2 SAMUEL 4 - AMÜSA BAIBEL (BSI)

Ishbosheth Kyüsehcho

¹ Hebron la Abner kyüsehcho Saul tsurü Ishbosheth-nü yuchide, abi dee drücho ko Israelrü apüm nehcho.

² Ade Ishbosheth pohki Benjamin hung lanü Berothrü Rimon tsurü Bana ko Rekab amahrü yola anüchirü licho. (Beroth tsü Benjamin changsho kyo khichicho.

³ Athridirü tsü Gitaim lang tsicho ko hütsüla lipehcho)

⁴ Saul chahnü trahchocho apa khüdu tsü Saul e Jonathan nyüh kyüsehde kang münga thsa pehjüba Jonathan tsurü Mefibosheth licho. Arüh sücho yusi Jezrel yangdi lanü hirode, abi rükutpünü abi wüp-pü rang tsicho; ta dhsüdhsa tside langla abi longsohcho ko hütsülanü jahloh-hiloh kangpehcho.

⁵ Ade, Rekab e Bana nyühnü Ishbosheth kulang shemüsu wücho ko abi anyümong kyahshang lide, nyüthung koh hütsü chihcho.

⁶ Trahtri la khingkutpü tsü litoh la anyah dhingnü nyichi yüpsehpepü licho, achotsü Rekab e Bana nyühnü rang züducho.

⁷ Kuyonglang tsü, anyünü Ishbosheth yüpjilang abi yüpsülah lide züdupü kyüsehcho. Hütsüpü aku dengcho ko hütsü bipü müyüp Jordan Ngah khu tsehcho.

⁸ Anyünü athah tsü Hebron la yangthsaba David khyang jücho ko abi te yocho, “Nüh kyüsehnung yangchiba nü rorüh Saul tsurü Ishbosheth thah hi khyüng. Chünye Abüdongba-nü nüh adibong khyang Saul ko abi chahnü trahchocho michah rühyangsohko.”

⁹ David-nü anyüh te lalingcho, “Dhsürü lüpcho lanü Ih khümchobong akang liba Abüdongba nengla Ihnü yuchümre!

¹⁰ Ziklag la Saul sücho yusi Ite hiro yoba yusi hirü tsünü atsa hirorepü lümcho. Ta Ihnü abi rangpü süsohcho. Abi yusi atsa nengdang jiyü tsü Ihnü abi khyang hütsü jücho.

¹¹ Khang apu kuh la yüpjo licho achomükeh nyitsarü khüdu kyüsehrü amünyi nyitsarü nengdang khütoi amütsaba thsanung. Abi kyüsehcho nengdang Ihnü ade nühjü chah rühyangnung ko limih lanü nühjü changsohnung!”

¹² David-nü yuzengjücho ko rothsarütinü Rekab e Bana nyüh kyüsehcho ko anyüh jingkhehrü khanü Hebron la kihting shündhün hütsü tbeng pehcho. Arühnü Ishbosheth thah khyo Hebron la Abner kong la dhrürangcho.