AZIKA YU 10 - AMÜSA BAIBEL (BSI)

Thali Yuzeng Ngucho

¹ “Hütsüpü Abüdongba-nü Ite yocho, ‘Ahiba tsü kyo, lungtpah anyüh hamchehng ko hütsü yohnung singdi khüdu külüpm.

² Ih yang azonglang tsü kürung ko nühnü thsangnyangba lungtpah chah thrahcho kyo Ihnü hütsü chah thrahkehjünung ko nühnü hütsü singdi la tsü yohng.’

³ “Achotsü Ihnü akacia singnü singdi khüdu külüpcho ko ahiba tsü kyo lungtpah anyüh külüpcho ko azonglang tsü hiküducho.

⁴ Hütsüpü Abüdongba-nü akhudi thrahcho akyokyo tsü lungtpah chah tsü, Yuzeng dhüre nührü azongchah shimükhongde michang khu nührü te chota jüba tsü thrahcho.

⁵ Abüdongba-nü I khyang lungtpah tsü jücho ko Ihnü ximüla azongla tsünü jowücho. Hütsüpü, Abüdongba-nü mülacho kyo, Ihnü külüpba singdi la tsü yohcho ko hütsü nyümong tinü hütsüla lile.”

⁶ (Israelrünü Jaakan-rü yo kihkong la tsünü shemüsucho ko Mosera lang wücho. Hütsüla Aron sücho ko dhrürangcho ko abi tsurü Eleazar tsü abi mülih bebürü kangcho.

⁷ Hütsülanü arühnü Gudgoda ko hütsülanü kih liba Jotbatha lang wücho.

⁸ Azongchah tsü Abüdongba-nü Yuzeng Singdi xükümnung bebürü kang abi dikehnung ko abi nengla amüwa jüsohnung, Levi hung lanü adhrerü throcho. Ko ade yingcheh hiri tsü arüh nguchi lile.

⁹ Hütsü khu, aparü hung kyo, Levirü khyang alih müjücho; Abüdongba nührü Tsingrang-nü nyengchocho kyo, arüh tsü Abüdongba dikehrü thsanung throchehcho)

¹⁰ “Akhudi kyo, Ihnü azongchah tsü nyümong yüre ko romang yüre licho. Abüdongba-nü Ite thali nyicho ko nührü müchangsohnung nyengchocho.

¹¹ Hütsüpü Abinü Ite, nührü jümürü khyang jünung nyengchocho lih tsü nührü khyang ngusohnung wü nührü nünung yocho.

Tsingrangba-nü Khangcho

¹² “Ade, Israelrü, Abüdongba nührü Tsingrang-nü nührü chahnü tu khangro hütsü nyieng: Abüdongba mübüng ko Abinü mülacho apüm nguching. Abi müing, nü lasih apümnü Abi dikehng,

¹³ ko Abi yuzeng apüm bichieng. Nührü tsasohnung, hütsüri chünye Ihnü nührü khyang jüre.

¹⁴ Ning athsenguba tsüsü Abüdongba yo; alih ko hütsüla liba apüm Abi yo.

¹⁵ Ta nührü jümürü te Abüdongba amüi tsü dirachonü, Abinü aparü pehpü nührü throchehcho ko ade yingcheh nührü Abi athrochehcho nyitsarü lile.

¹⁶ Hütsüeko ade tinü Abüdongba yocho nyieng ko hong tüzi.

¹⁷ Abüdongba nührü Tsingrang tsü tsingrangti apüm michah ko zii apüm michah abi adiuba. Abi amülah ko akohba ko Abi adrünung. Abinü tsahdhingkudhing müthsare ko pohsa mükhyüre.

¹⁸ Abinü mürürü ko chomilarü tsa dhingre; shuparü Ihsa yola lirü müire ko arüh khyang tsuyongba ko jengki jüre.

¹⁹ Hütsüeko, shuparü te amüi ngusohng, tunüo khüdupi Ijip la nührüsü shuparüthsa licho.

²⁰ Abüdongba nührü Tsingrang yocho nyieng ko Abi du mübüng. Abi te yuje choung ko Abi nengla du nührünü yuchüm.

²¹ Abi seing, Abi nührü Tsingrang ko Abinü nührü nengdang nguchi amülah ko adrünung nguchicho nührü nahnü nguko.

²² Nührü jümürü Ijip lang wüde arüh nyühre du thsacho. Ta ade Abüdongba nührü Tsingrang-nü nührü ningchah chenghiti toi mükhilong kangsohko.