2 SAMUEL 6 - AMÜSA BAIBEL (BSI)

Yuzeng Singdi Jerusalem la Hirocho

¹ Anyüpiu David-nü Israel la athrochehcho rothsarüti nyüh hajar sangre dsibülungcho,

² ko Juda lang Akohba Abüdongba neng thrahkeh liba ko Cherufim michah pümba Tsingrangba Yuzeng Singdi hironung Baalah lang wücho.

³ Arühnü hütsü azongchah Abinadab kuh lanü khyo misü akhüluba asi khüdu chah yohcho.

⁴ Ko Abinadab tsurü Uzza ko Ahio nyühnü misü akhüluba tsü nyahnü Ahio akhupü shemüsucho.

⁵ David ko Israelrü atümungnü arüh tase apümnü nyiichi ko khithsa Abüdongba dhichicho. Arühnü tbenglah, honglilah, tbhang, amüpchiba ko dhingza bi thsacho.

⁶ Arüh Nakon pungkhyang chii rode, misüpung tsü ajing dhrüphehcho ko Uzza-nü nyümpheh wü Yuzeng Singdi chah thahpücho.

⁷ Hütsüdenü Uzza te Abüdongba zichürocho ko jengreng müjücho ngang abi hütsüla kyüsehcho.

⁸ Hütsüla Yuzeng Singdi müshüm Uzza tsü sücho, hütsütinü hütsüba müdüm te Peraz Uzza dsicho. Abüdongba-nü azii chüro Uzza khingchichonü David rihlong chürocho.

⁹ Hütsüde David-nü Abüdongba drünü yocho, “Ihnü ade Yuzeng Singdi khüta hiwünung?”

¹⁰ Achotsü abinü hütsü Jerusalem lang mühiwünung dhrongchehcho; ko apalang abinü Gath yangdila lirü Obed kulang hiwücho.

¹¹ Hütsüla choo asang licho ko Abüdongba-nü Obed Edom ko abi kukhi müwajücho.

¹² Yuzeng Singdi yohpüchonü Abüdongba-nü Obed Edom kukhi ko abi licho apüm müwajücho David-nü yuchi, abinü Yuzeng Singdi tsü Obed kuh lanü khyücheh Jerusalem lang thsüti arangcheh khyo hizüducho.

¹³ Yuzeng Singdi dhirü tsü mütrah dhüroh tsipü khanglang, David-nü Abüdongba khyang misüpung khüdu amübü jünung arüh zahsohcho.

¹⁴ David-nü shü anana khüdu dunü akih rümpü tase apümnü Abüdongba dhichi nyiichicho.

¹⁵ Hütsüta abi ko Israelrü apümnü Jerusalem lang Yuzeng Singdi tsü bipü akünyangnü züde ko tbhang tinü hizüducho.

¹⁶ Singdi tsü yangdila hizüro yade, Saul tsulatpü Maikal-nü nyübongkhilanü chehchü dhingde yangthsaba David tsü Abüdongba te tsohchi ko nyiichi nguchonü abükyü lasih la wahseh lümcho.

¹⁷ Arühnü Singdi tsü hirocho ko David-nü thsaba Shükuh la ayohpüjila tsü yohpücho. Hütsüpü abinü Abüdongba khyang kangmübü ko akehta mübü jücho.

¹⁸ Khode abinü kangmübü jüba tsü thümcho, abinü Akohba Abüdongba nengla müyurü müwajücho,

¹⁹ ko arüh apüm khyang tsuyongnung jücho. Abinü Israel la khingkurü adhrerü müipi khyang hümdhse khüdu, shuh aruhcho adsi khüdu ko shükusih kungcho jücho. Hütsüpü arüh atümung kulang tsisohcho.

²⁰ Hütsüpü khanglang, David-nü abi kukhirü shirünung wücho. Maikal-nü abi mütohnung chürocho ko abükyünü yocho, “Chünye Israel yangthsaba apu jangjang aneng küdusohko. Abinü abi pohki adirüti ko kulilarüti bete adohrü roh-i misha ngusohko!”

²¹ David-nü lalingcho, “Ih Abüdongba sünü nüu ko abi kukhi mülih Israelrü michah langnünung throchehcho, abi hechinung nengdang nyiichicho.

²² Ko Ihnü Abüdongba dhichinung mütozah nyiichinung ko Ipu alaa ashah khyüsohnung. Nühnü Ih tu mahrü roh-i lümnung, ta khingkurü hütsürinü Ih dee khichinung!”

²³ Ko Saul tsulatpü Maikal tsü asü yingcheh azarü mülipehcho.