2 YANGTHSARÜTI 6 - AMÜSA BAIBEL (BSI)

Püh Ngulicho

¹ Nyümong khüdu, Elisha pohki liba azikehrütinü abi te longmüsü yocho, “Ihrü liba kuh tsü zarale!

² Hütsüeko ihrünü wü Jordan lanü sing dangro alinung kuh thsanung ihrü khyang mülajüng.” Elisha-nü yocho, “Wüng.”

³ Arüh yola nyüh khüdunü abisü arüh yola wünung kihchicho, ko abinü nyengchocho

⁴ ko hütsüta arühnü müjang shemüsucho. Arühnü Jordan chihpü nguchimüsucho.

⁵ Nyüh khüdu sing reyade, abi püh xahcheh kih la longyoh tsicho. Abinü Elisha te züde yocho, “Adirü, Ih khütanung? Hütsü müshu hirochobae!”

⁶ Elisha-nü tsingdhingcho, “Khüde longyohcho?” Nyitsarüba tsünü alongyohcho müdüm tsü ngusohcho ko Elisha-nü ja khüdu dang ro kih la tsü tsayohchücho ko püh tsü tbhengcheh chürosohcho.

⁷ Abinü yocho, “Hütsü khyüchehng” ko nyitsarüba tsünü mükhuyoh hütsü throchehcho.

Syria-rü Kohcho

⁸ Syria yangthsabanü Israelrü te mongchiicho. Abinü abi pohki thsazirüti te kihta abi müdongnung müdüm khüdu throchehcho.

⁹ Ta Elisha-nü Israel yangthsaba te hütsüba müdüm amünyethsa müwünung yu jücho, tunüo hütsüla Syria-rünü thseh pümcho.

¹⁰ Achotsü yangthsabanü hütsüla lirü te müzahsohcho ko arühnü müzahmüki licho. Hütsüta adrongpi tikehcho.

¹¹ Hütsü khu Syria yangthsaba dee wahcho; abinü abi pohki thsazirüti dsi arüh te tsingdhingcho, “Nührü yola süba Israel yangthsaba lahpi zehro?”

¹² Nyüh khüdunü lalingcho, “Nüh adibong, süsü müzeh. Ta azikehrü Elisha-nü Israel yangthsaba te nühnü yoba tsü ko nü yüpji la liba nengdang mii yore.”

¹³ Yangthsabanü yuzengjo yocho, “Abi khüde lirünang müdheing, Ihnü abi rangnung.”

¹⁴ Khode abi te Elisha Dothan la lilepü yocho, abinü hütsülang rothsarü mülung amülah kuri ko kuri akhüluba nüpü wüsohcho. Arühnü yangdi tsü amala chihcho ko hütsü beticho.

¹⁵ Nyangnyü khüu mütoh Elisha kuliba dongkhu chüdude, yangdi tsü rothsarünü ko kuri akhüluba nüpü mükangtipü ngucho. Abinü thali wü Elisha te yocho, “Adirü, Ihsa changko! Ihsanü tu nguchinung?”

¹⁶ Elisha-nü yocho, “Tüdrü. Arüh te zehrü tenü Ihsa te zehrü adronguba lile.”

¹⁷ Hütsüpü abinü dangkhidangnangcho, “O Abüdongba, anah khangthrujüng ko abi khyang ngusohng.” Abüdongba-nü abi dangkhidangnang lalingcho ko Elisha kulibanü kehchü dhingde, azonglang tsü Elisha mükang kuri ko michang akhülubanü lüptpah ya ngucho.

¹⁸ Khode Syria-rünü mahcho, Elisha-nü dangkhidangnangcho, “O Abüdongba, hiri nyitsarü nahtohsohng.” Abüdongba-nü abi dangkhidangnang laling arüh nahtohsohcho.

¹⁹ Hütsüpü Elisha-nü wü arüh te yocho, “Nührü lang thrümehko; nührünü yangchiba tsü yangdi hi mah. I khanglang iirung ko nührünü yangchiba nyitsarü yanglang Ihnü nührü nowünung.” Ko abinü arüh Samaria lang nowücho.

²⁰ Arüh yangdila tsü züduyeng, Elisha-nü dangkhidangnangcho, “O Abüdongba, arüh nah khangthrujüng ko arüh khyang ngusohng.” Abüdongba-nü abi dangkhidangnang laling arüh khyang ngusohcho ko arüh Samaria longla licho arühnü müdhecho.

²¹ Khode Israel yangthsabanü Syria-rü tsü ngucho, abinü Elisha te tsingdhingcho, “Ihnü arüh kyüseh o? Adirü. Ihnü arüh kyüseh o?”

²² Abinü yocho, “Doh. Nühnü khatala rangcho rothsarüti mii tükyüseh. Arüh khyang tüptieng ko arüh yangthsaba yanglang thali wüsohng.”

²³ Achotsü Israel yangthsabanü arüh khyang thsüti arangcheh külüpjücho; ko arühnü tsuyongpü khanglang, Syria yangthsaba yang thali müthehcho. Hütsütinü Syria-rünü Israel lih mümahpehcho.

Samaria Khyücho

²⁴ Azachah lipü khanglang, Syria yangthsaba Benhadad-nü abi rothsarü apüm Israel nyüm nüpü Samaria yangdi beticho.

²⁵ Betiba tsü nyahlirachonü yangdila tsü tsuyongba kingkapehcho, ko gadu thah khüdu ngang taripi qure ko kuh-mümüdhrü chüh gram 200 ngang taripi shekel münganü icho.

²⁶ Israel yangthsaba yangdi tbüchah tsehchi rachide khingkurü khüdunü züde yocho, “Ih troung, Adibong!”

²⁷ Abinü yocho, “Abüdongba apunü nüh mütrokhang, Ihnü tunü tronung. Ih litoh mahkhang yongkha lirü do?

²⁸ Nüh tunü dhsangthsiro?” Abükyünü lalingcho, “Nyümao khingkutpü hinü chünye nü tsurü tsunung, ko atu I tsurü tsunung pü yocho.

²⁹ Achotsü ihrünü I tsurü chong tsucho. Nyümong khüu tsü abükyü tsurü tsü tsunung pü yode, abükyünü atsurü rangpehcho!”

³⁰ Hi yuchide yangthsabanü anyemüyangchonü ajengki rehnahcho, ko tbü shündhün lirünü abi fükhüm pohki müyahshü müpi ngucho.

³¹ Abinü yocho, “Chünye mümade Elisha ku müdengkhang Tsingrangba-nü Ih süsohng.”

³² Ko abinü Elisha rangnung müthehcho. Hütsütade, Elisha tsü apu kuh la abi xodhingrü azirü khürü te pümcho. Yangthsaba yuhirü müchiedenü, Elisha-nü azirüti te yocho, “Hütsüba amüpsehbong tsünü Ih kyüsehnung khürü rosohle. Khode hi chihnang, kukhang tsü khangtieng ko abi tüzürosoh. Yangthsaba apu tsü abi khangte ronung.”

³³ Abinü hütsü chokayeng, yangthsaba ro chihcho ko abi te yocho, “Ihsa chah dhsangthsi hirojüba hi Abüdongba apunüe. Tuepü abi khyang tunang nguchisohnung yingnung?”