2 YANGTHSARÜTI 16 - AMÜSA BAIBEL (BSI)

Juda la Yangthsaba Ahaz

¹ Israel la Remalia tsurü Peka yangthsathsaba kang dhüredhünyeula,

² Jotham tsurü Ahaz tsü abi kang mükyü thsade Juda yangthsaba kangcho ko abinü Jerusalem la kang dhüredhüroh yangthsacho. Abinü abi jümürü yangthsaba David adüzü atsa mü-iicho;

³ ta Abüdongba-nü mükünyangnungthsa Israel yangthsarüti kyo licho. Israelrü rode, hütsüba lih lanü iipehrütinü bichiba yah kyo, abinü kyothri khyang apu tsurü mii trüp mübü mübücho.

⁴ Akhangchah ko singdhülüm pohki müyudsirü mübüji la tsü, Ahaz-nü kangmübü jücho ko müchiji trüpcho.

⁵ Syria yangthsaba Rezin ko Israel yangthsaba Peka nyühnü Jerusalem beti mahcho, ta Ahaz mükohcho.

⁶ (Hütsütade tsü, Edom yangthsabanü Elath yangdi khyülicho ko hütsüla lirü Judarü iipehcho. Ko Elath la tsü Edomrü licho ko ade yingcheh hütsüla arüh lile.)

⁷ Ahaz-nü Assyria yangthsaba Tiglath Pileser yang yusi hita müthehcho: “Ih nü kulirü ko nütsurü lile. Rung ko Ih mah yaba Syria ko Israelrü yangthsarüti khehlanü Ih khümchoung.”

⁸ Ahaz-nü Amübükuh ko yangthsaba kuh lanü taripi khyo yangthsaba khyang tsü jiyü müthehcho.

⁹ Tiglath Pileser-nü, Ahaz akihchiba lalingnü, arothsarü nüpü Damaskas yang shemüsucho, hütsü kohcheh khyücho ko yangthsaba Rezin kyüsehcho ko müyurü tsü Kir lang küm notsicho.

¹⁰ Khode yangthsabanü Damaskas lang yangthsaba Tiglath Pileser te shirütanung wücho, abinü hütsüla bholu tsü ngucho ko bebürü Uria yang hütsü kyo külüp-pü müthehcho.

¹¹ Achotsü Uria-nü hütsü kyo bholu khüdu külüpcho ko Ahaz thalide hütsü thümpü licho.

¹² Abi Damaskas langnü rode, Ahaz-nü bholu tsü rungnümpü li ngucho,

¹³ achotsü abinü hütsüchah kangmübü ko tsang mübü trüpcho ko hütsüchah yongkha mübü ko akehta mübülanü ashüh tsü tungkehjücho.

¹⁴ Abüdongba khyang müsachehjüba imüyengnü külüpcho bholu tsü, bholu asi ko Amübükuh nyüh kahla licho, achotsü Ahaz-nü hütsü abi bholu asi kihku lahpi lohmüicho.

¹⁵ Hütsüpü abinü Uria te yocho, “Hiba Iyo bholu arangcheh hi anyangnyü trüp mübü ko anyüzehlang tsang mübü, yangthsaba ko müyurü trüp mübü ko tsang mübü ko yongkha mübü nengdang bichieng. Kangmübü jücho ashüh apüm hütsüchah tungkehng. Ta imüyeng bholu tsülü Ih müchehmüloh nengdang yohpüjüng.”

¹⁶ Uria-nü yangthsabanü yocho kyo nguchicho.

¹⁷ Yangthsaba Ahaz-nü Amübükuh la bichiba imüyengnü külüpcho tsingthsang michah liba mütpah-tbhü tsü khyükhucho; ko abinü imüyeng misüpung dhüreanyüh khang chah imüyeng kihbong tsünü khyücho lung khüdu chah müdongpücho.

¹⁸ Ko Assyria yangthsaba künyangsohnung, Ahaz-nü yangthsaba pümji tsü amübükuh lanü khyükhucho ko yangthsaba züduba trahtri tsüsü khangticho.

¹⁹ Yangthsaba Ahaz-nü nguchicho lüpcho Juda yangthsarü Yukheh la thrah lile.

²⁰ Ahaz sücho ko David yangdila yangthsarü kong la dhrürangcho ko atsurü Hezekia tsü abi mülih yangthsaba kangcho.