2 SAMUEL 16 - AMÜSA BAIBEL (BSI)

David Ko Ziba

¹ David tsü akhang müjoh thri khu tsiyade dhrongyengnü Mefibosheth kulirü Ziba tsü hümdhse thsih anyüh, shükusih müphung thsih khüdu, singsih ashüh müphung thsih khüdu ko yongkha jeng zehpü shuküp shinga khüdu Gadu anyüh chah zang hipü ro abi mütohcho.

² Yangthsaba David-nü abi te tsingdhingcho, “Nüh hütsüri tu külüpnungbao?” Ziba-nü lalingcho, “Gadu tsü nüh adibong kukhi pümsohnung, hümdhse ko singsih tsü nü nyitsarüti tsusohnung ko yongkha tsü arüh akungaselih la kyahsehde yongsohnung lile.”

³ Yangthsabanü tsingdhingcho, “Nü büdongba Saul shümtsurü Mefibosheth khülo?” Ziba-nü lalingcho, “Abi Jerusalem la lile, tunüo amü Saul yanglih tsü ade Israelrünü abi khyang thali jünung longdi pümle.”

⁴ Yangthsabanü Ziba te yocho, “Dhing, Mefibosheth yo lüpcho tsü nü yo lile.” Ziba-nü lalingcho, “Ih nü dikehrü lile. Ihnü lede nüh Adibong longxosohng.”

David ko Shimei

⁵ Khode yangthsaba David ro Bahurim chihcho, Saul-rü tsutpurü, Gera tsurü Shimei-nü chokehchola chüro abi shirücho.

⁶ David tsü abi nyitsarü ko anyahrünü mükangtipü linye, Shimei-nü David ko abi pohki adirüti chah lungnü müpcho.

⁷ Shimei-nü abi chah chokehchola yocho, “Shehkhu tsieng! Shehkhu tsieng! Nüh shühkhatohrü, akhyüchah müliba nyitsarü!

⁸ Nühnü Saul yanglih khyüko ko Saul kukhi lanü hütsütoi kyüsehcho ngang ade Abüdongba-nü nüh khingchire. Abüdongba-nü yanglih tsü nü tsudhre Absalom khyang jüko ko adelü nüh changkako, nüh amüpsehrü.”

⁹ Zeruia tsurü Abishai-nü yangthsaba te yocho, “Nüh adibong, tuepü füza hi khyang nüh chokehcholasohro? Ihnü wü aku dengnung.”

¹⁰ Yangthsabanü Abishai ko amung Joab nyüh te yocho, “Hi nührü nguchi mah. Abüdongba-nü yocho khu abinü Ih chokehcholarü thsakhang, abi te tuepü hütsütaro pü yonung sü liro?”

¹¹ Ko David-nü Abishai ko abi pohki adirüti atümung te yocho, “Ipu tsurükhungnü mii Ih kyüsehnung iichikhang; hiba Benjaminba nengdang tu anyekanung mühle. Abüdongba-nü chokehcholanung yopü linung; hütsüeko abi tsü yah pehjüng.

¹² Kümüdeo Ih mütsacho Abüdongba-nü müdhepü abi chokehchola mülih amüwa khürü khyüsohnyürüsü linung kohle.”

¹³ Hütsüpü David ko abi nyitsarütinü mütozah arüh langla wücho. Shimei-nü arüh pehjüpü akhanglang tsicho; ko abi tside mii chokehchola lung ko alih arüh chah phikehjücho.

¹⁴ Arüh ro Jordan chihdelü yangthsaba ko abi müyurü atümung kyahpehcho ko hütsüla arühnü kyahshangcho.

Absalom Jerusalem la

¹⁵ Absalom ko Israelrü apüm abi yola Jerusalem la züducho ko Ahithofel tsü arüh yola zehcho.

¹⁶ Khode David müyang Hushai-nü Absalom mütohcho abinü zühde yocho, “Yangthsaba anyahli lieng! Yangthsaba anyahli lieng!”

¹⁷ Absalom-nü tsingdhingcho, “Nü müyang David chah nüh longlangba tu kangcho? Khütacho nüh abi khanglang müwücho?”

¹⁸ Hushai-nü lalingcho, “Ih tuepü! Ihlü Abüdongba, müyurü ko Israelrü apümnü throchehba lahpi du zehle. Ih nü yola linung.

¹⁹ I büdongba tsurü müdikehpü, Ihnü sü dikehnung? Ihnü nüu dikeh rocho kyo, ade Ihnü nüh dikehnung.”

²⁰ Hütsüpü Absalom-nü Ahithofel te yocho, “Nü lümcho young, ade tu khütanung?”

²¹ Ahithofel-nü yocho, “Wüng ko yangthsaba kuh xükümnung pehjüba nüu ashamlarü te tsü mükhong. Hütsüde Israel la atümungnü nüh tsü nüunü abi rorüh kang khichicho müdhenung ko nü mono dee müci mülahnung.”

²² Achotsü arühnü Absalom khyang yangthsaba kumungchah tsü shükuh thsajücho ko atümungnü ngu, Absalom-nü hütsüla zühdu au ashamtpü te mükhongcho.

²³ Hütsü shikhe Ahithofel-nü tu yonang hütsü Tsingrangba yu roh-i khyüchocho; David ko Absalom anyüdingnü hütsüta bichicho.