2 YANGTHSARÜTI 8 - AMÜSA BAIBEL (BSI)

Shunem-latpü Thalicho

¹ Ade Elisha-nü Shunem-latpü, sü tsurü abinü kanglisohcho abükyü te, Abüdongba-nü kang dhünyeh nengdang yangkongdhsükong müthehre, hütsüeko müdüm palang arüh kukhi wü linung yocho.

² Abükyünü abi yu nyi akukhi nüpü wü Filistia la kang dhünyeh licho.

³ Kang dhünyeh changkade, abükyünü Israel lang thali rocho ko abükyü kuh ko alih chinglinung yangthsaba yanglang wücho.

⁴ Abükyünü yangthsaba tsü Elisha kulirü Gehazi te chotachi ya ngucho; yangthsabanü Elisha-nü thsayahiya nguchiba nengdang chota licho.

⁵ Elisha-nü asücho khüdu kanglisohcho nengdang, Gehazi-nü yangthsaba te yo yade, khingkutpünü yangthsaba te abükyü dhsütah kihchicho. Gehazi-nü abi te yocho, “Adibong, Elisha-nü kanglisohba dhrezaba ko atpa nyüh tsü hila lile.”

⁶ Yangthsaba atsingdhingba lalingnü, abükyünüsü Gehazi-nü yoba tsü yuzi jücho, achotsü yangthsabanü abi adirü khüdu dsi abükyü khyang tsü abükyü yo lüpcho ko abükyü mülide kang dhünyeh chisichehcho amii jünung yocho.

Elisha ko Syria-rü Yangthsaba Benhadad

⁷ Syria-rü yangthsaba Benhadad füdhsa lide Elisha-nü Damaskas lang wücho. Khode Elisha hütsüla lilepü yangthsaba te yocho,

⁸ abinü abi pohki adirü khüdu Hazael te yocho, “Azikehba khyang tsü jiyü hijüng ko wünü abi te Ih kyangnung mükyangnung Abüdongba te tsingdhingjüngpü young.”

⁹ Achotsü Hazael-nü Damaskas lanü chürocho adhangpi ut yüre khyang zang mühehpü Elisha yanglang wücho. Khode Hazael-nü abi shirücho, abinü yocho, “Nü dikehrü yangthsaba Benhadad-nü abi kyangnung mükyangnung tsingdhingsohnung nü yanglang Ih rosohre.”

¹⁰ Elisha-nü yocho, “Abüdongba-nü abi sünungepü Ite mishako; ta wüng ko abi telü kyangnungepü young.”

¹¹ Hütsüpü Elisha-nü Hazael romih chah nahmüdri dhingcho ko hütsünü abi füdhsa kangcho. Dhrongyengnü Elisha nahshükih sho tracho.

¹² Hazael-nü yocho, “Adirü, nüh tuepü traro?” Elisha-nü yocho, “Tunüo nühnü Israelrü nyüm adrünung nguchi nguchinung Ihnü müdhele. Nühnü arüh roshengvi la michang thsürangjünung, arüh dhrezarü nyükheh atsauti kyüsehnung, arüh tsuzarüti xüpsehnung ko atsuzehrü khingkurü mibong xaphohjünung.”

¹³ Hazael-nü yocho, “Ih tu mah! Ko khütapü Ih hütsütoi tase linung.” Elisha-nü yocho, “Nüh Syria yangthsaba kangnung Abüdongba-nü Ite ngusohko.”

¹⁴ Hazael thali wüde Benhadad-nü abi te tsingdhingcho, “Elisha-nü tu yocho?” Hazael-nü yocho, “Nüh kyangnungepü abinü Ite yoko.”

¹⁵ Ta nyümong khüu Hazael-nü alangchi shü khüdu hiro hütsü kih la dhsangpü yangthsaba chah phakehjü sahmüro süsohcho. Ko Benhadad mülih Syria la Hazael yangthsaba kangcho.

Juda la Yangthsaba Jehoram

¹⁶ Israel yangthsaba Ahab tsurü Joram yangthsathsaba kang müngaula,

¹⁷ Jehoshafat tsurü Jehoram tsü kang sangrepü anyüh thsade, Juda yangthsaba kangcho ko abinü Jerusalem la kang keh yangthsathsacho.

¹⁸ Anitpü tsü Ahab tsulatpü ko Ahab kukhi kyo abinü Israelrü yangthsarü amünyi langla iiwücho.

¹⁹ Abinü Abüdongba nyüm amünyi shitpahcho, ta Abüdongba-nü Juda müchangjünyücho, tunüo Abinü David te abi trah lanü lede yangthsasohnung nyengcho licho.

²⁰ Jehoram chichah Edom-nü Juda nyüm yacho ko pathsa yanglih kangcho.

²¹ Achotsü Jehoram-nü Edomrünü arüh bete liba Zair lang tsü abi kuri akhülubati nüpü shemüsucho. Aromang tsü abi ko abi kuri akhülubati anüchiba nyüh tsü tsicheh tsicho ko abi rothsarüti palu kuh yangchi tsipitsizacho.

²² Hütsütinü Edom tsü Juda tenü pathsa yanglih kang lirocho. Hütsü bekhyah tsü Libna yangdi nüsü nyüm yacho.

²³ Jehoram-nü nguchicho lüpcho Juda yangthsarüti Yukheh la thrahyoh lile.

²⁴ Jehoram sücho ko David yangdila yangthsarü kong la dhrürangcho ko atsurü Ahazia tsü yangthsaba kangcho.

Juda la Yangthsaba Ahazia

²⁵ Israel yangthsaba Ahab tsurü Joram yangthsathsaba kang dhüre anyüula,

²⁶ Jehoram tsurü Ahazia tsü abi kang mükyüpü anyüh thsade Juda la yangthsaba kangcho ko abinü Jerusalem la kang khüdu yangthsathsacho. Atpa tsü Israel yangthsaba Omri shümtsurü ko yangthsaba Ahab tsulatpü Athalia licho.

²⁷ Ahazia tsü yangthsaba Ahab tsunyahrü thsachonü, Ahab kukhi kyo, abinü Abüdongba nyüm amünyi shitpahcho.

²⁸ Yangthsaba Ahazia-nü Syria-rü yangthsaba Hazael te khatanung nengdang yangthsaba Joram yola zehcho. Rothsarüti tsü Ramoth-Gilead la chitade khatala Joram lerohpehcho.

²⁹ Abinü abi madhsa kyangsohnung Jezrel yangdi lang thali rocho ko Ahazia-nü abi xodhingnung hütsülang wücho.