2 SAMUEL 24 - AMÜSA BAIBEL (BSI)

David-nü Mono Khicho

¹ Abüdongba-nü anyüpiusü Israelrü te zichürocho ko abinü arüh michah David khyang achangba hirosohcho. Abüdongba-nü abi te yocho, “Wüng ko Israelrü ko Judarü mono khidhing.”

² Achotsü David-nü abi rothsarü anüchiba Joab khyang yuzengjücho: “Nü pohki adirüti yola Israel hung apüm yanglang limih achangnü achangchi wüng ko müyurü khidhing. Arüh khütoi lirünang Ihnü müdhenyüre.”

³ Ta Joab-nü yangthsaba te lalingnü yocho, “Nüh Adibong, Abüdongba nü Tsingrang-nü Israelrü ade tenü thsihpinü alaa mükhilong susohng, ko hütsü nüh akang lidenü tikehsohng. Ta tuepü nüh Adibongnü ade hi nguchinyüro?”

⁴ Ta yangthsabanü Joab ko abi pohki adirüti khyang abi yuzeng nyisohcho; arühnü abi tenü za Israelrü mono khidhingnung wücho.

⁵ Arühnü Jordan kehcho ko Gad lih la, angah longla yangdi, Aroer kihjinglang müdongcho. Hütsülanü arühnü kihku lahpi Jazer lang, hütsülanü Gilead lang,

⁶ ko Hit-rü lih la ko hütsülanü Kadesh lang wücho. Hütsüpü arühnü Dan lang ko Dan lanü Sidon nyüzüdulang wücho.

⁷ Hütsüpü arühnü atbüticho Tyre yangdi lang wücho ko Hiv-rü ko Kanan-rü yangdi apümlang ko achangkathsa Juda kihjing lahpi Beersheba lang wücho.

⁸ Hütsüpü arühnü choo düku ko nyümong mükyüla limih apümlang rachipü Jerusalem lang thali rocho.

⁹ Arühnü yangthsaba te rothsarü nguchila züduxah Israel la lakh keh ko Juda la lakh münga lilepü yu jücho.

¹⁰ Ta David-nü mono tsü khipü khanglang, alümlong mükyahshangchehcho, ko abinü Abüdongba te yocho, “Ihnü hi nguchiba hi adrünung amünyi shitpahko! Ihnü mümüdhepü nguchiko, yanglilüm I khyang mülang pehjüng.”

^11-12 Abüdongba-nü David azikehrü Gad te yocho, “Wüng ko David te asang hila khüdu throchehnung young. Abinü khüi throchehnang Ihnü hütsü nguchinung.”

¹³ Nyangnyü khüu, David surosohpü Gad-nü abi yanglang wünü abi te Abüdongba-nü yocho yu tsü yocho, ko tsingdhingcho, “Khüiba khyünung? Nü lih la kang asang yangkong mahkhang arorüh tenü choo asang rang tsinung, mahkhang nü lih la nyümong asang rümra? Ade, hütsüri lümdhing ko Abüdongba yang tu hiwünung Ite young.”

¹⁴ David-nü lalingcho, “Ih suromütsa khüdu kangko. Ta nyitsarü khyang Ih mükhingchisohnyü. Abüdongba apunü ihrü khingchisohng, tunüo Abi yanglilüm kehle.”

¹⁵ Achotsü Abüdongba-nü Israel la rümra hütsü nyangnyünü dikeh azengtacho müchihde lisohcho. Israel limih apüm la arüh hajar nyühre sücho.

¹⁶ Khode Abüdongba riwürünü Jerusalem changjünung thsacho, Abüdongba-nü alasih thsamüla ko kyüsehba riwürü te tsü yocho, “Nyehlieng! Kükyüko!” Hütsüde riwüba tsü Jebus-rü Arauna pungkhyang te licho.

¹⁷ David-nü müyurü kyüseh roba riwürü tsü ngucho ko Abüdongba te yocho, “Thsamehba tsü Ih lile. Amüthsalang nguchiba tsü Ih lile. Achomükeh müyurü hirinü tu müthsameh! Nühnü Ih ko I kukhi khingching.”

¹⁸ Hütsü nyümong Gad-nü David yanglang wü abi te yocho, “Arauna pungkhyanglang tsü chüdung ko Abüdongba khyang bholu khüdu külüpm.”

¹⁹ David-nü Abüdongba amülaba nyicho ko Gad-nü yochonyi wücho.

²⁰ Arauna-nü dhingchahchüde yangthsaba ko abi thsazirüti abi yanglang kürochi ngucho.

²¹ Achotsü abinü David bete mükhukeh tsingdhingcho, “Nüh Adibong, tuthsanung nüh hila rocho?” David-nü lalingcho, “Wara hi zahsohnung nü pungkhyang hila bholu khüdu külüpnung rore.”

²² Arauna-nü yocho, “Adibong, khyüng ko Abüdongba khyang nü tsacho mübüng. Bholu chah trüpnung misüpung hiri lile; atahnung ahong la yohba hongzih ko manyehsing singtpah lile.”

²³ Arauna-nü hütsüri apüm yangthsaba khyang jüpü abi te yocho, “Abüdongba nü Tsingrang-nü nü amübü khyüchojüngtü.”

²⁴ Ta yangthsabanü lalingcho, “Doh, Ihnü angang thsanung. Ihnü I Tsingrang khyang amükangnü jüchonü amübü müjünung.” Ko abinü pungkhyang ko misüpung tsü taripi shekel dhünyangnü lihcho.

²⁵ Hütsüpü abinü Abüdongba khyang bholu khüdu külüpcho ko trüp mübü ko akehta mübü jücho. Abüdongba-nü abi dangkhidangnang lalingcho ko Israel la rümra tsü zahcho.