2 SAMUEL 23 - AMÜSA BAIBEL (BSI)

David Yuzika

¹ Jesse tsurü David tsü Tsingrangba-nü amülah kangsohba nyitsarü lile. Jakob Tsingrang-nü abi yangthsaba throchehcho ko abi Israelrü nengdang khi atsa tangrü licho. David achangka yu tsü hiri:

² Abüdongba anbünü Ih khu chotare; Abi yusi tsü I beküp la lile.

³ Israel Tsingrang-nü choko; Israel tsungtibongnü Ite yoko: “Yangthsarü sünü yuje la thsaro, sünü Tsingrangba yu nyi thsaro,

⁴ abi tsü nyükhi mülila nyü dhsacho kyole, tsing ropü zanu ririsohba nyü roh-i.”

⁵ Ko hütsüta Tsingrangba-nü I trah müwajünung, tunüo Abinü Ite achangka müli azengchotaba külüpko, müthsangnyangba azengtacho, ko mümülichiba azengchotaba. Ihnü mükhyahba apümnü hütsü; hütsü Ih akoh thsanung; ko yuje Tsingrangba-nü hütsü tikehsohnung.

⁶ Ta Tsingrangba müdrüba nyitsarülü müzüp-pehba zeng kyole; Khehshünü sünüsü müthahpücheh.

⁷ Nührünü idhse mahkhang thsuh bichieng; arüh riri trüp-pehnung.

David ko Anengkhong Rothsarüti

⁸ David rothsarü anengkhongti tsü hiri: akhudiba tsü Tachemon lanü Bashebeth sü “Asang” yola anüchiba licho; abinü athsuhnü du nyüh thsih keh te khatacho ko arüh apüm khata khüdu lanü kyüsehcho.

⁹ Anengkhong asangla anyüuba tsü, Aho tsutpu lanü Dodo tsurü Eleazar licho. Nyümong khüdu khatanung shibülung liba Filistinrü te David anyüh mülengnü khyangchicho.

¹⁰ Israelrü tsü shehlicho, ta abinü abi yaji müpehjüpü abi kheh rohrühnü anoh mii amütheh mütsa müthsade Filistinrü te chitacho. Hütsü nyümong Abüdongba-nü akoh amülah jücho. Hütsü thümko khanglang, Israelrünü Eleazar yacho lang tsü rocho ko asücho me chah tsünü thsunohrü müzu hitsicho.

¹¹ Anengkhong asang yola asanguba tsü Harar lanü Agee tsurü Shama licho. Filistinrünü müxosih luh liba Lehi la tsü shibülungcho.

¹² Israelrünü Filistinrü tenü drü tsicho, ta Shama-nü müshehpü chitacho. Filistinrü adrong kyüsehcho. Hütsü nyümong Abüdongba-nü akoh amülah jücho.

¹³ Maxa bekhyah “Sangre” yola asang tsü Filistinrünü Refaim Ngah la müdong yade, David liyaba Adullam lungkohlang jowücho.

¹⁴ Hütsü bekhyah David tsü atbüticho khang chah licho ko Filistinrü mülungnü Bethlehem khyücho.

¹⁵ David-nü kuh longmi yocho, “Bethlehem la tbükhüm te tsünü kih shingo dusü khürünü hirojüsohnyüle.”

¹⁶ Anengkhong rothsarü asang tsünü Filistinrü müdong liba tsü dhrümphoh wünü kihkong la tsünü kih aza khacheh David khyang hirojücho. Ta abinü hütsü müyongpü Abüdongba khyang amübüthsa tungkehnü yocho,

¹⁷ “Abüdongba, Ihnü hi khodesü müyongchehnung. Hütsü arüh akang jüpü hirocho arüh shüh yongrü roh-i thsanung.” Hütsünü abinü müyongcho. Hütsüri tsü anengkhong rothsarü asang thrungcho nguchiti lile.

¹⁸ Joab ani Abishai tsü (arüh atpa tsü Zeruia) “Anengkhong sangre” michah anüchiba licho. Abinü athsuh dunü nyüh thsih asang te chitacho ko arüh kyüsehcho ko arüh, “Sangre” yola tsü anengkhong kangcho.

¹⁹ Abi tsü “Sangre” michah khütang anengkhong kang arüh anüchiba kangcho; ta “Arüh Asang” roh-i tsatsalü anengkhong müthsacho.

²⁰ Kabzeel lanü Hehoiada tsurü Benaia tsü adesü apa anengkhong rothsarü khüdu licho; abinü Moab-rü athrungrü anyüh kyüsehcho chah lahkeh müci mülah nguchi adrong nguchicho. Abinü khüdupi mürang süh nyümong khüdu Shukuh khüdula züducho ko kihkangdi khüdu kyasehcho.

²¹ Abinü adesü Ijiprü arangcheh nyüh khüdu thsuh bipü yacho kyüsehcho. Benaia-nü abi janü xüpcho ko Ijip-ba khehlanü thsuh tsü rohchocho ko hütsünü apu tsü chiisehcho.

²² Hütsüri tsü “Sangre” yola Benaia-nü thrungcho nguchiti lile.

²³ Abi tsü arüh yola anengkhong khüdu licho, ta “arüh asang” kyo nengkhonglü müthsacho. David-nü abi nyahrü yola anüchiba kangsohcho.

^24-39 Khiyoh “Sangre” la tsü hirisü zehcho: Asahel, Joab nirü Bethlehem lanü Dodo tsurü Ellanan Harod lanü Shama ko Elika Pelet lanü Helez Tekoa lanü Ikesh tsurü Ira Anathot lanü Abiezer Husha lanü Mebunaipi Aho lanü Zalmon Netofa lanü Maharai Netofa lanü Bana tsurü Heleb Benjamin la Gibea lanü Ribai tsurü Ittai Pirathon lanü Benaia Gaash shündhün angah lanü Hidai Bahurim lanü Azmavet Shalbon lanü Eliaba Jashen tsurüti Jonathan Harar lanü Shama Harar lanü Sharar tsurü Ahiam Maka lanü Ahasbai tsurü Elifelet Gilo lanü Ahithofel tsurü Eliam Karmel lanü Hezro Arab lanü Parai Zoba lanü Nathan tsurü Igal Gad lanü Bani Amon lanü Zelek Beroth lanü Zelek thsunohrü hirü Naharai Jatir lanü Ira ko Gareb Hit-rü Uria. Arüh anengkhong rothsarüti tsü sangrepü dhünyeh licho.