2 SAMUEL 21 - AMÜSA BAIBEL (BSI)

Saul Trah Süsohcho

¹ David yangthsaba bekhyah kang asang ajeng yangkong atrühdi khüdu licho. Hütsünü Abüdongba te David-nü hütsü nengdang tsingdhingcho ko Abüdongba-nü yocho, “Saul ko abi kukhinü kyüsehcho mülang lile; tunüo abinü Gibeon-rü süsohko.”

² Gibeon-rü Israelrü mah; arüh tsü Amor-rü mülungo lile, ko Israelrünü arüh khümnung nyengchocho, ta Saul-nü Israelrü ko Judarü nengdangnü arüh tsü changjünung müküpcho.

³ Achotsü David-nü Gibeon-rü dsinü arüh te yocho, “Ihnü nührü nengdang tu nguchisohnyüro? Nührünü Abüdongba müyurü müwajüsohnung, nührü te thsamehcho nengdang Ihnü rolinyüre.”

⁴ Arühnü lalingcho, “Saul ko abi kukhite ihrü khataba tsü hon ko taripi nüsü mükhachehnung, mahkhang ihrünü Israelrüsü kyüsehnyo mühle.” David-nü lalingcho, “Khang, I khyang nührü shulüm tu nguchisohnyüro?”

⁵ Arühnü lalingcho, “Israel apümlang ihrü khüdusü münyingpü Saul-nü ihrü changjünyücho.

⁶ Hütsüeko Abüdongba-nü throchehcho yangthsaba Saul yangdi Gibea la Abüdongba bete ihrünü arüh hohsehpehnung, ihrü khyang Saul chahnü trahchocho lanü nyüh dhünyeh jüng.” Yangthsabanü lalingcho, “Ihnü nührü khyang jünung.”

⁷ Ta Jonathan anyüh kahla amüsa anyengchotaba lichonü Saul shümtsurü Jonathan tsurü Mefibosheth-lü müjücho.

⁸ Ta, abinü Saul khyang Aiah tsulatpü Rizpa-nü nümüsujücho atsurü anyüh Armoni ko Mefibosheth khyücho; adesü abinü Mehola lanü Barzilai tsurü Adriel khyang nümüsujüba Saul tsulatpü chahnü arüh münga norocho.

⁹ David-nü hütsüri Gibeon-rü khyang jücho ko arühnü Abüdongba bete azongchah tsü arüh hohsehpehcho ko arüh dhünyehding khüdula sücho. Arüh tsü lüdi maxa adikehlang süsohcho.

¹⁰ Hütsüde Aiah tsulatpü Saul ashamtpü Rizpa-nü me pehba lungrah la tsü abükyü linung müyah shünü kuh thsacho ko mamüki lanü mürüpmünu tsing royingcheh hütsüla licho. Anyümong abükyünü me chah tsünü uza iipehcho ko aromang rangmü kanglungrü chahnü iicho licho.

¹¹ Rizpa-nü hütsüta nguchiba tsü khode David-nü yuchicho,

¹² abinü wü Gilead la Jabesh-rü chahnü Saul ko atsurü Jonathan nyüh rühlungrü khyücho. (Hütsü Filistinrünü Saul kyüseh Gilboa khang chah tbeng pehba nyümong, Beth Shan lanü Jabesh-rünü fo hitsipü licho.)

¹³ David-nü Saul e Jonathan nyüh rühlungrü ko hohseh pehba arüh dhünyeh rühlungrü khyübülungcho.

¹⁴ Hütsüpü arühnü Saul e Jonathan anyüh rüh tsü Benjamin lih Zela la Saul au Kish kong la yangthsabanü nguchinung yocho apüm nguchipü dhrürangcho. Hütsüpü khanglang du arüh limih nengdang arüh dangkhidangnang Tsingrangba-nü lalingcho.

Filistin Akurahrü Nyüm Khatacho

¹⁵ Adesü Filistinrü ko Israelrü kahla mongchii khüdu chürocho ko David ko abi nyitsarütinü wü khata tsü khatacho. Mongchii khüdula David kyahpehcho.

¹⁶ Akurahrü khüdu anengnü Ishbibenob, sü imüyeng thsuh amülinglang süreh asangpü achangsho bicho ko, sü kheh la nohsheng asi khüdu bicho, abinü David tsü kyüsehnung lümcho.

¹⁷ Ta Zeruia tsurü Abishai-nü ro David tro akurahba tsü kyüsehcho. Hütsüpü David nyitsarütinü abi khyang adelü khodesü abi arüh yola khatanung müwünungepü nyengchosohcho. Arühnü yocho, “Nüh Israelrü alongdi lile ko ihrünü nüh müchahsohnyüre.”

¹⁸ Hi khanglang adesü Gob la Filistinrü te mongchii khüdu licho ko hütsüla Husha lanü Sibekai-nü akurahrü Saf kyüsehcho.

¹⁹ Adesü Gob la Filistinrü te apa khata khüdu khatacho ko Bethlehem lanü Jair tsurü Elhanan-nü shükyahrü kihdüm toh-i thsuh biba Gath lanü Goliath-sü kyüsehcho.

²⁰ Hütsüpü Gath la mongchii apa khüdu licho, hütsüla chitanung xahba akurahrü khüdu zehcho. Abi akheh ko ajingchah müyungza dhürüroh kehcho.

²¹ Abinü Israelrü khyangchicho ko David ani Shama tsurü Jonathan-nü abi kyüsehcho.

²² Hiri müyü tsü Gath la akurahrüti licho ko arüh tsü David ko abi nyitsarütinü kyüsehcho.