AZIKA YU 13 - AMÜSA BAIBEL (BSI)

¹ “Akhulang nührünü mümübücho tsingrang mübüsoh ko dikehsohnung nengdang,

² azikehrü mahkhang melang müchehrü khüdunü thsayahiya mahkhang anyemüyangnung nguchinung kohle. Abinü nyengchoba tsü tikehnye,

³ hütsü tünyi. Hütsü nührü Abüdongba tsü yuje müirü a mahnang pü nüh thsadsünung, Abüdongba nührü Tsingrang-nü abi bichire.

⁴ Abüdongba khanglang wüng ko Abi dhiching; abi yocho nyieng ko Abi yuzeng yohpüng; Abi mübüng ko Abi te yuje cho lieng.

⁵ Ta melang müchehrü mahkhang azikehrü sünü nührü Ijip la ayurü suro lanü nüchehbong Abüdongba nyümnung yonang, abilü süsohng. Hütsütari nyitsarü tsü motsing ko Abüdongba-nü lisohnung akang jücho lanü nücho tsinung müküpre. Hiba amünyi lanü tsiphunung shulüm, abi tsü süsohng.

⁶ “Nü mung, nü tsurü, nü tsularü, nü nitpü mahkhang nü shangrü khungnü mii nührü ko nührü khodesü mümübücho tsingrang mübüsohnung rangnü thsüchinung kohle.

⁷ Khürünü nührü shündhün mahkhang ashula lirü tsingrang mübünung thsüchinung.

⁸ Ta abi khyang nüh tükichosoh; anyi mii tünyi. Abi te yanglilüm mahkhang amüi tüngusoh ko abi tükhüm.

⁹ Abi kyüsehng! Akhu kheh thahng ko aparü apüm khyang kengsohng.

¹⁰ Abi kengseh süsohng! Abüdongba nührü Tsingrang sünü Ijip la ayurü suro lanü nührü nüchehcho Abi tenü nührü nücho tsinung müküpcho.

¹¹ Hütsüde atikehcho tsü Israelrü atümungnü yuchinung ko dronü hütsüta sünüsü münguchinung.

¹² “Abüdongba nührü Tsingrang-nü jüba yangditila nührü liyade,

¹³ nührü yucho la tulamüyoh nyitsarü khürünü arüh yangdila nührünü khodesü mümübücho tsingrang mübüsohnung nümülacho yuchinung.

¹⁴ Hütsütari tsupohyupoh khiyu yuchikhang, hütsü tsa bhudhing; ko amünyi nguchi hi tikehpü likhang,

¹⁵ hütsüba yangdila lirü ko arüh kanglungrü zeh kyüsehng. Hütsüba yangdi tsü riri changsohng.

¹⁶ Hütsüla lirü kuthsi tsü apüm hirung ko yangdi longla tsü bhümpüng. Hütsüpü Abüdongba nührü Tsingrang khyang amübü kang yangdi ko hütsüla zehba apüm tsü trüp-pehng. Lede nengdang hütsü changpehsohnung ko thali khodesü müthsalinung.

¹⁷ Hütsü mülangjü changsohba lanü nührünü tusü tükhyü, hütsükhang Abüdongba-nü Abi rihlong chüroba lanü nyehlinung ko nührü te yanglilüm ngunung.

¹⁸ Nührünü Abi yuzeng Ihnü nührü khyang chünye jüba apüm hi bichikhang ko Abinü yocho kyo nguchikhang, nührü jümürü te nyengchocho kyo, Abinü nührü yanglilümnung ko nührü mükhilong kangsohnung.