2 SAMUEL 10 - AMÜSA BAIBEL (BSI)

David-nü Amon-rü ko Syria-rü Kohcho

¹ Azachah lipü Amon yangthsaba Nahash sücho ko atsurü Hanun yangthsaba kangcho.

² Yangthsaba David-nü yocho, “Ihnü au Nahash-nü Ite tsa bichicho kyo atsurü Hanun te langthsa shangrü külüpnung.” Hütsüta David-nü abi yangtsa yu yonung wüsohcho. Khode arüh ro Amon chihcho,

³ Amon-rü langnürütinü yangthsaba te yocho, “David-nü nüh yang yangtsa yu yonung rosohba hi nüu nengla nüepü lümrü do? Hütsüta mah. Yangdi mükehmükongnung ko Ihsa mahnung nengdang chehdhingnung abinü arüh rosohchoba lile.”

⁴ Achotsü Hanun-nü David yuhirü tsü rangcho ko arüh benbüh khüulang hehpehjücho ko arüh kihkoh chahnü arüh jengki müjüp-pehjüpü tsisohcho.

⁵ Arühnü kulang thalinung dee shahcho. Khode David-nü atikehcho tsü yuchicho, abinü arüh benbüh tsü müchide Jeriko la liyanung yuva müthehcho.

⁶ Adelü Amon-rünü David tsü arüh rorüh kangkopü müdhenü arühnü Bethrehob ko Zoba lanü Syria rothsarü nyüh hajar mükyü, Tob lanü nyüh hajar dhüreanyüh ko Maka yangthsaba nyüh hajar khüdu zehpü mülihcho.

⁷ David-nü hütsü yuchi rothsarü apüm nüpü arüh te chitanung Joab müthehcho.

⁸ Amon-rünü shemüsucho ko arüh yangdi Raba la züdubalang thseh pümcho ko Syria-rü ko Tob ko Maka lanü rorüti tsü jungchah jümpümcho.

⁹ Joab-nü abi rorütinü arüh belangnü ko khanglangnü mahnungepü müdhecho, achotsü abinü Israel rothsarü yola athrungrüti throchehpü Syria-rü lahpi be pipü pümsohcho.

¹⁰ Anyingcho rothsarüti tsü abinü ani Abishai khyang pehjücho ko abinü arüh tsü Amon lahpi be pipü pümsohcho.

¹¹ Joab-nü abi te yocho, “Syria-rünü Ih kohcheh ngukhang, nüh ro Ih troung ko Amon-rünü nüh kohcheh ngukhang, Ihnü ro nüh tronung.

¹² Müci mülahng ko re zehng! Ihsanü Ihsa nyitsarü ko Tsingrangba yangditi nengdang müküp chitanung. Ko Abüdongba müci thsasohng.”

¹³ Joab ko abi nyitsarünü chitanung shemüsucho ko Syria-rünü drü tsicho.

¹⁴ Syria-rü drü tsicho Amon-rünü ngude, arühsü Abishai tenü drü tsicho ko yangdila tsü shehli züducho. Achotsü Joab-nü Amon-rü te khatabalanü ximüla Jerusalem lang thalicho.

¹⁵ Israelrünü arüh kohchehkopü Syria-rünü müdhecho, achotsü arühnü arüh rothsarüti apüm dsibülungcho.

¹⁶ Ko Eufrates Yongkhi nyüchürolang liba Syria-rü tsü Hadadezer rothsarü anüchiba Shobak-nü nüpü Helam la rocho.

¹⁷ Khode David-nü hütsü yuchicho, abinü Israel rothsarü nübülungpü Jordan Yongkhi kehcho ko abi thseh pümba Syria-rü yang Helam lang wücho.

¹⁸ Hütsüla mongchii dikehcho ko Israelrünü Syria-rü rothsarü shehsohcho. David ko abi nyitsarünü Syria-rü nyübong akhüluba nürüh nyüh thsih dhünyeh ko kuri chahnü khatarü hajar yüre ko arühnü arüh rorüh anüchiba Shobak dhsakehjücho ko abi khata ngah la sücho.

¹⁹ Khode Hadadezer pohki lirü yangthsarütinü arüh Israelrünü kohkopü müdhecho, arühnü arüh te mongtsa külüpcho ko arüh pohki licho. Ko adelü Syria-rünü Amon-rü tronung drüpehcho.