AMOS 2 - AMÜSA BAIBEL (BSI)

Moab

¹ Abüdongba-nü yore, “Moabrünü thali-thali amünyi shitpahko, hütsü ngang Ihnü arüh khingchi riri. Arühnü Edom yangthsaba rüh mükhimüngu midru kang trüp-pehcho.

² Ihnü Moab lih la michang mütheh Kerioth roshengvi tahpehjünung. Rothsarütinü moh tbhang müpcho yuva la Moab-rü sünung.

³ Ihnü Moab yangthsarü ko arüh langnürüti atümung kyüsehnung.”

Juda

⁴ Abüdongba-nü yore, “Judarünü thali-thali amünyi shitpahko, hütsü ngang Ihnü arüh khingchi riri. Arühnü I adoba müthsamünyüko ko I yuzeng müyohbü. Arüh jümürünü dikehba arahkheh tsingrang tsünü arüh nümülako.

⁵ Hütsü ngang Juda michah michang mütheh Jerusalem roshengvi tahpehjünung.”

Israel Yukhacho

⁶ Abüdongba-nü yore, “Israelrünü thali-thali amünyi shitpahko, hütsü ngang Ihnü arüh khingchi riri. Arühnü thsite müsahchehrü yuje chorü, ko ailümrü, jingthri aphih khüdu amii ngang mii müsahchehrü ayurü thsa ire.

⁷ Arühnü sumüzehrü dhrümchicho ko ailüm chongcharü mükhimüchocho. Au ko atsurü anyüdingnü ayularü khüdu te mükhongre. Hütsüta I Amüsa neng münyijüre.

⁸ Mübüji müdüm müipila arühnü ailümrü te thsite ngang khyücho shü la yüpre. Arüh tsingrang amübükuh la arühnü thsite ngang khyücho yongkha yongre.

⁹ “Ta, nührü I nyitsarü khyanglangnü Cedar sing kyo athseng ko langsing kyo azi Amor-rü Ihnü riri changsohcho.

¹⁰ Ihnü Ijip lanü nührü nücheh lipilih la kang yüre khyo noro Amor-rü lih nührü khyang jücho.

¹¹ Ihnü nührü tsurü yola khürü azikehrü ko khürü Nazirit thsanung throchehcho. Hi arahkheh mah-o, Israelrü? Ih Abüdongba-nü choko.

¹² Ta nührünü Nazirit khyang yongkha tiko ko azikehrüti te I yusi mühinung yuzeng jüko.

¹³ Ade Ihnü nührü alih la dhrümtsunung, ko khe hiba misünü khongcho kyo nührünü khongnung.

¹⁴ Adsayarü mii mütsichehnung; athrungrü re müzehpehnung, ko rothsarütinü arühbürü akang mii mükhümchochehnung.

¹⁵ Singthsalu birünü müyachehnung, adsayarünü mütsichehnung, ko kuri chah pümrünü arühbürü akang mii mütsichehnung.

¹⁶ Hütsü nyümong rezeh athrungrünü mii arüh thsunohrü pehpü tsinung.” Abüdongba nü choko.