mah.

¹⁶ Khode nyitsarüba tsünü atsurü anyüh kahla kuthsi changjünung dhrongchehnang, abinü mürulatpü tsurü khyang tsü aukhuba nohlüm tsü jünung mükoh.

¹⁷ Abinü mürulatpü tsurü mahnye, aukhuba khyang tsü nohlüm anyüh jüng. Nyitsarünü aukhuba müdhebae ko abi ngunung athsalang nohlüm tsü jüng.

Yocho Mühnyiba Tsurü Nengdang

¹⁸ “Adüzünü, nyüh khüdu tsurü hongzi ko yocho mühnyi azarü khüdu lile ko tpurünü khingchinye arüh yocho mühnyi.

¹⁹ Khang, abi tpurünü arüh yangdila langnürü yang nowü yukhasohnung yasohng.

²⁰ Tburünü arüh te yonung, ‘Ihrü tsurü hi hongzi ihrü nyümre ko ihrü yocho mühnyire; abinü kuthsi müzangre ko müchamülohre.’

²¹ Hütsüpü yangdi nyitsarü tsünü lungnü abi kengseh süsohnung, ko hütsüta hiba amünyi hi phungpehnung. Israel la atümungnü hütsü yuchinung ko drünung.

Yuzeng Papa

²² “Nyüh khüdu abi nguchi amütsa nengdang süsohkhang ko abi fü tsü dongdi khüdu chah tbengkhang,

²³ hütsüla müyüp müyohpünung. Hütsü nyümongnü dhrürangnung, tunüo dongdi chah me tbengpüba tsünü alih chah Tsingrangba chokehchola hirore. Abüdongba Tsingrang-nü nührü khyang jüba lih tsü mümünyinungthsa, me tsü dhrürangpehng.