2 YANGTHSARÜTI 4 - AMÜSA BAIBEL (BSI)

Elisha-nü chomilarü Khüdu Trocho

¹ Azikehrü mülung la nyüh khüdu nitpü, chomilarü khüdunü ro Elisha te yocho, “Adirü, I nii süko. Abi Tsingrangba drüba nyitsarü khüdu thsacho nühnü müdhele, ta ade I niinü thsite teerü nyüh khüdunü ro thsite ngang I tsurü anyüh hi ayurüthsa khyünungere.”

² Abinü tsingdhingcho, “Ihnü nü khyang tu nguchisohnyüro? Nü kuh la tu liro Ite young.” Abükyünü yocho, “Tuji füh khüdu chah khu apa tusü mühle.”

³ Elisha-nü yocho, “Wüng ko nü kurümrü kuh lanü füh adeng adrong chingbülung.”

⁴ “Hütsüpü nü tsurüti nührü kuh la tsü züdung, kuh khangtieng ko fühtila tsü tuji tungyohmüsung. Ajengchoti tsü pathsa khyo yohpüng.”

⁵ Achotsü khingkutpünü atsurüti nüpü kuh la züducho, kuh khangtipü tuji füh azikyah tsü khyo atsurütinü hongsüm fühti tsü hirode abükyünü tuji tsü tungyohcho.

⁶ Arühnü arüh füh apüm jengkhang tungyohcho, adesü füh adeng mülio pü tsingdhingcho. Atsu nyüh yola khüdunü yocho, “Hütsü achangkae.” Ko hütsüta tuji tsü müdrikacho.

⁷ Abükyünü azikehrü Elisha yanglang thali wücho ko abinü abükyü te yocho, “Tuji tsü ieng ko thsite tsü sahng ko nüh ko nü tsurü akang linungthsa thsi kükyo nyingnung.”

Elisha ko Shunem-latpü

⁸ Nyümong khüdu Elisha-nü alilarü khüdu liba Shunem lang wücho. Abükyünü abi yangtsunung dsiyohcho ko hütsütinü abi Shunem lang wü müipi abinü arüh kuh la tsuyong licho.

⁹ Abükyünü anii te yocho, “Hiba nyitsarü hi Amüsa nyitsarüepü Ihnü longi müdhele.

¹⁰ Ihjünü kumunglang chongsah khüdu thsapü chongnong khüdu, tsingthsang khüdu ko dsi khüdu yohpüjonung ko khodederü abi ronang abi hütsüla yüpsohnung.”

¹¹ Nyümong khüdu Elisha Shunem lang thali rocho ko abi müdongjilang kyahshangnung wücho.

¹² Abinü abi kulirü Gehazi te wü khingkutpü tsü dsinung yocho. Khode abükyü rocho,

¹³ abinü Gehazi te yocho, “Abükyünü Ihsa nengdang hitoi dhsangthsi khyücho mülih Ihnü abükyü nengdang tu nguchisohnyüro abükyü te tsingdhing. Ihnü wü yangthsaba mahkhang rothsarü anüchiba te abükyü nengdang yu atsa khürü yosohnyünungsü kohle.” Abükyünü lalingcho, “Ih I müyurü yola I dhsütah apüm kükyo lile.”

¹⁴ Elisha-nü Gehazi te yocho, “Khang Ihnü abükyü nengdang tu nguchinung?” Abinü lalingcho, “Abükyü atsurü mühle ko anii shiko.”

¹⁵ Elisha-nü yocho, “Abükyü hila rosohng.” Abükyünü rocho ko trahtri yingte yacho,

¹⁶ ko Elisha-nü abükyü te yocho, “Sekang hitade nühnü nü kheh la akhunga khüdu wüpnung.” Abükyünü yocho, “O adirü, yanglilüm Ite arahkheh tücho. Nüh Tsingrangba nyitsarü lile.”

¹⁷ Ko Elisha-nü yocho kyo, kang khüu hütsüba bekhyahla abükyünü adhrerü khüdu nümüsucho.

¹⁸ Kang azachah lipü, maxa bekhyah, nyangnyü khüdu azaba tsü maxarü te liba au tronung wücho.

¹⁹ Dhrongyengnü abinü au te yocho, “I thah, I thah!” Aunü kulirü khüdu te azaba tsü atpa yang wüp hiwüngpü yocho.

²⁰ Kuliba tsünü azaba tsü atpa yang wüp hiwücho ko atpanü nyüthung chii wüp pümpü azaba tsü sücho.

²¹ Abükyünü Elisha yüpjilang wüp hi küdu yüpji chah tsü yüpsohpücho ko kuh khangtipü tsicho.

²² Hütsüpü anii te yocho, “Kulirü khüdu gadu nüpü hila rosohng. Ih Elisha azikehrü yanglang wünung dhsütahle. Ih zah thalinung.”

²³ Aniinü yocho, “Nüh tuepü chünye wünung? Hi Sabath nyümongsü mah mahkhang choo asi Thsütisü mah!” Abükyünü yocho, “Tu müthsa.”

²⁴ Hütsüpü gadu chah tsü pümji yohsohcho ko kuliba te tsü yocho, “Gadu tsü akohchonü shangsohng ko Ihnü müyode tünyehlisoh.”

²⁵ Hütsüta abükyünü Elisha liba Karmel zonglang wücho. Abükyü ashula tsehdenü Elisha-nü abükyü ngucho ko akuliba Gehazi te yocho, “Dhing, Shunem latpü tsehle.

²⁶ Abi yang shang ko abükyü, anii ko atsudhre arüh apüm tsa mülinang tsingdhing.” Abükyünü Gehazi te lüpcho tsa lilepü yocho,

²⁷ ta khode Elisha chii rocho, abükyünü mükhukeh ajingchah ramehcho. Gehazi-nü abükyü dümpehnung thsacho, ta Elisha-nü yocho, “Hita pehjüng. Abükyü hitoi longricho nühnü müngurü mah-o? Ko Abüdongba-nü hi nengdang Ite tu müyo.”

²⁸ Khingkutpü tsünü abi te yocho, “Adirü, Ihnü azarü chingcho mah-o? Ihnü I khyang alongdi tu tüjü pü nüte müyocho mah-o?”

²⁹ Elisha-nü Gehazi lahpi ximüla abi te yocho, “Dhsüdhsang! Ija bieng ko wüng. Ashirürü te chotanung tünyehli mahkhang tülaling. Kulang du tsü müchong khüti wüng ko azaba chah tsü Ija tsü yohpüng.”

³⁰ Khingkutpü tsünü Elisha te yocho, “Ihnü nüh müpehjünung Abüdongba ko nüte yuchümre.” Achotsü anyünü shemüsu wücho.

³¹ Gehazi-nü akhu tsehleh wü akhungachah ja tsü yohpücho, ta asah müchichi mahkhang akang licho amüdhethsa tu mühle. Achotsü abinü thali Elisha mütohnung wücho ko yocho, “Azaba tsü müjesu.”

³² Khode Elisha rochihcho, abinü ayüpjilang tsü amüleng züducho ko azaba tsü chongnong chah süpü jo ngucho.

³³ Abinü kukhang khangticho ko Abüdongba te dangkhidangnangcho.

³⁴ Hütsüpü abinü azaba chah tsü abe, nahtse ko akheh hüpkehtacho. Abinü azaba chah tsü müyungchü hüpkehde, azaba fü tsü langchi kangcho.

³⁵ Elisha-nü shemüsucho, chongsahla tsü tsehchi rachicho ko thali wü azaba chah tsü hüpkehcho. Hütsüde azaba tsü dhünyehpili hahthicho ko anah khangthrucho.

³⁶ Elisha-nü Gehazi dsicho ko azaba atpa dsinung yocho. Khode abükyü zürocho, abinü abükyü te yocho, “Nü tsurü hila lile.”

³⁷ Abükyünü Elisha jingchah mükhukehcho; hütsüpü atsurü tsü nüpü tsicho.

Thsayahiya Apa Anyüh

³⁸ Khüdupi, limih apümlang yangkong lide, Elisha-nü Gilgal lang thali rocho. Abinü azikehrü mülungo te dode, abi kuliba te taachah tsü füh amülah kehpü arüh khyang tsenyijünung yocho.

³⁹ Arüh yola nyüh khüdu rangmülang himütrung yangnung wücho. Ko abinü rangmü shünga ngu abinü adrong lalungcho, ko hütsü tunang mütsüp-pü mülecho.

⁴⁰ Arüh khyang tsenyicho tsü xehyoh tüpcho, ta arühnü hütsü tsudhingde, Elisha te yocho, “Hi müyüh-e. Atsu mütsa.

⁴¹ Elisha-nü aza chingcho ko füh la tsü tungyohcho ko yocho, ‘Arüh khyang tsenyicho tsü xehyohjüng.’” Hütsükolü tu müthsacho.

⁴² Shikhe khüu, Baal Shalisha lanü nyüh khüdu rocho, abinü lüdi tsangsi lanü külüpcho hümdhse mükyü ko tsesu rehyeng khürü hiro Elisha khyang jücho. Elisha-nü abi kuliba te azikehrüti khyang tsü hütsüri tüpnung yocho,

⁴³ ta abinü yocho, “Hi nyüh thsih khüdu nengdang kükyünung ang?” Elisha-nü yocho, “Arüh khyang hütsü tüpm, tunüo arühnü hütsü tsupü adesü nyingnungepü Abüdongba-nü yore.”

⁴⁴ Achotsü kuliba tsünü tsuyongba tsü arüh khyang tüpcho ko Abüdongba-nü yocho kyo arüh apümnü tsucho ko adesü nyingcho.