2 SAMUEL 18 - AMÜSA BAIBEL (BSI)

Absalom Kohchehcho ko Kyüsehcho

¹ Yangthsaba David-nü abi nyitsarüti apüm nübülungpü hajar mülung ko thsih mülung changnahpü, hütsü müipi anüchirü yohpüjücho.

² Hütsüpü abinü amülung asang changpü khüdu Joab, khüdu Joab ani Abishai ko khüdu Gath lanü Ittai khyang nüpü wüsohcho. Ko yangthsabanü abi nyitsarüti te yocho, “Ihsü nührü yola wünung!”

³ Arühnü lalingcho, “Nüh ihrü yola müwünung. Ihrü anyingcho shehlinye mahkhang ihrü achangsho kyüsehnye arorüh nengdang tu papa mühle; ta nühlü ihrü hajar dhüre te awüba. Nühlü yangdila du pümpü ihrü khyang arüku müthehcho atsauba thsanung.”

⁴ Yangthsabanü lalingcho, “Nührünü tu tsalenang Ihnü hütsü nguchinung.” Achotsü abi nyitsarüti hajar bhüm ko thsih bhüm shemüsu tside, abinü tbükhüm la tsü yapü dhingyacho.

⁵ Abinü Joab, Abishai ko Ittai te yuzeng hiroh-i jücho: “I nenglanü dhrezaba Absalom tüdhsakehjü.” David-nü anüchirü te yuzeng hi yode, rothsarü apümnü yuchicho.

⁶ David rothsarünü yanglangthring wücho ko Efraim mürong la Israelrü te chitacho.

⁷ Hütsü nyümong nyüh hajar mükyü kyüsehnü, adrünungkeh kohchehcho.

⁸ Rangmü apüm jeng chitacho; ko nyitsarü tsü khatala sücho tenü rangmü la adrongu sücho.

⁹ Dhrongyengnü Absalom-nü David nyitsarü khürü dhsükehcho. Absalom tsü gadu khüduchah pümpü langsing khüdu pohki shangkhu tside, akuvanü singjengza chah xohlicho. Gadu tsü shang tsipehcho ko Absalom ninglang hohyaichipücho.

¹⁰ David nyitsarü khüdunü hütsü ngu Joab te yocho, “Adirü, Ihnü Absalom langsing khüduchah hohkepo nguko.”

¹¹ Joab-nü lalingcho, “Nühnü abi ngucho thsakhang, tuepü hütsülanü abi mükyüsehcho? Arelang, Ihnü nü khyang taripi dhüre ko rungrüm khüdu jüba thsako.”

¹² Ta nyitsarüba tsünü lalingcho, “Nühnü taripi hajar mii jünye, Ihnü yangthsaba tsurü chah tsü I müyungzanü mii müthahpünung. Ihrü apümnü yuchi yangthsabanü nüh, Abishai ko Ittai te yuzeng jüko, ‘I nenglanü dhrezaba Absalom tüdhsakehjü.’

¹³ Ta Ihnü yangthsaba yocho münyipü Absalom kyüsehrelang, hütsü yangthsabanü yuchinung ko nühnü mii Ih mükhümchochehnung, tunüo abinü lüpcho yuchire.”

¹⁴ Joab-nü yocho, “Ih nüte bekhyah peh müchotanung.” Abinü thsuh asang khyo Absalom langsing chah akangkang hohkehpüde, abi müsikhula khyükehchü chiicho.

¹⁵ Hütsüpü Joab rothsarü arüh dhürenü Absalom beti hütsüla kyüsehcho.

¹⁶ Hütsüpü chita tsü zahnung Joab-nü rühti mehcho ko Israelrü iiwübalanü abi rothsarüti thali rocho.

¹⁷ Arühnü Absalom me tsü khyo mürong la yongroh asoh la dhiyohchücho ko lung khütangonü zangti pehcho.

¹⁸ Absalom-nü abi akang lide Yangthsaba Ngah la lung-dongdi khüdu apu nengdang külüp abinü yocho, “I neng lümkehnungthsa I tsurü mühle” hütsünü abi nengla dsicho ko chünye yingcheh hütsüte Absalom lung-dongdi pü dsire.

David te Absalom Sücho Yocho

¹⁹ Hütsüde Zadok tsurü Ahimaz-nü Joab te yocho, “Ihnü yangthsaba yang Abüdongba-nü abi arorüh khehlanü khümchocho yusi atsa tsü yonung shangnung.”

²⁰ Joab-nü yocho, “Doh, chünye nühnü tu yusi atsa tühiwü. Hiko young, ta chünye tüyo, tunüo yangthsaba tsurü süko.”

²¹ Hütsüpü abinü abi kuliba Kush-rü te tsü yocho, “Wüng ko nühnü tu ngucho hütsü yangthsaba te young.” Kuliba tsünü mükhukehpü shang tsicho.

²² Ahimaz-nü eemüthsa yocho, “Tusü tikehnye tumüthsa; yanglilüm yusi tsü hipü Ihsü wüsohng.” Joab-nü tsingdhingcho, “Itso, tuepü nühnü hütsü hiwünyüro? Nüh tu müjingchonung.”

²³ Ahimaz-nü yocho, “Tusü tusü tikehnye, Ih wünyüre.” Joab-nü yocho, “Khang wüng.” Achotsü Ahimaz-nü shangmüsucho ko Jordan Ngah khu jowücho ko abinü kuliba tsü tsohkhucho.

²⁴ David tsü tbükhüm anyüh kahla pümcho. Roshengba tsünü tbü mihlang tsü küducho ko tbükhüm kumungchah tsü yapü mükehmükongde, nyüh khüdu shang roya ngucho.

²⁵ Abinü dsichi jüro yangthsaba te yocho ko yangthsabanü yocho, “Abi müleng thsakhang, yusi atsa hirole.” Ko yuhiba tsü amünyeh-u amünyeh-u rocho.

²⁶ Hütsüpü roshengba tsünü aparü nyüh khüdusü amüleng shang roya ngucho ko abinü trahtri nyahba dsichi jüro yocho, “Dhing, apa nyüh khüdu shang tsehle.” Yangthsabanü yocho, “Hivi nüsü yusi atsa hirole.”

²⁷ Roshengba tsünü yocho, “Akhuba tsü Ahimaz kyole.” Yangthsabanü yocho, “Abi nyitsarü atsae ko abinü yusi atsa hirole.”

²⁸ Ahimaz-nü yangthsaba te salüm yu yonü ajingte alih la thsütsu yocho, “Abüdongba nü Tsingrang seing, abinü nü khyang nü nyümrü michah akoh jüko.”

²⁹ Yangthsabanü tsingdhingcho, “Dhrezaba Absalom khümcho mülio?” Ahimaz-nü lalingcho, “Adirü, Joab-nü Ih müthehde Ihnü duduyaya arangcheh ngucho, ta hütsü tunang Ihnü müyocheh.”

³⁰ Yangthsabanü yocho: “Hütsüla yaang” ko abinü wü hütsüla yacho.

³¹ Hütsüpü kuliba Kush-ba tsü rochihcho ko abinü yangthsaba te yocho, “Nüh adibong nengdang Ih yusi atsa hirore. Chünye Abüdongba-nü nü khyang nü nyümrü apüm michah akoh jüko.”

³² Yangthsabanü tsingdhingcho, “Dhrezaba Absalom khümcho mülio?” Kuliba tsünü lalingcho, “Adirü, abi chah tikehba tsü nü rorüh aparü chah tikehsohnyole.”

³³ Yangthsaba tsü alongrinü jengcho. Abinü tbükhüm thahte abi yüpjilang küducho ko tracho. Abi tside abinü tracho, “O Itso! Itso, Absalom! Absalom, Itso! Nü mülih Ih süba thsako. Itso Absalom! Itso!”