2 TIMOTI 4 - AMÜSA BAIBEL (BSI)

¹ Tsingrangba ko Jisu Khrista sünü akang lirü ko asürü yukhanung, ko abi yangthsathsanung ronung liro abi jingte, Ihnü nüte

² Yuse tsü thsingyung, hütsü sobhoba tsü müzahpü (bekhyah atsa lanye amütsa lanye), nühnü rangchonü dode, arüh kihchonung, yübünung ko rezehsohnung Ihnü nüte thsüchire.

³ Nyitsarünü yuje athonguba tsü mühnyinung, arühnü palu mükhyahba du iiwünung, ko arühnü dee nyinyüba yosohnung nengdang adorüti alaa alaa nübülungnung bekhyah role.

⁴ Arühnü yuje lanü ximüla jümü yula du müci jünung.

⁵ Ta suro apüm la jangjang rahseh lieng; chongcha rangchoung, Yuse atsa thsingyuba nguchi nguching, ko nü nguchi apüm la Tsingrangba dikehrü khüdu kyo nguching.

⁶ Ko I nengdanglü, akang mübü jünung becho chipehko; hiba akang tenü zanung bekhyah chihko.

⁷ Ihnü khata atsa khatako, Ihnü chidüm chii shangko, ko Ihnü yudsi tsü yohpüko.

⁸ Ade tinü I nengdang amüsaba kuthri khüi Abüdongba yuje yukhabanü hütsü nyümongla I khyang jiyünung liro, hütsü yohpüjüle; ko I khyang du mah, ta sürünü abi ronung longphinü yingro, arüh atümung khyang hütsü jiyünung.

Arangyu

⁹ I yanglang zah ronung müküpm.

¹⁰ Tunüo Demaslü hiba limih mükhyahlangnü Ih pehjüpü Tesalonika lang tsipehko; Krecens Galatia lang, ko Titas Dalmatia lang wüko.

¹¹ Luk du I yola lile. Mrk yangchi nü yola norung, tunüo nguchi la abinü Ih trochehnung.

¹² Ihnü Tychicus Efesia lang müthehko.

¹³ Nüh rode Troas la Karpus kheh la pehjüba I pümkhüm ko vakhati alathsa Thrahlohchosü hirung.

¹⁴ Alexander, ikengbongnü Ih khütang lerohpehjüko, abi nguchi aichi Abüdongba-nü jiyünung.

¹⁵ Abi nengdang nühsü müzahng, tunüo abinü Ihsa yusi hi khütang nyümre.

¹⁶ Ih akhudiba Ipu alanglang nengdang yade, sünüsü Ih mütro, atümungnü Ih pehjücho. Tsingrangba-nü arüh nyüm tükhikehjütü!

¹⁷ Ta yangpirü atümungnü yuchinung yusi ajeng tsü sobhonung nengdang Abüdongba-nü tro I khyang re jücho; ko Ih asünung lanü khümchocho.

¹⁸ Ko Abüdongba-nü amünyi apüm lanü khümchonü Ih ninglang yanglih lang nowünung. Abi te ahechi lede achangka müli thsaang! Amen.

Aza Yu

¹⁹ Priscila ko Aquila ko Onesiforus kukhi te salüm müdhesohng.

²⁰ Erastus Korint la nyehlicho, ko Trofimus Miletus la füdhsa pehjücho.

²¹ Mütsingkange ronung müküpm. Eubulus, Pudens, Linus, ko Klaudia-rünü ko aparü khristan jünirü atümungnü salüm müdhesohre.

²² Abüdongba nüte lieng. Tsingrangba achomang nührü atümung te lieng.