AMOS 8 - AMÜSA BAIBEL (BSI)

Singsih Loh Khüdu Müngucheh

¹ Amichahba Abüdongba chahnü müngucheh apa khüdu ngucho. Hütsüla Ihnü singsih loh khüdu ngucho.

² Abüdongba-nü yocho, “Amos, nühnü tu nguro?” Ihnü lalingcho, “Singsih loh khüdu.” Abüdongba-nü Ite yocho, “I müyurü Israelrü nengdang achangka tsü roko. Arüh khingchinung I kangli mümülichinung.

³ Hütsü nyümong yangthsaba kuh la khi tsü meshü khi du kangnung. Apümlang asü me linung. Yuva müchüropü arüh dhiyohchüpehnung.”

Israel Mülangjücho

⁴ Yucho la müdsimükurü dhrümchirü ko ailümrü thsangnyangjünung müküprü, hi nyieng.

⁵ Nührübürünü yorü, “Ihrü fürü inung nengdang amünyümong khusohnung nahmürahre. Ihrü fürü thali inung amünyümong tsü khode khunung? Hütsüde ihrünü alaa chingnung, rahmüla ho-nung, ko fürü lihrü thsüyohchünung ahosing zingmülanung.

⁶ Litoh aphümcho amii athsah ngang inung. Jingthri aphih khüdu amii mii müjücheh thsite müsachehba ailümrü ihrünü yangchinung, ko abi ihrü yurü thsanung lihnung.”

⁷ Abüdongba, Israel Tsingrang-nü yuchümre, “Arüh amütsa nguchiti Ihnü khodesü münbüchünung.

⁸ Hütsünü alihyo zingnung, ko lihküprü lümküchasohnung. Limih apüm shühchinung; ko Nile yongkhi kyo loh küroli jowülinung.

⁹ Ihnü nyüthungla nyü züdusohnung ko limih la anyümongnü masohnung bekhyah tsü role. Ih, Amichahba Abüdongba-nü choko.

¹⁰ Ihnü nührü thsüti tsü meshüba, ko nührü akünyang khi tsünü alongri kangsohnung. Ihnü nührü thah hehpehsohnung ko müyahshü müpisohnung, ko atsurü khüdu du licho süde tpurü tracho kyo nüh kangnung. Hütsü nyümong tsü achangchi tranung.

¹¹ “Ihnü alih la yangkong müthehnung bekhyah tsü chihle. Nyitsarüti yangkongnung, ta tsang nengdang mah. Nyitsarüti xonung, ta kih nengdang mah. Ta Abüdongba yu nengdang yangxonung. Ih, Amichahba Abüdongba-nü choko.

¹² Arühnü kihdi lanü kihdi chii ko nyüchüronü nyüzüdu chii phachinung. Arühnü Abüdongba yu apümlang yangchinung, ta hütsü müngunung.

¹³ Hütsü nyümong axochonü dhreza lazarü mii khülunung.

¹⁴ Sürünü Samaria kyothri nengla ‘Dan tsingrang nengla’ mahkhang, Beersheba tsingrang nengla pü yuchümnang arüh khülunung ko thali müsuronung.”