2 ROHTHÜP 6 - AMÜSA BAIBEL (BSI)

Solomon-nü Müyurü te Chocho

¹ Hütsüde yangthsaba Solomon-nü dangkhidangnangcho, “Abüdongba, Nühnü nyükhi ko amarürah la du linung throchehko.

² Ade Ihnü Nü khyang ahechi amübükuh khüdu thsajüko, Nüh müchangka lisohnung müdüm khüdu.”

³ Israelrü atümung hütsüla yacho. Yangthsabanü arüh lahpi be pipü arüh khyang Tsingrangba te amüwa chingjücho.

⁴ Abinü yocho, “Abüdongba Israel Tsingrang neng seing. Abinü Iu David te hita nyengchocho yohpücho,

⁵ ‘Ihnü I müyurü Ijip lanü nüchehba nyümong lanü chünye chii, Israel la Ih mübüsohnung amübükuh thsanung tu yangdisü müthrocheh ko I müyurü Israelrü nüsohnung Ihnü süsü müthrocheh.

⁶ Ta ade Ih mübüsohnung Ihnü Jerusalem throchehko ko David, nühnü I müyurü michah yangthsathsanung.’”

⁷ Ko Solomon-nü mütozah yocho, “Iu David-nü Abüdongba Israel Tsingrang mübüsohnung amübükuh khüdu thsanung lümcho,

⁸ ta Abüdongba-nü abi te yocho, ‘Nühnü I nengdang amübükuh khüdu thsanung lümba tsü athsalang,

⁹ ta hütsü khodesü nühnü müthsanung. Hütsü nü tsurü, nü tsurükhung khüdunü thsanung.’

¹⁰ “Ade Abüdongba-nü Abi anyengchocho yohpüko: Ihnü Iu mülih Israel la yangthsaba kangko, ko Ihnü Abüdongba Israel Tsingrang mübüsohnung amübükuh khüdu thsako.

¹¹ Amübükuh la tsü Abüdongba-nü Israelrü te zengchotacho zehba Yuzeng Singdi lungtpah tsü yohpüle.”

Solomon Dangkhidangnang

¹² Hütsüpü müyurünü ngu Solomon-nü wü bholu bete yacho ko akheh dhimüsu dangkhidangnangcho.

¹³ (Solomon-nü imüyengnü yuthungchah külüp-pü hütsü kekhüm longla yohpücho. Hütsü apümlang khehap münga-nga, ko athsenglang khehap asang licho. Abinü hiba yuthungchah küducho ko apümnü ngunungthsa mükhukehcho ko ninglang dhing akheh dhimüsucho.)

¹⁴ Abinü dangkhidangnangcho, “Abüdongba, Israel Tsingrang, alih la ko ninglang, Nüh kyo Tsingrang süsü mühle. Nühnü Nü müyurü te Nüh azengchotaba külüpcho ko khode arühnü arüh lasih apümnü Nüte yochonyi linang, Nühnü arüh te Nü amüi ngusohre.

¹⁵ Nühnü Iu David te azengtacho yohpücho; ko chünye yutse apüm tikehko.

¹⁶ Ade, Abüdongba, Israel Tsingrang, Nühnü Iu te abi kyo arühnü yuzeng tsü bichikhang, Israel la lede abi chahnü trahchocho lanü lede yangthsarü khüdu lisohnungepü nyengchoba tsü yohpüng.

¹⁷ Hütsüeko, Abüdongba, Israel Tsingrang, Nühnü Nü dikehrü David te nyengchoba apüm tsü ade tikehsohng.

¹⁸ “Ta, O Tsingrang, Nühnü yujeba alih la nyitsarü yola lichehnung ang? Ning apümnü mii Nüh müzuhnung, hütsüeko khüta Ihnü thsaba amübükuh hila Nüh zuhnung?

¹⁹ Abüdongba I Tsingrang, Ih Nü dikehrü lile. I dangkhidangnang nyieng ko I kihchicho nyijüng.

²⁰ Hiba Amübükuh ama tsingse dhingyehng. Hiba müdümla Nüh mübüsohnungepü Nühnü nyengchoko, hütsüeko Ihnü hiba amübükuh lahpi pipü dangkhidangnangde Nühnü nyieng.

²¹ Ih ko Israelrünü hiba lahpi pipü dangkhidangnangde Nühnü lalingjüng. Ninglang Nü kuh lanü ihrü yu nyieng ko ihrü mülang pehjüng.

²² “Khode nyüh khüdu thsamehkopü mülangjü Nü bholu yang abi yuje-epü yuchümnung noronang,

²³ O Abüdongba, ninglangnü yuchieng ko Nü kulirü yu khajüng. Thsamehba tsü abi aleng khingching ko achomükeh tsü langjüng.

²⁴ “Khode Nü müyurü Israelrü arüh münyi ngang arüh rorünü kohchehpü Nüh yang ximüla hiba amübükuh yang mülangching ronang,

²⁵ ninglangnü arüh te nyijüng. Nü müyurü münyi mülang pehjüng ko Nühnü arüh jümürü ko arüh khyang jüba lih yang arüh norung.

²⁶ “Khode Nü müyurünü Nüh nyüm amünyi shitpahcho ngang, Nühnü tsing ranglinang, arühnü hiba amübükuh lahpi pipü Nüte kihchi dangkhidangnangnang,

²⁷ O Abüdongba, ninglangnü arüh te nyijüng ko Israelrü Nü dikehrü khyang mülang pehjüng ko arüh te athsalang nguchinung doung. Hütsüpü O Abüdongba, hiba mülih, Nühnü Nü müyurü khyang arühtoh jüba lih la tsing rosohng.

²⁸ “Khode yanglih la yangkong mahkhang arümra ronang mahkhang nyübong ko khengqutinü tsahma thsangnyangjünang mahkhang arorühnü mahnang, mahkhang arüh chah dhsara ko dhsangnang chihnang,

²⁹ arühnü kihchicho nyijüng. Nü müyurü Israel masünü, arüh lasihdhsa hiba amübükuh lahpi pipü Nüte kheh dhimüsu dangkhidangnangnang,

³⁰ arüh kihchicho lalingjüng. Ninglang Nü kuh lanü arüh te nyieng ko arüh mülang pehjüng. Nyitsarü lasiking tsü Nühnü du müdhele.

³¹ Nü müyurünü Nühnü arüh jümürü khyang jüba lih la tsü Nüh drü ko Nü yochonyi linungthsa, nyitsarü müipi te palu alengnü chotaang.

³² “Khode ashula liba shuparü nyüh khüdunü Nü mülahcho ko Nühnü tronyü du licho yuchipü hiba amübükuh la dangkhidangnangnung ronang,

³³ arüh dangkhidangnang lalingjüng. Limih la lirü apümnü Nü müyurü Israelrünü kyo Nüh müdhenung ko Nü yochonyinung nengdang, ninglang Nü liba lanü arühnü kihchicho nguchijüng. Hütsüde arühnü Ihnü thsaba Amübükuh hila Nüh mübünungbaepü müdhenung.

³⁴ “Khode Nühnü Nü müyurü te arüh rorüh nyüm khatanung wünung yuzeng jünang ko arüh licho masülanü Nühnü throchehba yangdi hi ko Ihnü Nü khyang thsajüba Amübükuh hi lahpi pipü kihchinang,

³⁵ arüh kihchicho nyijüng. Ninglangnü arüh te nyijüng ko arüh khyang akoh jüng.

³⁶ “Khode Nü müyurünü Nüh nyüm amünyi shitpahnang, tunüo amünyi müshitparü süsü mühle, ko Nü rihlong chüro arüh rorüh khyang kohsoh ko lih palang arangyohrü kang notsinang, hütsüba lih tsü dee ashu thsanye;

³⁷ Nü müyurü dangkhidangnang lalingjüng. Hütsüba lih lanü arühnü lasih thsamüla arüh münyi ko mütsacho apüm mülang nyengcho Nüte dangkhidangnangkhang, O Abüdongba, arüh dangkhidangnang lalingjüng.

³⁸ Hütsüba lih la tsünü arühnü yujeba lasih thsamüla, Nühnü ihrü jümürü khyang jüba lih hi ko Nühnü throchehba yangdi hi ko Ihnü Nü khyang thsajüba amübükuh hi lahpi pipü Nüte kihchikhang,

³⁹ arüh dangkhidangnang lalingjüng. Ninglang Nü kuh lanü arüh te nyijüng ko arüh te yanglilüm Nü müyurü münyi apüm pehjüng.

⁴⁰ “Ade, O Abüdongba, I Tsingrang, ihrü chah dhing ko hiba müdüm lanü dangkhidangnangcho nyijüng.

⁴¹ Abüdongba Tsingrang, shemüsung ko Nü zii amüdhethsa Yuzeng Singdi te Amübükuh la tsü züdung ko hila lede lieng. Nü bebürütinü nguchicho apüm la müwajüng ko Nü tsacho ngang arüh atümung künyangsohng.

⁴² Abüdongba Tsingrang, Nühnü throchehba yangthsaba tüpehjü. Nühnü Nü dikehrü müicho tünbüchü.”