2 SAMUEL 12 - AMÜSA BAIBEL (BSI)

David Yang Nathan Yusi

¹ Abüdongba-nü Azikehrü Nathan David yanglang müthehcho. Nathan-nü abi yanglang wü yocho, “Yangdi khüdula nyüh anyüh licho; khüdu alirü ko khüdu ailümrü.

² Alibong tsü kanglungrü adrong licho,

³ ta ailümbong tsülü apunü lihcho sanza khüdu du licho. Abinü hütsü xükümcho ko hütsü kuh la tsuzarü yola zichehcho. Abinü apu tsuyongba mii tüp kangcho, apu shinglanü tihcho ko aphümchah wüpcho. Sanza tsü abi nengdang atsulatpü khüdu roh-i licho.

⁴ Nyümong khüdu alibong kuh la shirü khüdu ro müdongcho. Alibong tsünü abi kangnung apu yo lanü mümüpsehnyücho; achotsü abinü ailümbong sanza tsü khyo abi shirü tsü kangcho.”

⁵ David-nü alibong te tsü dee zichüro yocho, “Sünü hütsüta nguchicho abi tsü süsohnung Ihnü akang liba Abüdongba nengla yuchümre!

⁶ Hütsüta khürah nguchicho ngang, abinü khyüba tenü müyüshinü alaa jülisohng.”

⁷ Nathan-nü David te yocho, “Hütsüvi tsü nüh-e.” Ko Israel Tsingrang Abüdongba-nü hita yore: “Ihnü nüh Saul chahnü khümcho Israel yangthsaba kangsohcho.

⁸ Ihnü nü khyang abi yanglih ko abi nitpürü jücho; Ihnü nüh Israel ko Juda michah yangthsaba kangsohcho. Hinü nü nahkoh müjengkhang, anyüshinü alaa jüba thsako.

⁹ Khang tuepü I yuzeng mühnyi amünyi nguchi hi nguchicho? Nühnü chitala Uria Amon-rü khyang kyüsehsohcho, ko abi nitpü khyücho.

¹⁰ Hütsünü, shang apüm la nü trah lanü khürü shühkhatoh sünung, tunüo nühnü I yocho münyi ko Uria nitpü khyüko.

¹¹ Abüdongba-nü hita yore, Dhing Ihnü nüpu kukhi lanü adhsangthsi hirosohnung; Ihnü nü betenü nü nitpürü khyo aparü khyang jünung, ko abinü anyümong arüh te mükhongsohnung.

¹² Nühnü rang amünyi shitpahcho; ta Ihnü Israel atümung khyang ngusohnung, hütsü anyümong tikehsohnung.”

¹³ David-nü yocho, “Ihnü Abüdongba nyüm amünyi shitpahko.” Nathan-nü lalingcho, “Abüdongba-nü nü khyang mülang pehjüre; nüh müsünung.

¹⁴ Ta nühnü hütsüta nguchi Abüdongba mükhimüngucho ngang suronung liba nü tsurü tsü sünung.”

¹⁵ Hütsüpü Nathan kulang tsicho. Uria nitpünü David khyang nümüsujüba akhunga tsü Abüdongba-nü dhsakehjo dhsangnangsohcho.

David Tsurü Sücho

¹⁶ David-nü akhunga shulüm Tsingrangba te kihchicho. Abinü kong romang mükhu abi yüpjilang züdu müyüp alih la chichi kihchicho.

¹⁷ Abi kuh la adirütinü wü khachicho, ta abinü müsurocho; ko arüh yola tusü mütsuyongcho.

¹⁸ Nyükhih-o lipü akhunga tsü sücho. Ko abi kulirütinü yusi tsü yonung drücho. Arühnü yocho, “Akhunga akang lide mii Ihsanü chotanye abinü mülalingcho. Khang ade akhunga tsü sükopü abi te khüta yonung? Apu chah ajangjang amütsa nguchinung kohle!”

¹⁹ Khode arüh-e arührü rang chotacho David-nü müdhecho, abinü akhunga tsü sükopü rangchehcho. Achotsü abinü arüh te tsingdhingcho, “Akhunga tsü sücho mah-o?” Arühnü lalingcho, “Ho, abi süko.”

²⁰ Hütsüde David-nü alih lanü shemüsucho, tsehkhucho, athah sühcho ko ajengki mülihcho. Hütsüpü abinü Abüdongba kulang wü mübücho. Khode abi kulang thalicho, abinü tsuyongnung ching tsuyongcho.

²¹ Abi kulirütinü yocho, “Ihrünü hi münyichehre. Akhunga tsü akang lide, nühnü abi nengdang tracho ko mütsuyongcho; ta abi süyeng, nühnü shemüsu tsuyongre.”

²² David-nü lalingcho, “Ho. Abi akang lide Ihnü kongcho ko tracho. Tunüo Abüdongba-nü Ite chomangnü akhunga tsü müsüsohnungepü Ihnü lümcho.

²³ Ta ade abi sopehko; tuepü Ih kongnung? Ihnü akhunga tsü kanglisohnung kohnung mah-o? Ih abi yang wünung, ta abi Ih yang müronung.”

Solomon Surocho

²⁴ Hütsüpü David-nü anitpü Bathsheba kihchocho. Abinü abükyü te mükhongcho; ko abükyünü adhrerü khüdu nümüsucho, ko David-nü aneng Solomon dsicho.

²⁵ Abüdongba-nü azaba tsü müicho ko azikehrü Nathan te aneng Jedidia dsijünung yocho, tunüo Abüdongba-nü abi müicho.

David-nü Raba Kohchehcho

²⁶ Hütsütade Joab-nü mütozah Amon yangdiba Raba mah kohchehcho.

²⁷ Abinü David yang yuhirü mütheh yocho, “Ihnü Raba mahko; ko arüh Kih Yangdi tsü kengchoko.

²⁸ Ade anyingcho rothsarüti nübülung, ko yangdi tsü nühnü mahcheh khyüng; hütsü mahkhang Ihnü kohchehcho yangdi tsü I nengla dsinung.”

²⁹ Achotsü David-nü abi rothsarüti nübülung Raba lang wü hütsü mahcho khyücho.

³⁰ Amon-rü tsingrang Milkom thah chahnü David-nü süreh sangrepü müngao amüling hon kuthri tsü khyücho. Hütsüla thsidilung zehcho ko hütsü David-nü khyo apu thah la thricho.

³¹ Abinü yangdila tsünü kohrosü khütang khyücho ko arüh müyurü tsü singxasing, fühjeng ko püh hiri bi nguchisohcho ko lihtahlung khingnü külüpsohcho. Hütsüpü David ko anyitsarüti apüm Jerusalem lang thalicho.