AMOS 5 - AMÜSA BAIBEL (BSI)

Lasih Thsamülanung Dsicho

¹ Israelrü, nührü khyang Ihnü thsaba meshü khi hi nyieng:

² Amüdhsengcheh Israel khüluko, khodesü müshemüsunung! Abükyü alih la thrüchachüpeh yüpjole, ko sünüsü abükyü mükhamüsu.

³ Amichahba Abüdongba-nü yore “Israel yangdi lanü rothsarü hajar müthehchüre, ta thsih-o du thalire; apa yangdi khüdunü thsih müthehchüre, ta dhüreo du thalire.”

⁴ Abüdongba-nü Israel te yore, “Ih yangching, ko akang lieng;

⁵ Ta Bethel tüyangchi, ko Gilgal lang tüwü, mahkhang Beersheba tülahkhu; tunüo Gilgal rang hitsiriri, ko Bethel adeng kangnung.”

⁶ Abüdongba yangching ko akang lieng, mahkhang, Israelrü michah Abi michang roh-i mükhakehnung, michang tsünü Bethelrü trüpnung, ko sünüsü hütsü mümüpmehchehnung.

⁷ Nührü yuje kihmülarü ko nyitsarü alanglang amüthsalang kangjürü, nührü ahohah!

⁸ Abüdongba-nü Pleiades ko Orion chenghiti külüpcho. Abinü amarürahnü atsingse ko anyümongnü ama kangsohre. Abinü kihdi lanü kih dsire ko alimih michah arüh tungkehjüre. Abi neng Abüdongba.

⁹ Athrungrü ko arüh roshengvi yang Abinü athsangnyang hirojüre.

¹⁰ Yujemücho nyümrü ko yukhachah yuje chorü nyümrü nührünü thrünyire.

¹¹ Nührünü ailümrü dhrümchire ko arüh fürü kengchore. Hütsüeko nührünü thsacho lungkuh atsala nührü mülinung mahkhang nührünü khyümcho shükusiluh lanü müyongnung.

¹² Nührü münyi khütoi adrünung ko nührü khütoi thsamehcho Ihnü müdhele. Nührünü nyitsarü atsa dhsümthsere, pohsa khyüre, ko yukhachah ailümrü alanglang yatire.

¹³ Hütsüeko, hitari bekhyah amütsala sahmüthsaba tsü asithsa!

¹⁴ Amütsa mah, atsa yangching ko nührü akang linung. Hütsükhang, yocho kyo, Abüdongba Akohba Tsingrang nührü te linung.

¹⁵ Amütsa thrünyieng, ko atsa müing, ko yukhajila yuje tsü lisohng. Kümüdeo, hiba yucho nyitsarü sürü akang liro arüh te Abüdongba-nü chomangnung.

¹⁶ Hütsünü Abüdongba Akohbong Tsingrang-nü yore, “Yangdi yanglongla tsü meshü ko awah yuva linung. Mülihpü meshürü yola luthsarü mii dsi meshüsohnung.

¹⁷ Shükusih luh apüm la metraba linung. Hiri apüm tikehnung tunüo Ih nührü khingchinung role.” Abüdongba-nü choko.

¹⁸ Nührü Abüdongba nyümong yingrü khüta adrünung! Hütsüba nyümongnü nührü khyang tu atsa nguchijünung? Tunüo hiba nyümong tsü atsingse mah ta ama.

¹⁹ Nyüh khüdu kangdi bete tside shühmü shirücho kyonung! Mahkhang nyüh khüdu kulang ro züdi chah akheh nyümkehde mürünü mükyücho kyonung!

²⁰ Abüdongba nyümong tsünü atsingse mahpü ama du hironung; hiba nyümong tsü avisa mah ta amarürah.

²¹ Abüdongba-nü yore, “Ihnü nührü thsüti thrünyire; Ihnü arüh mükoh dhingre;

²² Nührünü Ih yang trüp mübü ko tsang mübü hironye Ihnü mükhyüchonung; nührünü akangpü kanglungrü I khyang amübü jünye Ihnü mükhyüchonung.

²³ Nangmüthsuba nührü khi zahng; nührü ikhong tsü Ihnü münyinyüre.

²⁴ Hütsü mülih, yuje tsü kihna roh-i pohsohng ko Amüsaba tsü münyehba yongkhi kyo pohsohng.

²⁵ “Israelrü, Ihnü kang yüre lipilih la nührü norode, Ihnü kangmübü ko amübü müching.

²⁶ Ta ade nührünü nührü yangthsaba tsingrang Sakut ko nührü chenghi tsingrang Kaiwan kyothri mübücho ngang,

²⁷ Ihnü nührü Damaskas khu yangtsilang nührü wüsohde hütsüri kyothriti nührünü hinungepü” Abüdongba, sü neng Akohbong Tsingrang liro Abinü yore.