2 SAMUEL 22 - AMÜSA BAIBEL (BSI)

David Akoh Khi

¹ Khode Abüdongba-nü Saul ko aparü abi rorüti chahnü abi khümchocho, David-nü khi hi Abüdongba te thsacho:

² Abüdongba I tsungtirü; abi adrengdreng I roshengvi;

³ I Tsingrang tsü I khümrü; ko abi chah Ih khümcho lile. Abinü tsung kyo Ih tsungtire; abinü Ih nyingti khümchore. Abi I khümchorü; abinü Ih tsungti shühkhatoh lanü khümchore.

⁴ Ihnü Abüdongba te dsire, ko Abinü I rorüh tenü Ih khümchore. Abüdongba Seing!

⁵ Asü kiloh Ih mükang licho; athsangnyang kiloh I michah lohkehko.

⁶ Asü dhsürü I mükang licho, ko kongnü I khyang zeng thsacho.

⁷ Ih chongchala Abüdongba te dsicho; Ihnü arüku nengdang I Tsingrang dsicho. Abi amübükuh la I yuva yuchicho; arüku nengdang züdecho abinü nyicho.

⁸ Hütsüde alih dhridhricho ko shühchicho; ning jingdümpi nyangnyangcho ko dhridhricho.

⁹ Anabong lanü mikhu chürocho, abe lanü mihmüle ko michüh.

¹⁰ Abi ning rohrüp jürocho, ajing pohki amarürah nyükhi.

¹¹ Abi Cherufim chah pümcho, abi nyübong qo chah rachicho.

¹² Apu jangjang amarürahnü müshüticho; nyükhi achehling, kih jeng zehpü, abi mükang licho;

¹³ michüh mihmüle trucho Abi bete ningmüla lanü.

¹⁴ Hütsüde Abüdongba-nü ninglangnü müticho, ko Akohba Tsingrang yuva yuchicho.

¹⁵ Abinü Abi tbüdeng kyacho ko arorühti tsishocho; ningmüla arüh tsishosohcho.

¹⁶ Kihjü jongnah adeng yohpücho, ko alih müdongkeh müshapücho; Abüdongba-nü abi rorüti yohpüde, ko arüh chah rengkehjüde.

¹⁷ Abüdongba-nü müzingchahchü Ih marehcho; kih asoh-u lanü Ih tphahchehcho.

¹⁸ Abinü rezeh I rorüh khehlanü Ih ruhchocho, Ko I thrünyirü apüm chahnü, arüh I nengdang ziracho.

¹⁹ Ih chongcha lide Ih becho, ta Abüdongba-nü Ih tsungticho.

²⁰ Abinü dhsürüla Ih trocho; abinü Ih khümchocho, tunüo Abi Ite künyang licho.

²¹ Abüdongba-nü Ih jiyüre tunüo athsalang Ihnü nguchire; abinü Ih müwajüre tunüo Ih achomükeh.

²² Ihnü Abüdongba yuzeng bichire; Tsingrangba chahnü mühzatsi.

²³ Ihnü abi yuzeng apüm bichiko; abi amülaba mühnyi mühle.

²⁴ Ih mülang mühle pü Abinü müdhele, Ihnü amüthsalang lanü za lire.

²⁵ Hütsünü I nguchi aichi Abinü Ih jiyüre, Ih achomükeh Abinü müdhele.

²⁶ O Abüdongba, Nüte yuje chorü te, Nühnü yuje chore, ko adekhengrü te khütang tsare.

²⁷ Amüdhsengrü te nüh müdhsengre, ta akhürahrü te Nüh rihlong chürore.

²⁸ Alonglümrü nühnü khümchore, ta amüthsehrü Nühnü yatire.

²⁹ Abüdongba, Nüh I atsingse; Nühnü Ih amarürah changjüre.

³⁰ I khyang arorüh mahnung re jüre ko arüh kohnung zii jüre.

³¹ Tsingrang hi Abi nguchi khüta adekheng, Abi yu khüta alonglangnung. Abi tsung khüdu kyole, Abi atsungtiba yangchirü nengdang.

³² Abüdongba du Tsingrangba; Tsingrangba du Ihsa khümchorü.

³³ Hiba Tsingrang tsü I tsikehji; Abinü I lang khümcho külüpjüre.

³⁴ Abinü shümüshü kyo I jing khümkhümsohre; Abinü azongla Ih khümcho yohpüre.

³⁵ Abinü khatanung I khyang lümlong jüre, hütsünü amüküp-uba singthsalu Ihnü bichichehre.

³⁶ O Abüdongba, Nühnü Ih tsungtire ko khümchore; Nü arükunü Ih mülahsohre.

³⁷ Ih kohchehnunglanü Ih khümchoko, ko Ih khodesü mükhülu.

³⁸ Ihnü arorüh iiwü arüh kohcho; arüh müchangjüde müzahcho.

³⁹ Ihnü arüh khülusohcho ko arüh müsurocheh; arüh I bete khülu jocho.

⁴⁰ Nühnü I khyang khatanung re jücho ko arorüh michah akoh jücho.

⁴¹ Arorühnü Ih drü tsisohcho; I thrünyirü Ihnü changjücho.

⁴² Arorühnü atrorü yangchire, ta sünüsü mükhümchore; arühnü Abüdongba te dsire ta mülalingre.

⁴³ Ihnü arüh nyehnahre, ko arüh asongsong kyo kangcho; Yanglongla chongbong kyo arüh michah dhrümchicho.

⁴⁴ Anyümrü chahnü Ih khümchocho, ko yuchoti michah athah roh-i Ih yohpüre. Ihnü mütsüpba nyitsarü I dikehrü kangko.

⁴⁵ Shuparünü Ite mükhukehre; arühnü I yuva yuchide, Ite nyire.

⁴⁶ Arüh suzahre ko roshengvi lanü dhridhri rore.

⁴⁷ Abüdongba akang lire! Ih tsungtibong seing! I khümchoba Tsingrang dicho sobhoung; Tsingrangba-nü Ih khümchore!

⁴⁸ Abinü I khyang akoh jüre; yuchoti I pohki yohpüjüre

⁴⁹ ko I rorüh chahnü khümchore. O Abüdongba, Nühnü I rorüh michah akoh jüre ko amütsarü chahnü Ih tsungtire.

⁵⁰ Hütsünü yuchoti michah Ihnü Nüh sere; Ihnü Nüte nengsekhi thsare.

⁵¹ Tsingrangba-nü abi yangthsaba khyang akoh amülah jüre; Abinü throchehcho te abinü amüthrehba amüi ngusohre. David ko Abi chahnü trahchochote achangka müli ngusohre.