2 ROHTHÜP 5 - AMÜSA BAIBEL (BSI)

¹ Khode yangthsaba Solomon-nü Amübükuh nguchi apüm thümcho, amübükuh azahkehjila au David-nü Abüdongba khyang müsachehjücho hon, taripi ko apa kohroti apüm yohpücho.

Amübükuh la Yuzeng Singdi Hirocho

² Hütsüpü David yangdi Zion lanü Amübükuhlang Yuzeng Singdi tsü hiwünung nengdang, Solomon-nü Israelrü ahung ko yucho la azirüti atümung Jerusalem la shimükhongsohcho.

³ Arüh atümung Mütpahvi Thsüti shikhela shimükhongcho.

⁴ Khode azirüti apüm shimükhongcho,

⁵ Levirünü Yuzeng Singdi tsü dhipü amübükuh yang rocho. Bebürüti ko Levirünü Abüdongba shükuh ko hütsüla zehba kohro apüm Amübükuhlang hirocho.

⁶ Yangthsaba Solomon ko Israelrü apüm Yuzeng Singdi bete shimükhongcho ko arühnü misü ko san mükhilong kangmübü jücho.

⁷ Hütsüpü bebürünü Yuzeng Singdi tsü Amübükuh yonglang dhi hizüdu aqo kehba kanglungrü Cherufim pohki Amüsauba chongsahla tsü yohpücho.

⁸ Arüh qo tsünü Singdi ko akhau tsü kiticho.

⁹ Akhau tsü chang anyüh Amüsauba chongsah üde yapü dhingde du ngunung kohcho. (Akhau tsü ade yingcheh hütsüla lile.)

¹⁰ Yuzeng Singdi la tsü Israelrü Ijip lanü rode Abüdongba-nü arüh te azengchotaba külüpcho, Mosa-nü Sinai Zong lanü hiroba lungtpah anyüh tsü zehcho.

Abüdongba Ahechi

^11-14 Amülung apüm lanü bebürü atümung zehcho ko arüh jangjangthsa khakhuchüjo müsachehcho. Ko Levirü khithsarü apüm— Asaf, Heman ko Jeduthun ko arüh hung la khiyohti apümnü jengki anana du khyücho. Levirü tsü bholu nyüchürolang shündhün dhingza ko tbenglah bipü ko arüh yola bebürü thsihpü mükyü rühti meh iicho. Khithsarü tsü Abüdongba senü, rühti, dhingza ko apa tbenglah bipü hita thsacho: “Abüdongba seing, tunüo Abi atsa, Ko Abi amüi achangka mühle.” Bebürüti tsü Amübükuh la tsünü tsiyade, dhrongyengnü Abüdongba ahechi nyükhinü kuh tsü jengcho ko hütsü khu bebürünü amübü nguchi nengdang müyachehcho.