AZIKA YU 17 - AMÜSA BAIBEL (BSI)

¹ “Abüdongba nührü Tsingrang khyang achokeh misü mahkhang san kangmübü tüjü; Abüdongba-nü hitari thrünyire.

² “Adüzünü nührü yangdila lirü khingkurü mahkhang adhrerü khürünü Abüdongba nyüm amünyi shitpahko

³ ko tsingrang apa, mahkhang nyü mahkhang chonu mahkhang chenghi mübü ko dikehnü abi te anyengchotacho thsangnyangko.

⁴ Nührünü hitari yusi khürü yuchikhang, hütsü longi bhusohng.

⁵ Israel la hitari amünyi nguchi nguchicho tsü yuje thsakhang yangdi mihlang nochüdu lungnü kengsehpehng.

⁶ Ta abi mülangjüba tsü nyüh anyüh mihlang yuzi lipü du abi süsohnung kohle; yuzi nyüh khüdu du thsakhang abi müsüsohnung.

⁷ Yuzi jürüti tsünü akhu kheh thahnung, hütsüpü du aparünü abi chah kengnung; hütsüta nguchi nührünü amünyi tsü pehnung.

⁸ “Khiyu khürülü yang la yukharü nengdang thsahrakhang adüzünü thsiking khyüba mahkhang füla dhsakehcho mahkhang müpsehcho ko thsameh süsohcho. Hitari tikehde, Abüdongba nührü Tsingrang-nü throchehba mübüji müdüm khüdulang tsü wüng,

⁹ ko nührü khiyu tsü Levirü bebürü ko hütsü shikhe yukhaba khyang jüng ko arüh khyang khasohng.

¹⁰ Arühnü yukhaba tsü jünung ko nührünü arühnü yocho kyo tsü nguching.

¹¹ Arühnü tu khüta khanang hütsü khyüchoung ko arühnü thülacho roh-i nguching.

¹² Khürünü yukhaba ko hütsü shikhe bebüba nyüh yocho münyikhang, abi tsü süsohnung; hütsüta nguchi nührünü Israel lanü amünyi tsü pehnung.

¹³ Hütsüde, atümungnü hütsü yuchinung ko drünung ko sünüsü hütsüta nguchinung müci mümülahnung.

Yangthsarü khüdu Nengdang Athülaba

¹⁴ “Abüdongba nührü Tsingrang-nü nührü khyang jüba lih tsü nührünü khyo hütsüla lide nührü mükangmüshü aparü apüm kyo nührünü yangthsarü khüdu dhsütahlepü dhrongchehnung.

¹⁵ Yangthsanung sü throchehnang hütsü Abüdongba-nü throchehba tsü thsanung müdheing. Abi tsü nührübürü nyitsarü yolanü thsaang; nührü yangthsarü thsanung shuparü tüthro.

¹⁶ Yangthsabanü rothsarü nengdang kuri adrong müyohpünung ko Ijip lang kuri lihnung mümüthehnung, tunüo Abüdongba-nü arüh te khodesü hütsülang arüh thali müwünung yoko.

¹⁷ Yangthsabanü anitpü adrong müyohpünung, tunüo hinü Abüdongba tenü za tsisohnung; ko abi hon ko taripi khyübülung alirü mükangnung.

¹⁸ Khode abi yangthsaba kangnang, Tsingrangba yuzeng ko adoba Levirü bebürünü yohpüba lanü thrahchocho vakha khüdu abi kheh la linung.

¹⁹ Abinü hütsü abi shündhün yohpünung ko abi akang ayung hütsülanü khinung, hütsü dunü Abüdongba dhichinung ko hütsüla mülacho lüpcho yuje cho bichinung nyichonung.

²⁰ Hi khu abinü abürü aparü Israelrü tenü abi atsaepü mülümnung ko Abüdongba yuzeng tusü abinü münyimehnung. Hütsükhang abinü anyahli yangthsa thsanung ko abi trahnü Israel la shang adrong yangthsa thsanung.