2 YANGTHSARÜTI 3 - AMÜSA BAIBEL (BSI)

Israel ko Moab Kahla Rothsa

¹ Juda yangthsaba Jehoshafat yangthsathsaba kang dhürekeula, Ahab tsurü Joram tsü Israel la yangthsaba kangcho ko abinü Samaria la kang dhüreanyüh yangthsacho.

² Abinü Abüdongba nyüm amünyi shitpahcho, ta abilü au ko atpa Jezebel nyüh roh-i tsatsalü müthsacho; aunü Baal tsingrang mübünung külüpba kyothri tsü abinü müpnahpehcho.

³ Ta, Nebat tsurü yangthsaba Jeroboam kyo, abinü Israelrü amünyi shitpahsohcho ko müyaticho.

⁴ Moab yangthsaba Mesha-nü san kangcho ko kang mükhu Israel yangthsaba khyang akhüm san lakh khüdu, ko san lakh khüdu chahnü shunbüh jücho.

⁵ Ta khode Israel yangthsaba Ahab sücho, Mesha-nü Israel nyüm yacho.

⁶ Achotsü yangthsaba Joram-nü Samaria pehjücho ko abi rothsarü apüm nübülungcho.

⁷ Abinü Juda yangthsaba Jehoshafat yang yusi hi müthehcho: “Moab yangthsabanü Ih nyüm yare; abi te khatanung nühnü Ih tronung mah-o?” Yangthsaba Jehoshafat-nü lalingcho, “Ihnü tronung. Ih, I nyitsarü ko I kuriti nü tsachola bichieng.”

⁸ Ko abinü tsingdhingcho, “Ihrü khüiba lang lanü ronung?” Joram-nü lalingcho, “Edom akungaselih lahpi langnü lahkhu ashu wünung.”

⁹ Hütsüta yangthsaba Joram, Juda yangthsaba ko Edom yangthsaba arüh shemüsucho. Arühnü nyümong dhünyeh tseh rode arüh kih thümpehcho ko nyitsarü ko arüh kanglungrü nengdang kih nying mülicho.

¹⁰ Yangthsaba Joram-nü züdecho, “Ihsa kingkako! Abüdongba-nü Ihsa yangthsarü asang Moab yangthsaba kheh la jüko.”

¹¹ Yangthsaba Jehoshafat-nü tsingdhingcho, “Ihsanü Abüdongba te chotanungthsa hila azikehrü khürü mülio?” Yangthsaba Joram rothsarü anüchirü khüdunü yocho, “Shafat tsurü Elisha hila lile. Abi Elija chitung thsacho.”

¹² Yangthsaba Jehoshafat-nü yocho, “Abi yuje azikehrüe. Achotsü yangthsarü asang tsü Elisha yanglang wücho.”

¹³ Elisha-nü Israel yangthsaba te yocho, “Tuepü Ihnü nüh tronung? Nüu e nütpa nyühnü kihta liba azikehrü yanglang tsü wüng.” Joram-nü lalingcho, “Doh! Abüdongba-nü ihrü asang Moab yangthsaba kheh la jüko.”

¹⁴ Elisha-nü yocho, “Ihnü dikehba Abüdongba nengla yuchüm yore, nühjü tsungphung khüdu thsaba Juda yangthsaba Jehoshafat müthsarelang Ihnü tusü münguchinung.

¹⁵ Ade khongkihthsarü khüdu norojüng.” Khongkihthsaba tsünü abi rühti tsü mehcho, Abüdongba zii Elisha michah rocho,

¹⁶ ko abinü yocho, “Abüdongba-nü hita yore: ‘Yongkhi kungcho hila yongroh jung.

¹⁷ Nührünü tsing ko nyübong tu müngunye, hiba yongroh hi kihnü jengnung, nührü ko nührü kanglungrü yongnung kih thangchi linung.’”

¹⁸ Ko Elisha-nü mütozah yocho, “Ta Abüdongba nengdang hi amüla lile; Abinü nührü khyang Moab-rü michahsü akoh jünung.

¹⁹ Arühnü tbüticho atsah atsa yangdi tsü nührünü kohnung; arüh singsidong apüm repehjünung, arüh kihnatung apüm yatinung ko arüh asu lih apüm lungnü phetipehjünung.”

²⁰ Nyangnyü khüu tsü, anyangnyü kangmübü jüba shikhe, Edom lahpinü kih pohjüro alih apüm tingticho.

²¹ Khode Moabrünü arüh mahnung yangthsarü asang tsü rokopü yuchicho, adhrerüecho thsunohrü binung kohrü apüm ashiba chahnü achangba chii lurü la tsü dsibülungcho.

²² Nyangnyü khüu arüh surode, nyü tsü kih michah hekehcho ko hütsünü ashüh kyo moh ngucho.

²³ Arühnü züdecho, “Hi ashüh-e. Arüh arorüh mülung asang tsü yübüta kyüsehtacho thsae. Ihsanü wü arüh kohro zang khyonung.”

²⁴ Ta khode arühnü müdongji tsü chihcho, Israelrünü arüh mahcho ko arüh dseli müthehcho.

²⁵ Israelrünü Moab-rü tsü kyüseh iijowücho ko arüh yangditi thsangnyangjücho. Arühnü luh atsa lahkhu tside, Israelrü müipinü lung khüdu-khüdu tsayohchüjücho ko achangkala luh tsü lungnü bhümticho; arühnü kihnatungsü yaticho ko singsidong rebehjücho. Achangkala Kir Heres yangdiba du tsü nyingcho ko kyalu birütinü hütsü beti mahcho.

²⁶ Khode Moab yangthsabanü khata tsü abinü mükoh pü müdhecho, abi yola nohsheng birü thsih dhünyeh nüpü arorüh yolanü shungrüp Syria yangthsaba yang tsiwünung müküpcho ta amükoh ngucho.

²⁷ Achotsü abinü abi mülihnung liba atsudhre aziba tsü nüpü wü yangdi tbü te Moab tsingrang khyang kangmübü jücho. Hütsü ngu Israelrünü drücho, hütsünü arühnü yangdila tsünü shehli palu lih lang thalicho.