AZIKA YU 11 - AMÜSA BAIBEL (BSI)

Abüdongba Dicho

¹ “Abüdongba nü Tsingrang müing ko lede Abi yuzeng apüm bichieng.

² Chünye nührü chah tikehcho khu tu nyichoro hütsü lümkehng. Atikehcho müdheba tsü nührü tsuzarüti mah, ta nührü.

³ Nührünü Abüdongba dicho, Abi zii, Abi re ko Abi thsayahiya nguko. Abinü Ijip yangthsaba ko Abi yangdi te tu nguchicho hütsü nührünü nguko.

⁴ Abüdongba-nü Ijiprü rothsarünü nührü iirode, khüta arüh kuri ko nyübong kuri zeh Amoh Kihdi la dhsangseh changsohcho hütsü nührünü nguko.

⁵ Nührü ro hi müchih-ede akungaselih la Abüdongba-nü nührü nengdang tu nguchicho hütsü nührünü müdhele.

⁶ Reuben hung la Eliab tsurü Dathan ko Abiram chah tu tikehcho hütsü lümdhing. Apümnü ngu alihnü abe kapü arüh kukhi, shükuh ko arüh kulirüti ko kanglungrü zeh münyopehcho.

⁷ Ko, Abüdongba-nü nguchicho nguchi amülülah hiri ngurü tsü nührü lile.

Anyengchocho Lih Amüwa

⁸ “Ihnü chünye jüba yuzeng hiri apüm nührünü bichieng. Khang, nührünü Yongkhi tsü kehchehnung ko nührü wünung liba khyüchehnung.

⁹ Ko Abüdongba-nü nührü jümürü ko arüh chahnü trahchochoti khyang jüba alih ko asu lih la tsü nührünü anyahli linung.

¹⁰ Nührünü ngunung liba lih tsü nührü akhulang liba Ijip lih mükyo. Hütsülalü, nührünü fürü khyümpü, luh la kih noronung tsü dee khee nguchicho;

¹¹ ta nührü züdunung liba lih tsü akhang azonglih, tsingnü kih xahba lih lile.

¹² Abüdongba nührü Tsingrang-nü hiba lih hi xükümre ko kang ayung dhingyehre.

¹³ “Hütsüeko, Ihnü chünye nührü khyang jüba yuzengti tsü nyieng; Abüdongba nü Tsingrang müing ko nü lasih apümnü Abi dikehng.

¹⁴ Nührünü hütsüta nguchikhang, fürü, yongkha ko olive tuji dhsütahde maxamaki ko machimashü,

¹⁵ nührü ko nührü kanglungrü nengdang zanu shulüm abinü nührü lih la tsing rosohnung. Nührü tsunyücho tsuyongnung apüm ngunung.

¹⁶ Abüdongba tenü nümüla aparü tsingrang mübünung ko dikehnung nührü nücho tütsisoh.

¹⁷ Nührünü hütsüta nguchikhang, Abüdongba-nü nührü te zichüronung. Abinü tsing mürosohnung ko tsahma müchüronung. Hütsüde, Abinü jüba alih tsü tsanye, nührü hütsüla sünung.

¹⁸ “Yuzeng hiri lümkehng ko bichieng. Lümkehnung nengdang hütsüri tsü nührü kheh ko kikhangchah rahkehng.

¹⁹ Nührü tsuzarü te hütsüri tsü doung. Nüh kuh la lide ko langla tsehde, nüh kyahshangde ko nguchide, hütsüri nengdang choung.

²⁰ Hütsüri tsü nührü trahtri ko kukhangchah thrahkeh yohpüng.

²¹ Khang, nüh ko nü tsuzarüti, Abüdongba nührü Tsingrang-nü nührü jümürü te nyengchoba lih la tsü anyahli linung. Nührü hütsüla ning alih müchangde linung.

²² “Ihnü jüba yuzengti tsü yuje cho bichieng: Abüdongba, nührü Tsingrang müing, Abinü mülacho apüm nguching ko Abi te longlang lieng.

²³ Khang, nührü züdude, Abinü yuchoti apüm iipehjünung ko nührü tenü adiu ko rezeh-u yuchoti limih tsü nührünü khyünung.

²⁴ Nührünü lahkhu tsiba alih apüm tsü nührü yo linung. Nührü lurü tsü kihjing lahpi akungaselih lanü kihku lahpi Lebanon Zong chii, ko nyüchürolang Eufrates Yongkhi lanü nyüzüdulang Mediteranean kihdi chii linung.

²⁵ Hütsüba lih la nührü khüde khüdesü wünye, abinü nyengchocho roh-i, Abüdongba nührü Tsingrang-nü müyurü khyang nührü drüsohnung ko sünüsü nührü bete müyachehnung.

²⁶ “Ihnü chünye nührü khyang amüwa mahkhang chokehchola yola khüdu throsohnyüre.

²⁷ Ihnü chünye nührü khyang jüba yuzeng hi bichikhang amüwa;

²⁸ ta nührünü yuzeng hiri münyipü ximüla, nührünü khodesü mümübücho tsingrang mübünung wükhang, chokehchola.

²⁹ Khode anyengchocho lih la tsü Abüdongba-nü nührü noronang, amüwa tsü Gerizim ko chokehchola tsü Ebal Zong lanü sobhonung.

³⁰ (Hiri azong anyüh tsü Jordan Ngah la lirü Kanan-rü lih Jordan yongkhi nyüzüdu lahpilang lile.) Arüh tsü nyüzüdulang lahpi Gilgal yangdi shündhün liba More Amüsa singdong lanü khü wüpü licho.

³¹ Nührü Jordan Yongkhi kehpü Abüdongba nührü Tsingrang-nü nührü khyang jüba lih tsü khyünung thsako. Khode nührünü hütsü khyo hütsüla linang,

³² Ihnü chünye jüba yuzeng hiri bichinung lümkehng.