2 SAMUEL 20 - AMÜSA BAIBEL (BSI)

Sheba-nü Nyümcho

¹ Gilgal la adongmücho nyitsarü khüdu Benjaminrü Bikri tsurü Sheba licho. Abinü rühti meh züdecho, “David nyehlieng! Ihrünü abi khanglang müwünung. Israelrüti, Ihsanü kulang thalinung.”

² Achotsü Israelrünü David pehjüpü Sheba khanglang wücho, ta Judarünü David te yochonyi Jordan lanü Jerusalem chii abi khanglang wücho.

³ Khode David-nü Jerusalem la abi yangthsaba kuh chihcho, abinü yangthsaba kuh nyahnung pehjüba abi ashamlarü dhüre tsü kuh khüdula khangticho. Abinü arüh dhsütahti chixicho, ta arüh te mümükhongcho. Arüh tsü arüh akang ayung chomilarü kang yohpücho.

⁴ Yangthsabanü Amasa te yocho, “Judarü apüm dsimükhong ko arüh nüpü zihtunü hi chihng.”

⁵ Amasa-nü arüh dsinung wücho, ta yangthsabanü zengjüba bekhyahla tsü ro müchihcho.

⁶ Achotsü yangthsabanü Abishai te yocho, “Sheba-nü Absalom tenü Ihsa khyang alongmüzi alaa jünung. I nyitsarüti nüng ko abi khanglang wüng, mahkhang abinü atbüticho yangdi khürü khyo Ihsa tenü tsichehnung.”

⁷ Achotsü Sheba iiwünung Joab nyitsarüti, anyahrüti ko apa rothsarüti apümnü Jerusalem pehjüpü Abishai khanglang wücho.

⁸ Khode arühnü Gibeon la lung arangcheh tsü chihcho, Amasa-nü ro arüh mütohcho. Joab-nü khata jengki khyücho, nohtrüp la noh yohpü hütsü rungrümla müthsücho. Abi bekhu rode, noh tsü shohjocho.

⁹ Joab-nü Amasa te yocho, “I müyang, khüta liro?” Ko abi chah müthsüpnung nengdang akheh tsalangnü abenbüh chah zümcho.

¹⁰ Joab-nü akheh khüulang noh khüdu biba tsü Amasa-nü müngucho ko Joab-nü amibong la thracho ko amichah axü shichehcho. Hütsütade tsünü abi sücho ko Joab-nü thali kheh thahnung müdhsütahcho. Hütsüpü Joab ko ani Abishai nyühnü Sheba iiwücho.

¹¹ Joab nyitsarü khüdunü Amasa me te yapü züdecho, “Joab ko David nengdang yarü atümungnü Joab khanglang iiwüng.”

¹² Amasa me tsü ashühnü jengpü langlongla jocho. Apümnü nyehlipü dhingcho müdhe abinü ame tsü langjüp tphah hiwü shü khüdunü phatipücho.

¹³ Langlanü hitsiko khanglanglü, atümungnü Sheba iinung Joab khanglang wücho.

¹⁴ Sheba-nü Israel limih apüm khucho ko Abel Beth Maka yang rocho ko Bikri tsutpu apüm shibülung abi khanglang yangdila tsü züducho.

¹⁵ Joab nyitsarünü Sheba hütsüla lilepü müdhe arühnü wü yangdi tsü beticho. Tbü tsü khülusohnung arühnü yanglonglang tsü tbüchah bhümkeh alih sühcho ko tbü pohki tsü jumüsucho.

¹⁶ Hütsü yangdila tsü athsehdhsa khingkurü khüdu licho ko abükyünü tbü la tsünü züdecho, “Nyieng! Nyieng! Joab te hila rungding; Ihnü abi te chotanyüre.”

¹⁷ Joab-nü wücho ko abükyünü tsingdhingcho, “Nüh Joab mah-o?” Abinü yocho, “Ho! Ih-e.” Abükyünü yocho, “Adirü, Iyu nyieng.” Abinü lalingcho, “Ihnü nyile.”

¹⁸ Abükyünü yocho, “Wüng ko Abel yangdilanü alalingba khyüng ko arühnü hütsüta nguchicho.

¹⁹ Ihrü yangdi hi arangcheh lile, Israel la atbachi ko yochonyiba yangdi. Tuepü hütsü thsangnyangjünung müküpro? Abüdongba yo nühnü thsangnyangjünung müküprü mah-o?”

²⁰ Joab-nü lalingcho, “Khodesü mah. Ihnü khodesü nührü yangdi müthsangnyangjünung.

²¹ Hütsü ihrü lümchung mah. Nyüh khüdu Bikri tsurü Sheba Efraim azong lih lanü, abinü David nyümre. Hiba nyitsarü du tsü ihrü khyang jüng ko yangdilanü ihrü tsipehnung.” Abükyünü yocho, “Ihrünü nüh yang tbü khu abi thah tsachehchüjünung.”

²² Hütsüta abükyünü lümchung tsü hipü yangdi nyitsarü yanglang wücho; ko arühnü Sheba thah khasahpü hütsü Joab yang tbü khu tsachehchü jücho. Abi nyitsarü te yangdi tsü pehjünung rühti mehcho ko arühnü kulang thali tsicho. Ko Joab-nü Jerusalem lang yangthsaba yang thalicho.

David Thsazirüti

²³ Joab tsü Israel rothsarü michah anüchiba; Jehoiada tsurü Benaia tsü David nyahrü anüchiba;

²⁴ Adoniram tsü anguchirü anüchiba; Ahilud tsurü Jehoshafat tsü athrahrü yola anüchiba;

²⁵ Sheva tsü yukhachah athrahrü; Zadok ko Abiathar tsü bebürü,

²⁶ ko Jair yangdilanü Ira tsü David bebürü yola khüdu licho.