2 SAMUEL 1 - AMÜSA BAIBEL (BSI)

David-nü Saul Sücho Yuchicho

¹ Saul süpü khanglang David-nü Amalek-rü kohpü thali rocho ko Ziklag la nyümong anyüh licho.

² Nyümong khüu Saul müdongchahnü dhrezarü khüdu rocho. Abi longrilesohnung, abinü ajengki rehnahcho ko athahchah alih kangkehcho. Abinü David yanglang wücho ko ajingte mükhukehcho.

³ David-nü tsingdhingcho, “Nüh khüdenü rocho?” Abinü yocho, “Ih Israelrü müdongchahnü tsicheh rocho.”

⁴ David-nü yocho, “Tu tikehchonang Ite young. Abinü lalingcho, mongchiila tsü Ihsa rothsarüti shehko ko Ihsa nyitsarü khütang süko. Saul ko atsudhre Jonathan nyühsü kyüsehko.”

⁵ David-nü tsingdhingcho, “Saul ko Jonathan nyüh sücho nühnü khüta müdhecho?”

⁶ Abinü lalingcho, “Ih Gilboa zong la licho ko Saul tsü apu thsuh chah ngakeh yacho ko arorüh nyübong akhüluba ko kuri akhüluba chah pümrüti abi chii rocho.

⁷ Hütsüde abinü ximüla Ih ngucho ko Ih dsicho, ‘Adirü!’ Ih hila lilepü Ihnü lalingcho.

⁸ Abinü Ih süopü tsingcho ko Ihnü Ih Amalek-rü khüduepü yocho.

⁹ Hütsüde abinü yocho, ‘Hila rung ko Ih kyüsehng. Ih dee dhsakehko ko Ih asürüe.’

¹⁰ Achotsü Ihnü wü abi kyüsehcho, tunüo abi khüta khütanye süririepü Ihnü müdhecho. Hütsüpü Ihnü athah lanü kuthri ko apükyang lanü bikhüm tsü khyücho ko Ihnü hütsü nüh Adibong yang hirore.”

¹¹ David-nü longri ajengki rehnahcho ko abi nyitsarüti atümungnü hütsüta nguchicho.

¹² Arühnü Abüdongba müyurü Saul, Jonathan ko Israelrü nengdang nyüzeh kongnü meshücho, tunüo mongchiila tsü khütango sücho.

¹³ David-nü yusi hiroba dhrezaba te tsingdhingcho, “Nüh khüdenüo?” Abinü lalingcho, “Ih Amalek-rü khüdu ta nührü lih la lire.”

¹⁴ David-nü abi te yocho, “Abüdongba-nü throchehcho yangthsaba nühnü khüta kyüsehcho?”

¹⁵ Hütsüpü David-nü anyitsarü khüdu dsiro abi te yocho, “Hivi kyüsehng.” Nyitsarüba tsünü Amalekba tsü kyüsehcho.

¹⁶ Ko David-nü Amalekba te tsü yocho, “Hi nüpu jangjang hirocho lile. Abüdongba-nü throchehcho yangthsaba nühnü kyüsehkopü yode, nüpu jangjang mülangko.”

David-nü Saul e Jonathan nyüh Meshücho

¹⁷ David-nü khi hi Saul ko atsudhre Jonathan nyüh meshü thsacho

¹⁸ ko Judarü te donung yuzengjücho. (Hi Jashar vakha la thrah lile.)

¹⁹ “Israel khang chah Ihsa langnürüti süko! Ihsa rothsarü yola akurahba khüluko.

²⁰ Hütsü Gath la tüchochi mahkhang Ashkelon yanglongla tüdangchi; Filistialarü tükünyangsoh; müyudsirü tsularüti tükükhingsoh.

²¹ “Gilboa khang chah tsingnye yingkihnye tülongkehsoh; angah tsü lede kung lisohng. Tunüo akurahbong tsung hütsüla ashah khyo jocho; Saul tsung adelü tujinü müsehpehko.

²² Jonathan tbüdeng tsü müyüh zeh, Saul nohsheng achomang mükeh, athrungrü khülusohre, arorüh kyüsehre.

²³ Saul ko Jonathan, khura anyemüyangnung ko aditpangnung; Müjang liko, müjang süko; müdi tenü adsayaba, kihkhünying tenü amüküpba.

²⁴ Israelrü, Saul me traang! Nührü anyahrüm jengki abinü khyüsohcho ko thsidilung ko hon-nü tangsohcho.

²⁵ Athrungrüti khüluko, mongchiila arüh kyüsehko. Akhangchah Jonathan khülu jole.

²⁶ Ih nü nengdang longrire, I müyang Jonathan; Ite nüh khütoi tsacho! I nengdang nüh amüi khüta anyemüyangnung, khingkurü amüi tenü awüba.

²⁷ “Athrungrüti khüluko, arüh thsunohrü pehko ko akhyüchah mühle.”