AMOS 7 - AMÜSA BAIBEL (BSI)

Khengqu Nengdang Müngucheh

¹ Amichahba Abüdongba chahnü Ihnü müngucheh khüdu ngucho. Yangthsaba nohlüm maxapü thali zanu chichide abinü khengqu tii chürosohcho Ihnü ngucho.

² Khengqu tsünü alih la singvarova apüm münachehcho Ihnü münguchehcho, hütsüde Ihnü yocho, “Amichahba Abüdongba, Nü müyurü khyang mülang pehjüng! Arüh khütapü akang linung? Arüh khura azikyah ko sumüzeh!”

³ Abüdongba-nü Abi kangli mülihchi yocho, “Nühnü nguba tsü mütikehnung.”

Michang Nengdang Müngucheh

⁴ Amichahba Abüdongba chahnü adesü müngucheh khüdu ngucho. Hütsüla Abi müyurü michangnü khingchinung rungnümchi Ihnü ngucho. Michang tsünü alih yonglang kihjü arangcheh tsü trüp-pehcho, ko alih tsü mii trüpnung dikehcho.

⁵ Hütsüde Ihnü yocho, “Yalieng, Amichahba Abüdongba Tsingrang, Nü müyurüti khüta akang linung? Arüh khütang aikyah ko sumüzeh!”

⁶ Abüdongba-nü akangli mülihchi yocho, “Hisü mütikehsohnung.”

Akihsing Münguchehcho

⁷ Abüdongba chahnü müngucheh apa khüdu ngucho. Hütsüla akihsingnü kih tbüchoba tbü khüdu müshüm akheh la akihsing khüdu bipü ya Ihnü ngucho.

⁸ Abinü Ite yocho, “Amos, nühnü tu nguro?” Ihnü lalingcho “Akihsing khüdu.” Hütsüpü Abinü yocho, “I nyitsarü tsü amümüchong tbü kyocho ngusohnung Ihnü hi bichire. Ihnü arüh khingchinung I kangli mümülichinung.

⁹ Isak trahnü mübüba müdümti tsü Ihnü thsangnyangjünung. Israel la Amüsa müdümti tsü lohnah pehjünung. Yangthsaba Jeroboam nah tsü changkasohnung.”

Amos Ko Amazia

¹⁰ Bethel la bebüba Amazia-nü hütsüde Israel la yangthsaba Jeroboam yang yusi müthehcho: “Müyurü yola Amos-nü nüh nyüm arah külüple. Abinü choba yu tsünü limih thsangnyangnung.

¹¹ Abinü hita yore: ‘Jeroboam rothsala sünung, ko Israelrü arüh lih lanü yangtsilang notsinung.’”

¹² Hütsüde Amazia-nü Amos te yocho, “Kükyüko, azikehba! Juda lang thali wünü hütsüla thsingyung. Ko arüh khyang nüh kangsohng.

¹³ Bethel hila adelü tüchoyoh. Hi yucho Amübükuh yangthsaba mübüji lile.”

¹⁴ Amos-nü lalingcho, “Ih amii ngang choyohba azikehrü khüdu mah. Ih san nyahrü khüdu, ko ngurüsih luthsarü.

¹⁵ Ta Abüdongba-nü Ih san-nyahba lanü norocho ko apu nyitsarü Israel te wü choyohnung Ih müthehcho.

¹⁶ Hütsüeko ade Abüdongba-nü tu yorünang nyieng. Nühnü Israelrü nyüm müchoyohnung Ih yatire.

¹⁷ Hütsüeko, Amazia, Abüdongba-nü nüte yore, ‘Nü nitpü yanglongla afü irü kangnung, ko nü tsuzarüti rothsala kyüsehnung. Nü lih changnah bürü khyang jünung, ko nüpu mii müyudsirü lih la sünung. Ko Israelrü arüh lih lanü yangtsilang notsinung.’”