2 SAMUEL 17 - AMÜSA BAIBEL (BSI)

Hushai-nü Absalom Nümülacho

¹ Tunyah mülipü, Ahithofel-nü Absalom te yocho, “Ihnü nyüh hajar dhüreanyüh throchehnung ko shomülangnü David mahnung wünung.

² Abi suzahpü kyahseh lide Ihnü abi mahnung, abi drüsehnung ko abi nyitsarü apüm tsishonung.

³ Ko Ihnü yangthsaba du tsü kyüsehnung ko müyurü tsü axengtpü anii yang rocho kyo nüli ronung. Nühnü nyüh khüdu du yangchire; anyingcho müyurü tsülü khümcho linung.”

⁴ Hiba lümlong tsü Absalom ko Israelrü langnürü atümungnü tsa lümcho.

⁵ Absalom-nü yocho, “Ade Hushai dsieng ko abinü tonang Ihsanü nyidhingnung.”

⁶ Khode Hushai rochihcho, Absalom-nü abi te yocho, “Ahithofel-nü lümlong khüdu jo lile; ihrünü hütsü nguchinung tsanung mütsanung? Mahkhang ihrünü tu nguchinung nühnü young.”

⁷ Hushai-nü lalingcho, “Ahithofel-nü lümlong jüba tsü ade nengdang mütsa.

⁸ Tunüo nüu ko abi nyitsarüti tsü akurahrüti due ko arüh tsü shühmü atpa aza te kyo lile. Nüu tsü axangchehcho rothsarü khüdu; ko aromang abi nyitsarü yola mülinung.

⁹ Ade hi abi lungkoh mahkhang khüdenang rangpümnung. Ko khode nü nyitsarü David-nü mahnang, ayuchirü apümnü Absalom khanglang iiwürüti kahla kyüsehtakopü yuchinung.

¹⁰ Hütsüde kangdi kyo akurahrütinü mii adrüchonü müci mükangkehnung, tunüo nüu tsü rothrungrü, ko abi nyitsarüti tsü athrungrüti duepü Israel la apümnü müdhele.

¹¹ Ihnü yonunglü, Israel lih apümlangnü, Dan lanü Bersheba chii kihbekhümla lihpi sühdi kyo nübülung, ko nüh zeh khatalang tsü wüng.

¹² Ihsanü David tsü khüde lirünang yangchinung ko abinü tu tikehrünang mümüdhede abi mahnung. Abi ko abi nyitsarünye süsü akang mülinung.

¹³ Abinü yangdi khüdula tsiyohkhang, Ihsanü rangdüshü hiro yangdi tsü angah khüdu yang xohtsunung. Akhangchah tsü lung khüdusü müpehjünung.”

¹⁴ Absalom ko Israelrü atümungnü yocho, “Hushai-nü yoba tsü Ahithofel-nü yoba tenü atsaue.” Ahithofel lümlong atsa tsü münyipü Absalom chah thohdhü achangba rosohnung Abüdongba-nü throchehko.

David Müzahsohcho ko Tsichehcho

¹⁵ Hütsüpü Hushai-nü bebürü Zadok ko Abiathar nyüh te Absalom ko Israelrü langnürü te abinü ko Ahithofel-nü tu lümlong jücho hütsü yocho.

¹⁶ Ko Hushai-nü yocho, “Ade dhsüdhsang. David te rangmü yongkhi kehji la tsü shomülang tüyüp, ta arüh mükyüsehsohnung nengdang Jordan yongkhi keh zah tsinung young.”

¹⁷ Abiathar tsurü Jonathan ko Zadok tsurü Ahimaz nyühnü Jerusalem müdsuolang Enrogel kihnatung la tsü ying pümcho, tunüo anyünü yangdila tsü bürünü ngu müzüduchehcho. Lede kulilarü khüdunü wü tuturü tikehrünang anyüh te yonung ko anyünü wünü David te yocho.

¹⁸ Ta nyümong khüdu azarü khüdunü arüh ngucho ko abinü Absalom te hütsü yocho; achotsü anyünü Bahurim la khürü kuh la rangnung shang tsicho. Abi kuh te kihkong khüdu licho ko anyüh tsü hütsüla rangcho.

¹⁹ Nyitsarüba nitpünü kihkong bekhüm tsü phaticho ko hütsü michah fürü tbhüpücho, hütsü dunü sünüsü tu müdhingchehcho.

²⁰ Absalom nyitsarü khürü ro khingkutpü te tsingdhingcho, “Ahimaz ko Jonathan nyüh khülo?” Abükyünü yocho, “Yongkhi tsü keh tsiko.” Nyitsarüti tsünü arüh yangchicho ta münguchonü, arühnü Jerusalem lang thali tsicho.

²¹ Arüh tsisohpü, Ahimaz ko Jonathan nyüh tsü kihkong la tsünü chürocho ko wü yangthsaba David te hütsü yocho. Anyünü Ahithofel-nü abi nyüm tu rah külüpro hütsü yocho ko abi te yocho, “Zahnü yongkhi tsü keh tsieng.”

²² Achotsü David ko abi nyitsarütinü Jordan tsü kehcho ko tsingsedelü arüh apüm khukhangcho.

²³ Khode Ahithofel-nü abi yu tsü mükhyü pü müdhecho, abinü apu gadu chah tsohkeh pümpü apu yangdi lang tsipehcho. Abinü abi nguchi apüm athsalangnü rungnüm yohpüjüpü, apu jangjangthsa hohseh sücho. Ko abi arüh tsutpu kong la dhrürangcho.

²⁴ Absalom ko Israelrü Jordan kehde, Davidlü wü Mahanaim yangdi chipehpü thsacho.

²⁵ (Absalom-nü Joab mülih rothsarü anüchiba tsü Amasa yohpücho. Amasa tsü Ishmaelrü Jether tsurü licho; atpa tsü Nahash tsurü Abigail ko Joab atpa Zeruia ani licho.)

²⁶ Absalom ko abi nyitsarüsü ronü Gilead la müdongcho.

²⁷ David-nü ro Mahanaim chihde, Amon la Raba yangdilanü Nahash tsurü Shobi ko Lodebar lanü Amiel tsurü Makhir ko Gilead la Rogelim lanü Barzilai-rünü ro abi mütohcho.

²⁸ Arühnü David ko abi nyitsarüti nengdang mütpah-tbhü, alih füh, yüpji shü ko tsuyongba litoh, lüdi, tsang, tsang aruhcho, lengli, müxosih, thsakukih, nyikih mülung, nyikihsu ko san khürü hirojücho.

²⁹ Tunüo David ko abi nyitsarüti tsü akungaselih la yangseh, xoseh ko kyahsehcho arühnü müdhecho.