2 SAMUEL 5 - AMÜSA BAIBEL (BSI)

Israel ko Juda la David Yangthsaba Kangcho

¹ Hütsüde Israel hung apümnü Hebron la David te yocho, “Ihrü nüpu shuh ko shüh lile.

² Atsichola, Saul yangthsaba lide mii, nühnü Israelrü khatalang nowücho, ko Abüdongba-nü nühnü müyurü nünung ko arüh yangthsarü kangnung nyengchocho.”

³ Hütsüta Israel zirü atümung David yang Hebron la rocho. Ko abinü arüh te anyengchotaba külüpcho ko arühnü abi müyühjü throcheh abi Israel la yangthsaba kangsohcho.

⁴ David yangthsaba kangde abi kang sangre azirü thsacho ko abinü kang yüre yangthsa thsacho.

⁵ Abinü Juda michah Hebron la kang dhünyehpü achangsho ko Jerusalem la Israel ko Juda apüm michah kang sangrepü asang yangthsa thsacho.

⁶ Yangthsaba David ko abi nyitsarütinü Jerusalem mahnung shikhe khüdu rocho. Hütsüla lirü Jebus-rünü, David-nü yangdi tsü mükohnung lüm arühnü abi te yocho, “Khodesü nühnü hila müzürochehnung; anahtohrü ko jahloh-hilohrünü mii nüh iipehnung.”

⁷ (Ta David-nü Zion roshengvi kohcheh, hütsü “David Yangdi” pü dsicho.)

⁸ Hütsü nyümong David-nü anyitsarü te yocho, “Ihnü thrünyicho toi Jebus-rü thrünyirü hila khürü mühlio? Arüh kyüsehxah mühlio? Khang Kihrüla tsünü chüdu nahtohrü ko jahloh-hilohrü tsü kyüsehng.” (Hütsünü, “Anahtohrü ko jahloh-hilohrünü Abüdongba kuh la züronung mükoh pü chore.”)

⁹ Roshengvi tsü kohchehpü, David-nü hütsüla licho ko hütsüte “David Yangdi” pü dsicho. Abinü yangdi tsü mükangmüla akhanglang lahpi alih süh liba la tsünü dikeh külüpcho.

¹⁰ Abi alaa du rezeh kangcho, tunüo Abüdongba Akohba Tsingrang abi te licho.

¹¹ Tyre-rü yangthsaba Hiram-nü David yang shithsabhülehnung yu jücho; abinü David khyang abi kuh thsanung cedar sing, kuthsarü ko lung nguchirü jücho.

¹² Hütsüta David-nü abi Abüdongba-nü Israel yangthsaba kangsohcho ko abi müyurü khyanglangnü abi yanglih müwajürepü müdhecho.

¹³ Hebron lanü Jerusalem lang shehmüipü khanglang, David-nü anitpü ko ashamtpü alaa du khyücho ko tsuzarü alaa licho.

¹⁴ Jerusalem la tsuzarü hiri nümüsucho: Shamua, Shobab, Nathan, Solomon,

¹⁵ Ibhar, Elishua, Nefeg, Jafia,

¹⁶ Elishama, Eliada ko Elifelet.

Filistinrü Kohcho

¹⁷ Khode Israel la David yangthsaba kangsohcho Filistinrünü yuchicho, arüh rothsarütinü abi te chitanung shemüsucho. Hütsü David-nü yuchide, abinü atbüticholang jowücho.

¹⁸ Filistinrünü ro Refaim Ngah la müdong hütsü khyücho.

¹⁹ Ko David-nü Abüdongba te tsingdhingcho, “Ihnü Filistinrü te chitanung, Nühnü I khyang akoh jünung müjünung?” Abüdongba-nü lalingcho, “Chitaang, Ihnü nü khyang akoh jünung!”

²⁰ Achotsü David-nü Baal Perazim lang wücho ko hütsüla abinü Filistinrü kohcho. Abinü yocho, “Kihmülümnü kyo Abüdongba-nü I rorüh rohphohko.” Hütsünü hiba müdüm te Baal Perazim dsicho.

²¹ Filistinrünü drü tside, arüh kyothri pehko tsicho ko David ko abi nyitsarütinü hütsüri hiwücho.

²² Adesü Filistinrünü Refaim Ngahlang tsü thali wücho ko hütsü khyücho.

²³ Anyüpiusü David-nü Abüdongba te tsingdhingcho, ko abinü lalingcho, “Hilanü tümah, ta khüulangthring Balsam singdong shündhün lang tsü mahng.

²⁴ Khode nührünü singkumüle la tsehchicho yuva yuchinang, hütsüde mahng, tunüo Filistin rothsarü kohnung Ih nührü bekhu wünung.”

²⁵ Abüdongba-nü yocho kyo David-nü nguchicho ko Filistinrü tsü Geba lanü Gezer chii iipehcho.