AZIKA YU 19 - AMÜSA BAIBEL (BSI)

Atsikeh Yangdi

¹ “Abüdongba nührü Tsingrang-nü nührü khyang jüba alih abüdongrü tsü changjüpü khanglang ko nührünü arüh yangditi ko kushirü khyo hütsüla lipehpü khanglang,

^2-3 zah chihchehnungthsa yangdi khüdu-khüdu zehsohpü alih tsü nohlüm asang kang changnahng. Hütsükhang, nyüh khüdunü khürü kyüsehde tsungtinung shulüm hütsüri khüdula tsiyohnung.

⁴ Nyüh khüdunü abi rorüh mahpü thsameh nyüh khüdu kyüsehkhang, abinü hiri yangdi khüdula tsikehnung.

⁵ Adüzünü, nyüh anyüh rangmülang singyu wüko ko nyüh khüdunü sing thsunahde, püh xahcheh akhüuba tsü kyüsehkhang, abinü hütsüri yangdi khüdu yang shangwünü tsiyohnung kohle.

⁶ Ta yangdi tsü khüdu du thsakhang, adukah tsü shuranung ko asüba tsutpurünü iiphünung ko rühyang achomükeh nyitsarü tsü kyüsehnung. Ta hütsü, abi rorüh mah, thsamehcho du lile.

⁷ Hütsünü Ihnü yangdi asang pathsa throchehnung yuzeng jüre.

⁸ “Khode Abüdongba nührü Tsingrang-nü, abinü nührü jümürü te nyengchocho roh-i, nührü lih alaa jaa kangsohnang, ko abinü nyengchoba lih apüm tsü jonang,

⁹ hütsüde nührünü adesü yangdi asang throcheh lieng. (Nührünü Ihnü chünye nührü te mülacho lüpcho hi nguchikhang ko nührünü Abüdongba nührü Tsingrang müikhang ko Abi adoba kyo likhang, Abinü alih hi jünung.)

¹⁰ Achomükeh nyitsarü müsünung ko Abüdongba-nü nührü khyang jüba lih la nührünü arüh süsohba tsü mülang mülinung nengdang, hi nguching.

¹¹ “Ta adüzünü, nyüh khüdunü abi rorüh khüdu kyüsehpü hütsüri yangdi khüdula tsiyohkhang,

¹² hütsülü, arüh yangdila langnürütinü abi nünung müthehnung ko arüh tsutpurü khyang rühyangsoh abi süsohnung shulüm jünung.

¹³ Abi te yanglilüm tüngusoh. Nührü te lüpcho tsa linung shulüm Israel lanü amüpsehrü hitari pehng.

Jümü Luhrü

¹⁴ “Abüdongba-nü nührü khyang jüba lih la tsü, papadenü khyüm liba kurümrü lurü tülohmüi.

Yuzi Nengdang

¹⁵ “Nyitsarü khüdu thsamehcho mülangjünung yuzi khüdu tsü akükyüh mah; hütsü mülangjünung azaunü yuzi anyüh adhsütah.

¹⁶ Nyüh khüdunü arahkheh yuzi jo aparü khüdu mülangjünung müküpkhang,

¹⁷ hütsü shikhe yukharü ko bebürü yang yukhasohnung amübüjilang tsü anyüding wübae.

¹⁸ Yukharü tsünü khiyu tsü longi bhunung; ko nyitsarüba tsünü arahkheh la ajünirü Israelrü mülangjüpü likhang,

¹⁹ mülangjüba nyitsarünü ngunung liba akhingchi tsü abi khyang jünung. Hütsüta nguchi nührünü hiba münyi tsü pehnung.

²⁰ Hütsüde atikehcho tsü atümungnü müdhenung; arühnü drünung ko sünüsü hitari adrüba nguchi khodesü münguchinung.

²¹ Hitari khiyu lalü yanglilüm tübichi; akhingchi tsü akang mülih akang, nahtse mülih nahtse, aha mülih aha, akheh mülih akheh ko ajing mülih ajing.