2 ROHTHÜP 9 - AMÜSA BAIBEL (BSI)

Sheba Yangthsalatpünü Xodhingcho

¹ Sheba yangthsalatpünü Solomon nengkhong yuchicho ko abi te atsingdhingba athsah khürü tsingdhingnung Jerusalem lang rocho. Abükyünü abükyü yola nyüh adrong te axümlichi, thsidilung ko hon khütang ut chahnü zang hipü rocho. Khode Solomon anyüh shirütacho, abükyünü alümcho apüm tsingdhingcho.

² Abinü apüm lalingcho; abinü müyochehnungthsa tu athsah mülicho.

³ Sheba yangthsalatpünü Solomon lümlong müdhecho ko abinü thsaba kuh ngucho.

⁴ Abi tsingthsang chah küdang yohpücho tsuyongba, abi pohki thsazirüti lichah, yangthsaba kuh la anguchirü achangnah ko arüh jengki, thsütila abi dikehrüti ko amübükuh la amübü jüba kangmübüti abükyünü ngucho. Hütsüri tsü ngu abükyü sahmüthsachehcho.

⁵ Abükyünü yangthsaba te yocho, “Nü lümlong nengdang Ihnü I lih lanü yuchiba hi yuje lile!

⁶ Ta Ihnü I bükyüh jangjangnü müngude müyudsicho. Nü lümlong achangsho mii Ihnü müyuchi. Nü lümlong bürünü chochicho tenü deenü adiu lile.

⁷ Nü dikehrü khüta suro atsa, arüh lede nü yola li ko nühnü chocho yuchi linung tsü khüta atsa!

⁸ Abüdongba, nü Tsingrang seing! Abi nengla yangthsathsanung nüh yangthsaba kangsohba tsünü Abinü nüte künyangcho ngusohre. Abinü Israelrü müichonü ko arüh lede nengdang rikinyüchonü, yuzeng athsalangnü yohpüsohnung, Abinü nüh arüh yangthsaba kangsohcho.”

⁹ Abükyünü hirocho jiyü tsü yangthsaba Solomon khyang jücho: Hon süreh hajar müyü tenü alaa ko axümlichi ko thsidilung khütang Solomon khyang Sheba yangthsalatpünü jüba roh-i sünüsü khodesü atsauba müjüdhing.

¹⁰ (Ofir lanü hon hirorü yangthsaba Hiram ko yangthsaba Solomon nyitsarütinü Juniper sing ko thsidilungsü hirocho.

¹¹ Solomon-nü hütsüba sing tsünü Amübükuh ko yangthsaba kuh la phaqu külüpcho ko khithsarü nengdang tbenglah ko apa kohro külüpcho. Juda lih la hütsütari khodesü müngudhing.)

¹² Yangthsaba Solomon-nü Sheba yangthsalatpü khyang abükyünü khyünyücho lüpcho jücho. Hi abükyünü abi khyang jiyü hirojüba mülih jücho chah lahkeh jücho. Hütsüpü abükyü ko abükyü yola rorüh arüh lih Sheba lang thalicho.

Solomon Kuthsi

¹³ Kang mükhu Solomon-nü shithsabhülehrü chahnü amüthsüh nguchochah lahkeh,

¹⁴ hon süreh hajar mükyüpü asangolü ngu licho. Arabia yangthsarüti ko Israel lih la governor tinüsü hon ko taripi hirojücho.

¹⁵ Solomon-nü tsung amülülah thsih anyüh, apüm chah hon süreh dhünyühnyehnü lüpti külüpcho.

¹⁶ Ko tsung anümnüm thsih asang, apüm tsü hon süreh asangsangnü lüpti külüpcho. Abinü hütsüri apüm tsü Lebanon mürong kuhmüzala tsü yohpücho.

¹⁷ Abinü yangthsaba pümjisü arangcheh khüdu külüpcho. Hütsü changsho thsüro-ha ko changsho hon atsauba dunü münohsohcho.

¹⁸ Yangthsaba pümjilang tsü phaqu dhüroh küducho ko jingdümpi tsü hon-nü münohtipü khüdu külüpcho. Pümji chah tsü anyüdinglang kheh ngakehji kehcho ko anyüdinglang tsü kihkhünying kyothri kehsohcho.

¹⁹ Phaqu müipi anyüdinglang kihkhünying kyothri khüdu-khüdu yohcho. Tu yanglih lasü hütsü kyo yangthsarü pümji külüp mülicho.

²⁰ Yangthsaba Solomon yo shing apüm hon dunü külüpcho ko Lebanon Mürong kuhmüzala bichiba tsangfü-hifü apüm hon dunü külüpcho. Solomon chiichah taripilü amii mülicho.

²¹ Abi yo kihjü kihkuh khüdu yangthsaba Hiram yo khata kihkuh yola rachicho. Kang asangla khüdupi abi khata kihkuh tsü hon, taripi, thsüro-ha, mihdi ko shungang hipü rocho.

²² Yangthsaba Solomon tsü limih la apüm tenü aliu ko lümlong azeh-u licho.

²³ Arüh atümungnü abi te kihtacho ko abi khyang Tsingrangba-nü jücho lümlong nyicho.

²⁴ Arüh atümungnü Solomon khyang jiyü; hon, ko taripinü külüpcho kohro, fükhüm, thsunohrü, axümlichi, kuri ko gadu hirojücho. Hütsüta kangnü kang jücho.

²⁵ Yangthsaba Solomon-nü abi yo kuri akhüluba ko kuri nengdang kuh hajar müyü thsacho ko khata kuri hajar dhüreanyüh licho. Abinü khürü Jerusalem la yohpücho ko anyingcho tsü yangdi papa la yohpücho.

²⁶ Abi tsü Eufrates Yongkhi lanü Filistia chii ko Ijiprü lurü chii yanglih apüm la yangthsarü adiuba licho.

²⁷ Abi chiichah Jerusalem la taripi tsü lung roh-i du ko cedar sing tsü papasi sing roh-i du thangchi bichicho.

²⁸ Solomon-nü Musri ko apa lih apüm langnü kuri shüyohcho.

Solomon Yangthsacho Akhikyahnü

²⁹ Solomon yukheh anyingcho adikehlanü achangka chii tsü Azikehrü Nathan yukheh, Shiloh-rü Ahija choyohchola ko azikehrü Iddo münguchehla, khüi Israel Jeroboam yangthsacho nengdang mii yo liro, hirila thrahyoh lile.

³⁰ Solomon-nü Jerusalem la ko Israel apüm la kang yüre yangthsacho.

³¹ Abi sücho ko David yangdila dhrürangcho ko atsurü Rehoboam tsü abi mülih yangthsaba kangcho.