2 SAMUEL 2 - AMÜSA BAIBEL (BSI)

David Juda Yangthsaba Kangsohcho

¹ Hütsüpü David-nü Abüdongba te tsingdhingcho, “Ihnü wü Juda la yangdi khüdu khyonung o?” Abüdongba-nü lalingcho, “Khyüng.” David-nü tsingdhingcho, “Khüiba khyünung?” Abüdongba-nü yocho, “Hebron.”

² Achotsü David-nü Hebron lang abi yola anitpü anyüh: Jezrel lanü Ahinoam ko Karmel lanü Nabal nitpü Abigail nyüh nüpü wücho.

³ Abinü anyitsarü ko arüh kukhitisü nücho ko wü Hebron mükang yangditila licho.

⁴ Hütsüde Judarünü ro David tsü Judarü yangthsaba kangsoh müyühjü throchehcho. Gilead la Jabesh-rünü Saul me dhrürangcho yuchide,

⁵ abinü hütsülang yusi hita hipü wüsohcho: “Nührünü nührü yangthsaba te jengrengjo abi me dhrürangcho ngang Abüdongba-nü nührü müwajüng.

⁶ Ko ade Abüdongba-nü nührü te chomang ko müing. Nührünü tsa nguchicho ngang Ihnüsü nührü tsa bichinung.

⁷ Rezehng ko müci mülahng! Saul nührü yangthsaba süko, ko Judarünü arüh yangthsaba thsanung Ih müyühjü throchehko.”

Ishbosheth Israel Yangthsaba Kangsohcho

⁸ Saul rothsarü anüchiba Ner tsurü Abner-nü Saul tsurü Ishbosheth yola Jordan keh Mahanaim lang rang tsicho.

⁹ Hütsüla Abner-nü Gilead, Asher, Jezrel, Efraim ko Benjamin lih la ko Israel apüm michah Ishbosheth tsü yangthsaba kangsohcho.

¹⁰ Abi Israel la yangthsaba kangsohde abi kang yüre azirü thsacho ko abinü kang anyüh yangthsa thsacho. Ta Juda hungnülü David te yochonyi licho.

¹¹ Ko abinü Hebron la Judarü michah kang dhünyehpü achangsho yangthsa thsacho.

Israel ko Juda Kahla Mongchii

¹² Abner ko Ishbosheth pohki thsazirütinü Mahanaim lanü Gibeon yangdi yang wücho.

¹³ Zeruia tsurü Joab ko David pohki thsazirütinü arüh kihting te shirütacho ko arüh apüm mülung khüdu kihting khüulang ko mülung akhüu hütsü deta pümcho.

¹⁴ Abner-nü Joab te yocho, “Mülung anyüdinglangnü dhrezarü throcheh Ihsa bete khatadhingsohnung!” Joab-nü lalingcho, “Tsale.”

¹⁵ Achotsü Isbosheth ko Benjamin hung nengla nyüh dhüreanyünü David nyitsarü dhüreanyüh te khatacho.

¹⁶ Palunü palu rorüh athahnü zümcho ko palu rorüh chah palu nohshengnü thracho, hütsünü arüh mükyüpü müyüding khülutsu sücho. Hütsünü Gibeon la hütsüba müdüm te “Nohsheng Ngah” pü dsire.

¹⁷ Hütsüta adrünung mongchii chürocho ko Abner ko Israelrü tsü David nyitsarünü kohcho.

¹⁸ Zeruia tsurü asangding hütsüla zehcho: Joab, Abishai ko Asahel.

¹⁹ Shümüshü kyo shangba Asahel-nü müchongkhüti Abner khanglang abi iishangcho.

²⁰ Abner-nü ximüla dhingpü yocho, “Hütsü nüh mah-o Asahel?” Abinü lalingcho, “Ho.”

²¹ Abner-nü yocho, “Ih tüiro. Ta rothsarü khüdu iiching ko abi tu liro hütsü khyüng.” Ta Asahel-nü abi du iichi wücho.

²² Anyüpiusü Abner-nü yocho, “Ih tüiro! Tuepü Ihnü nüh kyüsehsohnung khingro? Ihnü nü mung Joab khüta shirünung?”

²³ Ta Asahel-nü müpehjüpü iiwücho. Achotsü Abner-nü athsuh ipi langnü amila chiichonü akhanglang khakhu chürocho. Asahel hütsüla khülutsu sücho, ko abi jochola rorüh apüm nyehli hütsüla yacho.

²⁴ Ta Joab ko Abishai nyühnü Abner khanglang iinung dikehcho ko nyüzehde arühnü Giah nyüchürolang Gibeon akungaselihlang wüba langla Amaah khang chii rocho.

²⁵ Benjamin hung nyitsarünü ro Abner mükangticho ko akhang khüdu chah arühnü yacho.

²⁶ Abner-nü Joab te züdecho, “Ihsa achangka mühli khata du linung do? Amütsa dunü changkanungepü nühnü mümüdherü mah-o? Ihsa abürü nyitsarüe. Khütoichah lipü nühnü nü nyitsarü te ihrü müichinung yuzeng jünung?”

²⁷ Joab-nü lalingcho, “Akang Tsingrang nengla Ihnü yuchümre, nühnü hütsüta müchorelang, I nyitsarütinü atunyang yingcheh nüh iinungba licho.”

²⁸ Achotsü Joab-nü Israelrü mü-iichinung amüdhethsa rühti mehcho ko hütsüta khata tsü nyehlicho.

²⁹ Abner ko abi nyitsarüti hütsü romang müyüp Jordan ngah khu tsicho; arühnü Jordan Yongkhi kehcho ko nyangnyü khüu yingcheh tsehpü, arüh thali ro Mahanaim chihcho.

³⁰ Khode Joab-nü iiwüba tsü pehjücho, abinü amüyurü atümung shibülungsohcho ko Asahel chah lahkeh arüh dhüredükuh mühlicho.

³¹ David nyitsarünü Benjamin hung lanü Abner nyitsarü 360 kyüsehcho.

³² Joab ko abi nyitsarünü Asahel me tsü khyo Bethlehem la arüh tsutpu kong la dhrürangcho. Hütsüpü arühnü müyüp tsehcho ko nyangnyü khüu mütoh thali Hebron chihcho.