AMOS 6 - AMÜSA BAIBEL (BSI)

Israel Changcho

¹ Nührü Zion la künyangküshi ko Samaria la tbachi liba Israel yucho amülahla adirü, sürü yang arüku chingnung roro, nührü nengdang khüta adrünung!

² Wüng ko Kalne yangdi dhing. Hütsüpü Hamath yangdi lanü Filistia yangdi lang jowüng. Juda ko Israel yanglih tenü arüh atsau do? Nührü lih arüh lih tenü adiu do?

³ Achangba nyümong khüdu roba tsü nührünü ho müthsare, ta nührünü nguchiba tsünü hütsü nyümong amünyeh-u du rosohre.

⁴ Nührü pümji atsala müyungchü pümpü misüza ko sanza shunü thsüti khyürü nengdang khüta adrünung!

⁵ David roh-i nührünü khi tangnyüre, ko tbenglah lah thsanyüre.

⁶ Nührünü thungshing lanü yongkha yongre ko axümlichi atsauba bichire, ta nührünü Israel thsangnyangcho shulümlü mülongrire.

⁷ Hütsünü yangtsilang nührü akhu wünung. Nührü thsüti ko alangnye tsü changkanung.

⁸ Amichahba Akohbong Abüdongba-nü amüzahnung hi jüre: “Ihnü Israelrü ririkuh la müthseh licho thrünyire; Ihnü arüh küdoküyahcho thrünyire. Arüh yangdi ko hütsüla liba lüpcho Ihnü arorüh khyang jünung.”

⁹ Kukhi khüdula nyüh dhüre nyingkhang, arüh sünung.

¹⁰ Asüba jünirü, sünü dhrürangnung liro, abinü me tsü kuh lanü khyüchehnung. Abinü kuh la nying lirü te yonung, “Nü yola adesü khürü mühlio?” Nyitsarüba tsünü lalingnung, “Mühle!” Hütsüde jünirü tsünü yonung, “Ya-adung! Ihsanü Abüdongba neng mii müdangchinung müzahbae.”

¹¹ Abüdongba Yuzeng jüde, kuh aikyah ko amülah apüm tphüzangzang pehnung.

¹² Kurinü lungrah la tsohrü do? Nyitsarünü kihdi tsü misüpung nüpü xürü do? Ta nührünü yuje tsü müyüh kangsohre, ko athsalang tsü amüthsalang kangsohre.

¹³ Nührünü Lodebar yangdi mahcho müthsehre. “Ihrünü Karnaim khyünung kohlepü” nührünü müthsehre.

¹⁴ Akohba Abüdongba tsingrang apunü yore, “Israelrü, nührü lih khyünung Ihnü yangpirü rothsarü müthehnung. Kihku langnü Hamath lanü kihjinglang Araba kihna chii Ihnü nührü dhrümchinung.”