AMOS 9 - AMÜSA BAIBEL (BSI)

Abüdongba Yukhaba

¹ Ihnü Abüdongba tsü bholu te ya ngucho. Abinü yuzengjücho: “Kuhbi shünü dhi shühchinungthsa amübükuh dongdi chah tsü müpm. Lohnahng ko nyitsarü thah chah longchosohng. Anyingcho tsü Ihnü rothsala süsohnung. Süsü mütsichehnung; khüdu mii mütsiphunung.

² Arühnü asüyang yang ju züdu pümnye, hütsülanü Ihnü arüh rangchehnung. Arühnü ninglang chii tuwünye, hütsülanü Ihnü arüh tphahchonung.

³ Arühnü Karmel Khang chah rangnye, Ihnü yangchi hütsülanü arüh rangnung. Arühnü I tenü rang kihdi jongnah la rangnye, Ihnü yuzeng jüpü kihkangdi khyang mükahsohnung.

⁴ Arüh rorünü arangyoh la notsinye, Ihnü arüh süsohnung yuzeng jünung. Ihnü arüh tronung mahpü changsohnung dhrongchehko.”

⁵ Amichahba Akohbong Abüdongba-nü alih michah thahpüre ko hütsü shühchire; hütsü chah lirü atümung me trare. Alimih apüm Nile yongkhi kyo loh küroli jowülinung.

⁶ Abüdongba-nü abi kuh ninglang thsare; ko alimih michah ning tsü kuh roh-i yohpüre. Abinü kihdi kih dsire, ko alimih michah tungkehjüre. Abi neng tsü Abüdongba!

⁷ Abüdongba-nü yore, “Israelrü, Ihnü nührü nengdang lümcho roh-i Ethiopiarü nengdangsü lümre. Ihnü nührü Ijip lanü norocho roh-i, Krete lanü Filistiarü ko Kir lanü Syria-rü norocho.

⁸ Ih, Amichahba Abüdongba-nü amünyi Israel yanglih khengyengre, ko hütsü alih lanü changjünung. Ta Jakob trah atümunglü müchangjünung.

⁹ “Ihnü yuzeng jünung ko yejang la fürü yecho kyo Israelrü yenung. Amütsarü pehnung nengdang apüm yolanü Ihnü Israelrü yenung.

¹⁰ ‘Tsingrangba-nü ihrü chahlü adhsa müjünungepü yoba I müyurü yola amünyirüti tsü rothsala süsohnung.’”

Israel Külüpchilinung

¹¹ Abüdongba-nü yore, “Trümtsu tsiba kuh khüdu thsachicho kyo David yanglih külüpchinung nyümong khüdu role. Ihnü tbü hütsü külüpchi asi kangjünung. Ihnü hütsü papade liba roh-i külüpjü kangsohnung.

¹² Edom lih la nying liba ko khüdupi Iyo thsacho yuchoti apüm, Israel-nü mahchehnung” ko nguchinung pü, Abüdongba-nü yore.

¹³ “Fürü tsü müxaphu dhsüdhsa zinung, ko cikih münyehphu shükusih dhsüdhsa zinung, Nyümong tsehlepü Abüdongba-nü yore. Azongnü anyiyah cikih shonung, ko akhangnü hütsü pohnung.

¹⁴ Ihnü I müyurü arüh lih lang nüli ronung. Athsangnyangcho yangdi arühnü külüpchinung ko hütsüla linung; Arühnü shükusiluh thsanung ko cikih yongnung; arühnü tbü tbünung ko hütsülanü chürocho tsunung.

¹⁵ Ihnü jücho lih la Ihnü I müyurü khyümnung, ko arüh thali mürohpehnung” Abüdongba nü Tsingrang-nü choko.