2 ROHTHÜP 8 - AMÜSA BAIBEL (BSI)

Solomon-nü Nguchichehcho

¹ Solomon-nü Amübükuh ko yangthsaba kuh thsanung kang mükyü khyücho.

² Abinü yangthsaba Hiram-nü jüba yangditisü külüpchicho ko hütsüla linung Israelrü müthehcho.

³ Abinü Hamath ko Zoba lih khyücho

⁴ ko lipilih la Palmera yangdi tsü tbüticho. Abinü Hamath la tsuyongba zahkehji thsaba yangditi apüm thsachicho.

⁵ Solomon-nü yangdi hirisü thsachicho: Athahlang Beth Horon ko Ajinglang Beth Horon (Atbüticho yangdi tbükhüm zeh)

⁶ Balath yangdi, tsuyongba zahkehji yangditi ko abi kuri ko kuri akhüluba yohpüba yangditi. Abinü Jerusalem, Lebanon ko abinü yangthsathsaba lih apüm la abi lümchung tsü nguchicho.

⁷ Israelrünü Kanan lih khyüde mükyüsehba Kanan-rü trah apüm Solomon-nü hehnehthsarü thsa bichicho.

⁸ Hütsüri tsü Hit-rü, Amor-rü, Periz-rü, Hiv-rü ko Jebus-rü. Arüh trah tsü ade yingcheh ayurüthsa lire.

⁹ Israelrülü hehnehthsala mübichicho ta rothsarü, adirü, kuri akhüluba nüchirü ko kuri nüchirü thsasohcho.

¹⁰ Kuthsaba nguchi papa la hehnehthsarü dhingyehrü adirü nyüh 250 licho.

¹¹ Solomon-nü anitpü Ijip yangthsaba tsulatpü tsü David yangdi lanü abinü abükyü khyang thsajüba kulang nümüicho. Abinü yocho, “Abükyü tsü Israel yangthsaba David kuh la mülinungbae, tunüo Yuzeng Singdi yohpüba müdüm apüm tsü Amüsa lile.”

¹² Solomon-nü Amübükuh bete külüpba bholu chah tsü Abüdongba khyang kangmübü mübücho.

¹³ Abinü Amüsa nyümong müipi nengdang Mosa yuzengnü mülacho roh-i trüp mübü mübücho: Sabath nyümong, Chonu Asi Thsüti ko kang la thsüti asang, Bhüpza müyohba hümdhse Thsüti, Maxa Thsüti ko Mütpahvi Thsüti.

¹⁴ Au David-nü külüp yohpüjücho yuzeng bichinü abinü bebürüti nyümong mükhu nguchi ko bebürü khi thsabala ko nguchila trorü Levirü khyang nguchi changnahjücho. Abinü Tsingrangba nyitsarü David-nü mülacho kyo, tbükhüm müipila nyümong mükhu nguchi nguchinung amübükuh nyahrüsü nguchi changnahjücho.

¹⁵ David-nü bebürü ko Levirü khyang zahkehji kuh ko apa nengdang athülaba jücho, hütsüri tsü ajeng nguchicho.

¹⁶ Hütsüdelü Solomon nguchiti apüm thümcho. Amübükuh akhyümdi tinü rungnümka chii, nguchi apüm la akoh ngucho.

¹⁷ Hütsüpü Solomon-nü Edom lih la kihdi bekhümla Eziongeber ko Elath lang wücho.

¹⁸ Yangthsaba Hiram-nü abi khyang kihkuh apu pohki adirünü dhingyeh ko alümjingnü nüpü müthehcho. Arühnü Ofir lih lang Solomon pohki adirü yola wücho ko Solomon khyang hon süreh hajar dhüremünga hirocho.