2 TIMOTI 1 - AMÜSA BAIBEL (BSI)

¹ Tsingrangba lümchonü, Jisu Khrista la anyengchocho akang tsü sobhonung nengdang, Khrista Jisu riwürü Paul chahnü—

² Ih amüiba tsurü, Timoti yanglang: Au Tsingrang ko Ihsa Abüdongba Jisu Khrista chahnü achomang, yanglilüm ko atbachi thsaang.

Nengsejüba ko Rezehsohba

³ I jümürüti roh-i, lümlong amüsanü Ihnü dikehba Tsingrangba khyang nengse jüre. Ihnü ama tsingse I dangkhidangnangla nüh lümchehde abi nengsere.

⁴ Nü nahshükih lümcheh, Ih akünyangnü jengnung nengdang, nüh shirünung khütang nahmürahre.

⁵ Nüjü Lois ko nü tpa Eunice nyüh chah liba yudsi roh-i nüh yuje yudsi lümchehde, nü chahsü hütsü roh-i lilepü longdire.

⁶ Hütsünü Ihnü I kheh nü chah nyümkehde Tsingrangba-nü jüba jiyü tsü trusohnung Ihnü nüte lümkehsohre.

⁷ Tunüo Tsingrangba-nü Ihsa khyang aring-adrü anbü mah, ta abi anbü tsünü zii, amüi ko arahsehba jüre.

⁸ Hütsüeko Ihsa Abüdongba nengdang thsanye, mahkhang Khrista khyanglangnü arangyoh la liba I nengdang thsanye, yuzithsanung nührünü tüshah. Ta, Tsingrangba-nü nü khyang tase jücho roh-i Yuse nengdang chongchanungla nühnü nohlüm khyüng.

⁹ Ihsa nguchi ngang mah, ta apu lümcho ko achomangnü abinü Ihsa khümchocho, ko apu nyitsarü kangnung dsicho. Abinü achomang hi Jisu Khrista khu papadenü Ihsa khyang jücho,

¹⁰ ta ade Ihsa Kangchehjüba Jisu Khrista rocho khu Ihsa te hütsü misha lile. Abinü asüba zii tsü changsohko ko Yuse khu amüsüba akang tsü mishajüko.

¹¹ Yuse Atsa sobhonung nengdang Tsingrangba-nü Ih riwürü khüdu ko adorü khüdu kang throcheh lile,

¹² ko hi nengdang Ih hita chongchare. Ta Ihnü müshahre, tunüo Ihnü sü chah yudsiro abi müdhele, ko abinü I khyang tu nyümkehjücho hütsü abi royingcheh abinü nyahnungepü Ihnü tsüple.

¹³ Nührü te adüzü thsasohnung Ihnü thsingyuba yuje yula tsü drengdreng lieng, ko Jisu Khrista la Ihsa yudsi ko amüila mütozah lieng.

¹⁴ Ihsa chah liba Anbü Amüsa khu, nü chah nyümkehjüba yuje tsü tsahtsa yohpüng.

¹⁵ Asia la lirü atümung, Fijelus ko Hermojenes zehnü Ih pehjücho nühnü müdhele.

¹⁶ Onesiforus kukhi te Abüdongba-nü yanglilüm ngung, tunüo abinü adrongpi Ih kyahshangsohko. Ih ixilih la licho nengdang abinü tu müshah,

¹⁷ ta abinü ro Rom chihyeng, Ih müngude Ih yangchimüsucho.

¹⁸ Hütsü nyümongla Abüdongba-nü abi te yanglilüm ngung! Ko Efesia la abinü I nengdang khütoi nguchicho nühnü longi müdhele.