AZIKA YU 16 - AMÜSA BAIBEL (BSI)

Phungkhu Thsüti

¹ “Abib choo la Phungkhu Thsüti müzehnü Abüdongba nührü Tsingrang dhiching; hütsü choo romang khüdula Abinü Ijip lanü nührü nüchehcho.

² Mübüba müdüm khüdulang tsü wüng ko hütsüla nührü san mahkhang misü khüdu Abüdongba nührü Tsingrang dhichinung Phungkhu Thsüti nengdang müpsehng.

³ Nührünü hi tsude, bhüpza yohcho hümdhse tütsu. Nührünü dhsüdhsa Ijip pehjüde kyo, nyümong dhünyeh bhüpza müyohcho hümdhse tsung. Hiba hümdhse tsung, hütsüte chongcha hümdhse pü dsinung hütsünü nührü akangli ayung, chongcha lii Ijip lanü chüroba nyümong tsü nührünü münbüchünung.

⁴ Nyümong dhünyeh nührü lih la sü kuh-lasü bhüpza mübichinung; ko akhudiba nyümong anyüzehlang müpsehba shuh tsü hütsü romangnü tsukhang.

^5-6 “Mübüba müdüm khüdula tsü Phungkhu Thsüti kanglungrü tsü kyüsehnungchah khu Abüdongba nührü Tsingrang-nü nührü khyang jüba alih khüdesü hütsü mükyüsehnung. Hütsü nührü Ijip pehjüba bekhyah, nyüzüdude nguching.

⁷ Shuh tsü chong ko mübüba müdüm khüdulanü hütsü tsung; ko nyangnyü khüu kulang thalieng.

⁸ Tunüo tungkeh nyümong dhüroh bhüpza müyohcho hümdhse tsunung, ko dhünyeh nyümong tsü Abüdongba mübünung shimükhong ko hütsü nyümong tu tünguchi.

Maxa Thsüti

⁹ “Maxa dikeh nyümong lanü nyükhih dhünyeh khieng,

¹⁰ ko amüwa aichi amüküp mübü jo, Abüdongba nührü Tsingrang dhichinung nengdang Maxa Thsüti müzeh mung.

¹¹ Abüdongba jingte nührü tsurü, kulirü, Levirü, shuparü, mürürü ko nührü yangdila liba chomilarüti yola künyangtaang. Hütsü mübüba müdüm khüdula tsü nguching.

¹² Hiri yuzeng bichinung lümkehng; nührü Ijip la ayurü surola licho tünbüchü.

Mütpahvi Thsüti

¹³ “Nührü mawipü ko shükusih nyehkhangpü khanglang, mütpahvi thsüti nyümong dhünyeh müzeh mung.

¹⁴ Nührü tsuzarü, kulirü Levirü, shuparü, mürürü ko nührü yangdila liba chomilarü hiri apüm yola künyangtaang.

¹⁵ Nyümong dhünyeh hiba thsüti mübüba müdümla müzah mungnü Abüdongba nührü Tsingrang dhiching. Künyangtaang, tunüo Abüdongba-nü nührü maxa ko nguchi müwajüko.

¹⁶ “Nührü yucho la adhrerü atümungnü Abüdongba mübünung mübüji müdüm yang kang la asangpi rung: Phungkhu Thsüti, Maxa thsüti ko Mütpahvi thsüti.

¹⁷ Abüdongba nührü Tsingrang-nü palu khyang müwajücho aichi, nyitsarü müipinü jiyü hirung.

Yuje Yangthsathsaba

¹⁸ “Abüdongba nührü Tsingrang-nü nührü khyang jüba yangdongti müipila yukharü ko aparü thsazirüti throchehng. Arühnü müyurü khiyu tsü khüpakhüla müthsapü khanung.

¹⁹ Arühnü yuje mücho müthsabae ko arüh yukhabala romih dhing müngusohbae; ko arühnü pohsa mükhyübae, tunüo lümzeh ko yuje chorü mii jiyünü nahtohsohre ko amüthsalang yukhasohre.

²⁰ Abüdongba-nü jüba lih tsü nguchehnung ko hütsüla mütozah linung nengdang, lede yuje ko tsa nguching.

²¹ “Nührünü Abüdongba nührü Tsingrang khyang bholu külüpde, Ashera tsingranglarü kyothri müshüm tüyohbü.

²² Ko kyothri mübü nengdang lung-dongdi tu tükhyüm; Abüdongba-nü hütsüri thrünyire.