2 SAMUEL 13 - AMÜSA BAIBEL (BSI)

Amnon ko Tamar

¹ David tsurü Absalom ani amüxengcho lazarü atsah atsa anengnü Tamar licho. Ko David tsurü apa khüdu Amnon-nü abükyü müicho.

² Abinü abükyü dira müichonü abi dhsangnangcho, tunüo abinü abükyü ngunung tsü amükohnung licho; abükyü tsü amüthsengcheh lazarü thsachonü, adhrerü süsü müshirüsohcho.

³ Ta David ani Shama tsurü anengnü Jonadab licho, abi tsü abi müyangrükhung ko dee asithsa nyitsarü licho.

⁴ Jonadab-nü Amnon te yocho, “O yangthsaba tsurü, nüh anyümong nyümong dee mükünyang ngure. Tukülüpcho?” Amnon-nü yocho, “Ihnü Imung Absalom nirü Tamar müire.”

⁵ Jonadab-nü abi te yocho, “Nüh dhsangnanglepü yüpjoung. Ko khode nüu nüte chotanung ronang, abi te, ‘I nilatpü Tamar te ro Ih rükungpü yojüng. Ihnü abükyü ngunü hilanü tsuyongnung tsü rungnümjüsohng, ko abükyü khehlanü Ih tüpsohng.’”

⁶ Hütsüta Amnon-nü dhsangnanglepü abi chongnong chah yüpjocho. Yangthsaba David-nü abi te chotanung wücho ko Amnon-nü abi te yocho, “Yanglilüm I nilatpü Tamar hila rosohng ko Ihnü ngunü hilanü hümdhse aza külüp-pü abükyü khehchahnü I khyang tüpsohng.”

⁷ Achotsü David-nü Tamar yang yu jücho: “Amnon kulang wüng ko abi khyang tsuyongnung rungnümjüng.”

⁸ Abükyünü hütsülang tsü wücho ko abi chongnong chah yüpjo ngucho. Abükyünü hüm aza khyo abinü abükyü tsü ngunü hümdhse aza külüpcho.

⁹ Hütsüta abükyünü hümdhse tsü külüp-pü aruh füh la tsünü dengcheh abi khyang tsusohnung hiwücho, ta abinü mütsucho. Abinü yocho, “Atümung tsisohng” ko arüh atümung tsicho.

¹⁰ Hütsüpü abinü abükyü te yocho, “hümdhse tsü hila I chongnong chah hirung ko nühnü tüpm.” Abükyünü hümdhse tsü bipü abi yang wücho.

¹¹ Abükyünü hütsüri abi khyang tüpde, abinü abükyü rangcho ko yocho, “Rung ko Ite yüpm.”

¹² Abükyünü yocho, “Imoh! Hitari athrünyinung nguchi nguchinung Ih tükhing. Hütsü adrünung lile.

¹³ Ih khüta yanglongla I romih rühchehchünung? Ko nüpusü Israel la ashah diranung. Yanglilüm yangthsaba te chotaang ko abinü yutsatsa Ih nü khyang jünung.”

¹⁴ Ta abinü mühnyicho; ko abükyü tenü abi re azeh-uba thsachonü abinü abükyü nyümtsu khing thsangnyangcho.

¹⁵ Hütsükolü Amnon-nü abükyü khütang thrünyicho; abinü akhudi abükyü müicho tenü ade alaa thrünyicho. Abinü abükyü te yocho, “Shemüsu tsipehng.”

¹⁶ Abükyünü yocho, “Imoh! Nühnü Ih hita tsisohba mülang tsü nühnü Ite nguchiba mülang tenü adiu thsanung.” Ta Amnon-nü abükyü yu mühnyicho;

¹⁷ abinü akulirü dsinü yocho, “Khingkurü hi I nahtse tenü nükhu tsieng. Abükyü tsü tphahchehchüpehng ko kuh tsü zihtieng.”

¹⁸ Achotsü kulirü tsünü abükyü tsü tphahchehchüpehcho ko kuh tsü zihticho. Tamar tsü hütsü shikhe kumükangerü yangthsarü tsularünü khyüba fükhüm jingchi khyücho.

¹⁹ Abükyünü athahchah tavi kangkehcho, afükhüm rehnahcho ko amüyonü aromih haptipü tra tsicho.

²⁰ Khode amung Absalom-nü hütsü ngucho, abinü tsingdhingcho, “Nü mung Amnon-nü nüte amütsa nguchiko ang? Anilarü. Dee tüwah. Hütsü nü munge, hütsü sütesü tüchochi.” Achotsü Tamar-nü Absalom kuh la tsiyoh longriseh licho.

²¹ Khode atikehcho tsü David-nü yuchicho, abi rihlong chürocho.

²² Absalom ani Tamar te Amnon-nü khing thsangnyangcho khu abi khütang thrünyicho ko yu mii müchotacho.

Absalom-nü Rühyangcho

²³ Kang anyüh khanglang, Efraim yangdi shündhün Baal Hazor la Absalom san anbüh müjüpsohcho ko abinü yangthsaba tsurüti atümung hütsüla tsü zehnung dsiyohcho.

²⁴ Abinü yangthsaba David yang wünü yocho, “Adibong, Ih san nbüh müjüpre. Nüh ko nü pohki adirütisü ro hiba thsütila tsü zehnung mah-o?”

²⁵ Yangthsabanü lalingcho, “Itso, mürochehnung. Ihsa atümung wünung tsü nü nengdang bhamüling diranung.” Absalom-nü emüthsa kihchicho, ta yangthsabanü münyengchocho, ko abinü Absalom tsisohcho.

²⁶ Ta Absalom-nü yocho, “Khang, Ini Amnon dusü I yola rosohng?” Yangthsabanü yocho, “Tuepü abi?”

²⁷ Ta Absalom-nü emüthsa abi te kihchicho, hütsünü achangkala abinü Amnon ko atsurüti apüm Absalom yola wünung mülacho. Absalom-nü yangthsaba khyang roh-i thsüti tsü küdangcho

²⁸ ko kulirüti te hita thülacho: “Khode Amnon longi müchanang hütsü dhingyohng ko Ihnü khode yuzeng jonang, abi kyüsehng. Tüdrü. Hütsü I bha thsanung. Müci mülahng ko tütütohnyünyeh.”

²⁹ Achotsü kulirütinü Absalom yochonyi Amnon tsü kyüsehcho. Anyingcho David tsurü atümung arüh gadu chah tsohkeh pümpü tsishocho.

³⁰ Arüh kulang thali lungchi yade, David te, “Absalom-nü nü tsurüti khüdusü münyingpü kyüsehko” pü yocho.

³¹ Yangthsabanü shemüsucho ko alongrila ajengki rehnahcho ko alih la ajangjang thsütsucho. Hütsüla lirü kulirünüsü hütsüroh-i arüh jengki rehnahcho.

³² Ta David ani Shama tsurü Jonadab-nü yocho, “Adibong, nü tsurüti apüm mükyüseh. Amnon du kyüsehko. Amnon-nü ani Tamar te khing thsangnyangpü khanglangtinü abinü hita nguchinung lümcho nühnü Absalom chah dhingcheh lile.

³³ Hütsüeko, nü tsurüti apüm sükoba yusi tsü tüyudsi; Amnon du kyüsehko.”

³⁴ Hütsütade Absalomlü rang tsipehpü licho. Hütsütade tsü anyahrü rothsarünü Horonaim lang azonglanü amülung amülah jüroya ngucho. Abinü yangthsaba te wü abinü nguba tsü yocho.

³⁵ Jonadab-nü David te yocho, “Ihnü yocho müjang nü tsurüti tsü hütsüri tsehle.”

³⁶ Abinü hütsü yokayeng, David tsurüti rochihcho ko arühnü tranung dikehcho ko David ko abi pohki adirüti apüm tracho.

³⁷ Absalom-nü rang wüpü Geshur yangthsaba Amihud tsurü Talmai kuh la kang asang licho.

³⁸ David-nü anyahli atsurü Amnon meshücho;

³⁹ ta khode Amnon sücho nbüchü tsicho, abinü atsurü Absalom longmi lümcho.