AMOS 4 - AMÜSA BAIBEL (BSI)

¹ Yu hi nyieng, atsunyicho Bashan misü kyoba Samaria-larü, nührünü sumüzehrü khingchire, ailümrü sehchire, ko niirü te yongkha du khangre!

² Amichahba Abüdongba Amüsa thsachonü, Abinü nyengchoko, “Kojamnü nührü xohpü tphahnung nyümong ronung; nührü atümung ngu roh-i xohnung.

³ Nührü tbükhi yang tphah wünung ko tphahchehchü pehnung.”

Israelrünü Münyichehcho

⁴ Amichahba Abüdongba-nü yore, “Israelrü, Bethel yang wüng ko amünyi shitpahng! Gilgal lang wüng ko alaa amünyi shitpahng! Nyangnyü mükhu kangmübü jünung wü kanglungrü hirung, ko asang nyümong müipi nührü dhüre nohlüm hirung.

⁵ Wüng ko Tsingrangba khyang anengse amübü jüng, ko nü mübü alaa nengdang longlang! Hi nühnü müruba nguchi.

⁶ “Nührü yangditila yangkong hirojüba tsü Ih, ta nührünü Ih yang müximüla.

⁷ Nührü tsahmarü khütang dhsütahba tsing Ihnü mürosohcho. Ihnü yangdi khüdula tsing rosohcho, ta apa khüdula mürosoh. Lutri khüdula tsing rocho, ta lutri pa khüdu kungsohcho.

⁸ Axochonü kyahseh, yangdila lirütinü kih ngunung longdi wücho, ta arüh yongxah kih müngucho. Ta nührünü Ih yang müximüla.

⁹ “Nührü tsahma trüpsehsohnung Ihnü nyübong adhsa müthehcho. Khengqunü nührü tbü ko shükusiluh, ngurüsih ko olive dong apüm tsukhangcho, ta nührünü Ih yang müximüla.

¹⁰ “Ijip la müthehcho roh-i Ihnü nührü yang arüm müthehcho. Rothsala Ihnü nührü dhrezarüti müpsehcho ko arüh kuriti khyüjücho. Nührü lichah mesüh nührü nabong la jengjücho. Ta nührünü Ih yang müximüla.

¹¹ “Sodom ko Gomora changjücho roh-i Ihnü nührü khürü changjücho. Nührü anyingrü tsü arürüp michühnah kyo licho. Ta nührünü Ih yang müximüla” pü Abüdongba-nü yore.

¹² “Hütsüeko, Israelrüti, Ihnü nührü khingchinung. Ko Ihnü hi nguchinungeko I yukhaba mütohnung rungnüm ying!”

¹³ Azong ko nyübong külüpbong tsü Tsingrangba. Abinü alümcho nyitsarü khyang müdhesohre; Abinü anyümongnü aromang kangsohre. Limih athsenguba chah Abi rachire, Hi Abi neng: Akohbong Abüdongba Tsingrang!