2 TIMOTI 2 - AMÜSA BAIBEL (BSI)

Yochonyiba Jisu Rothsarü

¹ Itso, nühlü Khrista Jisu achomang la rezeh lieng.

² Yuzi adrong yola Ihnü sobhocho nühnü yuchiba adoba tsü khyüchoung ko aparü tesü dochehba, longlangchehba khürü chah nyümkehjüng.

³ Ayochonyiba Khrista Jisu rothsarü khüdu kyo, chongcha la nohlüm khyüng.

⁴ Rothsarünü nguchi la lide abi michah anüchirü künyangsohnung müküpre ko aparü yola mümükhongre.

⁵ Shajarü khüdu sünü shangmülitaro, abinü yuzeng tsü mühnyidelü akoh ngunung mükoh.

⁶ Luthsarü sünü müküp yuthsahcho abinü akhu maxare.

⁷ Ihnü tu yoro hütsü lümdhing, tunüo Abüdongba-nü nü khyang apüm nyichehsohnung.

⁸ Ihnü Yuse Atsa thsingyude docho kyo, David chahnü trahchocho ko asü lanü kangliba Jisu Khrista lümchehng.

⁹ Yuse Atsa thsingyucho ngang, Ih fükhohrü kyo jingkheh rah chongchare. Ta Tsingrangba yulü rah mühle,

¹⁰ ko müchangkaba ahechi Jisu Khrista khu hiroba akangcheh tsü Tsingrangba throchehcho nyitsarü khyang ngusohnyülangnü Ihnü lüpcho rangchore.

¹¹ Hiba yu hi yuje: “Ihsa abi te sükhang, Ihsa abi te akang linung.

¹² Ihsanü mütozah rangchokhang, Ihsa abi te yangthsanung. Ihsanü abi müchechokhang, abinüsü Ihsa müchechonung.

¹³ Ihsanü yuje müchonye, abilü yuje cho linung, tunüo abinü apu te rahkhehnung mükoh.”

Mülacho Anguchirü

¹⁴ Nü nyitsarü te hi kepüng ko yu nengdang yubejarong mülinung Tsingrangba nengla arüh te amüzahnung yu young. Hütsünü tu müjingchore, ta ayuchirü du thsangnyangjüre.

¹⁵ Shah mülipü anguchirü khüdu kang, yuje yu tsü doung. Tsingrangba jingte khyüchochehnungthsa nühnü atsauba nguching.

¹⁶ Amümüsa ko amükhyu yu khüinü nyitsarü Tsingrangba tenü alaa za tsisohro, hütsüri lanü za lieng.

¹⁷ Hitari adoba tsü shutsa tsukhangba madhsa roh-i lile. Hitari doba nyüh anyüh tsü Hemenaes ko Filetus lile.

¹⁸ Arühnü yuje pehjüpü yudsirü te Ihsa kangliroba tsü tikehpehkopü yo yudsi thsangnyangjüre.

¹⁹ Ta Tsingrangba-nü drengdreng khyümba tsü lülohnung mükoh; hütsü chah yu hiri thrahkeh lile: “Abüdongba-nü abi yo müdhele” ko sürünü abi Abüdongba yoepü lümro, abinü amüthsalang lanü ximülaang.

²⁰ Kuh amülah khüdula tbhü lang papa lire: khürü taripi ko khürü hon, khürü sing ko lishe; khürü pathsa dhsütah la, ko khürü masü la bichinung külüpcho lile.

²¹ Hütsünü khürünü abürü jangjang amünyi hütsüri lanü müsacheh likhang, abi tsü pathsa dhsütah la bichinung, tunüo abi tsü Abüdongba dhsütah la ko nguchi atsa apüm la bichinung müsachehcho.

²² Kunu mükhyahmürah lanü za lieng, ko lasih amüsa la Abüdongba tronung dsirü yola amüsaba, yudsi, amüi ko atbachi yangching.

²³ Ta amüsithsa ko amükhyu yu rehtaba lanü za lieng; tunüo hütsü yübüta dunü changkare.

²⁴ Abüdongba dikehrülü müyübütabae. Atümung te amüi, atsa ko arangcho adorü,

²⁵ abi nyümrü longlümnü müchongchijüng, tunüo Tsingrangba-nü arüh lasih thsamülasohnü yuje tsü müdhe ronung kohle.

²⁶ Hütsüde, arühnü lümchehnung ko motsing sünü arüh rang abi yocho nyisohcho, abi uzathsa lanü tsiphunung.