2 ROHTHÜP 7 - AMÜSA BAIBEL (BSI)

Amübükuh Müsachehcho

¹ Yangthsaba Solomon dangkhidangnangkade, ninglangnü michang jüro amübü jücho kangmübü tsü trüp-pehcho ko Abüdongba ahechinü Amübükuh tsü jengcho.

² Ko amübükuh tsü ahechinü jengchonü, bebürünü hütsüla müzüduchehcho.

³ Khode ninglangnü michang jürocho ko amübükuh tsü ahechinü jengcho Israelrünü ngucho, arühnü hütsüla arüh romih alih la hapkeh Tsingrangba mübücho ko Abi tsacho ko müchangkaba amüi nengdang Abi secho.

⁴ Hütsüpü Solomon ko müyurü atümungnü Abüdongba khyang kangmübü jücho.

⁵ Abinü akehta amübü misü hajar mükyüpü anyüh, ko San lakh khüdu hajar mükyü kangmübü jücho. Hütsüta abi ko müyurü apümnü amübükuh tsü müsachehcho.

⁶ Bebürüti tsü arüh khyang khacho jücho la tsü yacho ko arüh ade Levirüti yapü yangthsaba David-nü khyübülungba ikhongti bi Abüdongba nengse David-nü arüh te docho kyo, “Abi amüi tsü achangka mühle” pü thsacho. Müyurü apüm hütsüta yade bebürütinü rühti tsü mehcho.

⁷ Solomon-nü amübükuh bete kekhüm alonglaba tsü müsachehcho ko hütsüla üpümshünü kangmübü, tsang mübü ko akehta mübülanü asu amübü jücho. Imüyengnü külüpba bholu tsü zarachonü, abinü hütsüta nguchicho.

⁸ Solomon ko Israelrü atümungnü nyümong dhünyeh Mütpahvi Thsüti tsü müzeh mungcho. Kihku lahpi Hamoth Lang ko kihjing lahpi Ijip lurü tashi lanü rochonü arüh khütango thsacho.

⁹ Arühnü bholu müsachehbala nyümong dhünyeh ko thsüti nengdang alaa nyümong dhünyeh mungcho.

¹⁰ Achangka nyümong arühnü azika thsüti mungcho ko nyümong khüu tsü choo dhünyeh-ula nyümong mükyüpü asang nyümong tsü, Solomon-nü müyurüti palu kulang thali müthehcho. Abüdongba-nü Israelrü, David ko Solomon khyang müwajücho apüm nengdang arühnü künyangcho.

Tsingrangba-nü Thali Solomon Shirücho

¹¹ Yangthsaba Solomon-nü Amübükuh ko yangthsaba kuh, abinü lümcho roh-i hütsüri akoh ngu thümko khanglang,

¹² Abüdongba-nü aromang abi te chüro ngucho. Abinü abi te yocho, “Ihnü nü dangkhidangnang yuchiko ko hiba Amübükuh la I khyang kangmübü mübünungba Ihnü khyüchoko.

¹³ Khode Ihnü tsing mürosohnang mahkhang tsahma changjünung khengquti müthehnang, mahkhang müyurü chah arümra müthehnang,

¹⁴ I nyitsarü sürü I nengla dsicho, palu jangjang longlümnü dangkhidangnang Ih yangchi amünyi lang lanü ximülakhang, Ihnü ninglangnü yuchinung, arüh mülangpehjünung ko arüh lih kyangjünung.

¹⁵ Ihnü hiba amübükuh dhingyehnung ko hilanü dangkhidangnangcho apüm lalingnung,

¹⁶ tunüo lede Ih mübüsohnung Ihnü hiba müdüm hi thro müsachehjüko. Ihnü lede hi dhingyehnung ko tsungtinung.

¹⁷ Nühnü nüu David-nü kyo, I yuzeng bichi ko Ihnü mülacho lüpcho nguchi yuje cho Ih dikehkhang,

¹⁸ Ihnü nüu David te lede Israel tsü abi chahnü trahchocho khüdunü yangthsanungepü nyengchoba tsü yohpünung.

¹⁹ Ta nüh ko nü müyurünü I yuzeng ko I amülaba mübichikhang, ko apa tsingrang mübükhang,

²⁰ Ihnü jüba lih lanü nührü khyümüinung ko mübüsohnung Ihnü müsachehba amübükuh hi pehjünung. Liküprünü mülangjü adüzüthsa bichinung.

²¹ “Ade Amübükuh tsü dee dhichile, ta hütsü lahkhurü atümungnü nyeka tsingdhingnung, ‘Tuepü Abüdongba-nü hiba lih ko amübükuh hichah hita nguchicho?’

²² Hütsüde arüh te lalingnung, ‘Arühnü arüh jümürü Ijip lanü nüchehba Tsingrang thrüchahchüpehcho khu lile. Arühnü apa tsingrang yang ximüla arüh mübücho. Hütsü khu Abüdongba-nü arüh chah hiba achangba hi hirojücho.’”