2 SAMUEL 9 - AMÜSA BAIBEL (BSI)

David ko Mefibosheth

¹ Nyümong khüdu David-nü tsingdhingcho, “Saul kukhi lanü khürü nying mülio? Khürü likhang, Ihnü Jonathan khyanglangnü amüi ngusohnyüre.”

² Saul-rü kulirü nyüh khüdu anengnü Ziba licho, ko abi David yanglang norocho. Yangthsabanü tsingdhingcho, “Nüh Ziba mah-o? “Adirü, nü dikehrü hila lile.”

³ Yangthsabanü abi te tsingdhingcho, “Ihnü nyengchocho kyo, Tsingrangbarü amüi ngusohnungthsa, Saul kukhi lanü khürü dusü nying mülio?” Ziba-nü lalingcho, “Jonathan tsurü khüdu nying lile. Abi jahloh-hilohle.”

⁴ Yangthsabanü tsingdhingcho, “Abi khüde liro?” Ziba-nü yocho, “Lodebar la Amiel tsurü Makhir kuh la lile.”

⁵ Achotsü yangthsaba David-nü abi nünung müthehcho.

⁶ Khode Saul shümtsurü ko Jonathan tsurü Mefibosheth tsü ro chihcho, abinü David jingte jengrengjo mükhukehcho ko David-nü yocho, “Mefibosheth” ko abinü lalingcho, “Adirü, nü dikehrü hila lile.”

⁷ David-nü yocho, “Tüdrü. Nüu Jonathan khyanglangnü Ihnü nüte tsanung. Ihnü nümü Saul yo alih apüm thali nü khyang jünung ko nüh lede I tsingthsang chah tsunung.”

⁸ Mefibosheth-nü thali mükhukeh yocho, “Adirü, Ih füza asücho khüdu tenü tu atsauba mah. Tuepü nühnü Ite hitoi tsanung?”

⁹ Hütsüpü yangthsabanü Saul kuliba Ziba dsi yocho, “Ihnü Mefibosheth nü büdongba khyang, Saul ko abi kukhi yo lüpcho thali jüre.

¹⁰ Nüh, nü tsurüti ko nü kulirütinü nü büdongba Saul kukhirü nengdang luh thsanung ko maxa arüh kangnung. Ta Mefibosheth apulü lede I tsingthsang chah I shirü thsanung.” (Ziba tsurü dhüremünga ko kulirü mükyü licho.)

¹¹ Ziba-nü lalingcho, “Nüh Adibongnü yocho lüpcho Ihnü nguchinung.” Hütsüta Mefibosheth tsü yangthsaba tsurü khüdu kang abi tsingthsang chah tsuyongcho.

¹² Mefibosheth tsurü dhrezarü khüdu anengnü Maika licho. Ziba kukhirü atümung Mefibosheth kulirü kangcho.

¹³ Hütsüta ajing anyüdinglang jahba Mefibosheth tsü Jerusalem la licho, ko lede yangthsaba tsingthsang chah tsuyong licho.