AZIKA YU 15 - AMÜSA BAIBEL (BSI)

Adhünyeh-u Kang

¹ “Kang dhünyeh mükhu kang changkala nührü te thsite teerü apüm khyang pehjüng.

² Ko hütsü hiroh-i nguching. Ajünirü Israelrü khyang nyajücho thsite apüm pehjüng; hütsü tüching; Thsite tsü pehjüko pü Abüdongba apunü züdepeko.

³ Shuparünü thsite teekhang hütsülü ching, ta nührübürü te licholü tüching.

⁴ “Abüdongba nührü Tsingrang-nü, Abinü nührü khyang jüba lih la tsü nührü müwajünung.

⁵ Nührünü abi yocho nyikhang ko Ihnü chünye nührü te mülacho, hiri lüpcho müzahnü bichikhang, nührü süsü müilümnung.

⁶ Abinü nyengchocho kyo, Abüdongba-nü nührü müwajünung. Nührünü yucho adrong khyang thsi nyajünung, ta süchahnü sü nührünü münyanung; yucho adrong michah nührünü thsanung, ta tu yuchonüsü nührü michah müthsanung.

⁷ “Abüdongba nührü Tsingrang-nü jüba lih la ajünirü Israelrü khürü chongcha likhang, arüh tronung tüxükeh ko tüsuzah.

⁸ Ta müinü abi dhsütah nyasohng.

⁹ Thsite pehjünung kang chii rorekopü abi khyang münyasohpü tüli. Hitari amünyi lümlong tüzürosoh. Nühnü abi khyang münyasohkhang, abinü Abüdongba te nüh nyüm züdenung ko nüh mülang kangsohnung.

¹⁰ Abi khyang müxükehpü amükangnü jüng ko nü nguchicho lüpchola Abüdongba-nü müwajünung.

¹¹ Lede Israelrü khürülü iilüm chongcha linung. Hütsüeko hütsürite müi bichinung Ihnü yuzeng jüre.

Ayurü Bichicho

¹² “Ajünirü Israelrü khingkurünye adhrerünye, nyüh khüdu ajangjang nüte ayurü kang ikhang, abinü nührü kang dhüroh dikehkholü abi müthehng. Adhünyeh-u kang chihde, abi tsisohng.

¹³ Khode müthehnang, khehshü tütsisoh.

¹⁴ Abüdongba-nü nührü khyang San, fürü ko yongkha müwajücho lanü abi khyang mükhichipü jüng.

¹⁵ Nührü Ijip la ayurü suro lanü Abüdongba nührü Tsingrang-nü nührü lehcheh müthehcho lümchehng; hütsü khu Ihnü ade nührü khyang amülaba hi jüre.

¹⁶ “Ta ayurü tsünü mütsinyükhang ko abinü nührü ko nührü kukhi müichonü linyükhang;

¹⁷ nührü trahtri yang nowüng ko anangku tphehjüng ko abi lede khyang nührü yurü kangnung. Ayularüsü hütsüta bichieng.

¹⁸ Ayurü khüdu lehcheh tsisohde mükünyang tüli; tunüo abinü angang achangsho khyo kang dhürohlü nührü dikehko. Hiroh-i nguching ko Abüdongba-nü nührü nguchicho apüm la müwajünung.

Akhu Mütrüba Misü ko San

¹⁹ “Nührü misü ko Sanla akhu mütrücho apung apüm Abüdongba nührü Tsingrang nengdang pathsa yohpüng; hiri misü lanü nguchinung tübichi ko hiri san chahnü anbüh tümüjüp.

²⁰ Kang mükhu nüh ko nührü kukhinü mübüba müdüm khüdula tsü Abüdongba jingte hiri tsunung.

²¹ Ta kanglungrü chah tsü lango achokehkhang, jingjah mahkhang nahtoh mahkhang achokehkhang, nührünü hütsüri tsü Abüdongba nührü Tsingrang khyang kangmübü tüjü.

²² Hitari kanglungrü tsü kuh la tsunung kohle. Amüsanye mümüsanye nührü shümüshü ko shuhu tsucho kyo nührünü tsung.

²³ Ashüh tütsu. Ta alih la kih roh-i tungpehng.