2 ROHTHÜP 4 - AMÜSA BAIBEL (BSI)

Amübükuh nengdang Kohro

¹ Yangthsaba Solomon-nü imüyengnü bholu khüdu apümlang khehap mükyü-kyü ko athsenglang khehap dhüre külüpcho.

² Abinü imüyengnü kihbong khüdu asohlang khehap münga, achehlang khehap dhüre, ko arümlang khehap sangre külüpcho.

³ Kihbong bemong mükang tsü chung anyünü khüdu michah khüdu ayah yohcho. Hütsü misüpung yah kihbongchah tsü khüdu kang mülukehcho.

⁴ Kihbong tsü imüyeng misüpung dhüreanyüh, asangsang khang pitapü yaba khangtungchah müdongkehcho.

⁵ Kihbong achehlang tsü kuthrung asang thsacho. Hütsü shing bemong kyo yungpi mülongchicho kyo dongkhulang müyangchehchü licho. Hiba kihbongla tsü kih liter hajar rohre züducho.

⁶ Arühnü mütpah-tbhüsü dhüre külüpcho, münga amübükuh kihjing lahpi ko münga kihku lahpi yohpücho. Hütsüri tsü trüp kangmübü müdrikungsohnungla bichinung nengdang licho. Kihbong adiula liba kih tsü bebürüti thsütohthsülanung shulüm licho.

^7-8 Arühnü dsimüdongsing dhüre bichi roba kyo tsingthsang dhüre külüpcho. Amübükuh la alonglaba chongsahla tsü dsimüdongsing münga ko tsingthsang münga deta yohpücho. Arühnü hon mütpah-tbhü thsih khüdu külüpcho.

⁹ Arühnü bebürü nengdang ayonglang kekhüm külüpcho. Ko kekhüm kahla trahtriti tsü imüyengnü mülukehcho.

¹⁰ Ko kihbong tsü amübükuh kihjing lahpi nyüchürolang shündhün yohpücho.

^11-16 Huram nü füh, michüthsohlung ko mütpah-tbhüsü külüpcho. Abinü amübükuh nengdang külüpnung yangthsaba Solomon te nyengchocho apüm rungnümcho: Dongdi anyüh Dongdi bemong chah mütpah-tbhü kyo anyüh Amüle anyüdingchah ixilih Amüle bemong chah chung anyüthsa yohba imüyengnü külüpcho tsanümsih thsih müyü Misü akhüluba dhüre Mütpah-tbhü dhüre Kihbong khüdu Kihbong thüyehba misüpung dhüreanyüh Füh, michüthsohlung ko shumütsa. Sihthri nguchila axangcheh Huram nü Abüdongba Amübükuh la bichinung yangthsaba Solomon-nü yuzengjücho kyo asehcho imüyengnü kohro hiri tsü külüpcho.

¹⁷ Yangthsabanü hiri apüm tsü Jordan Ngah la Sukot ko Zareda nyüh kahla idhse mülujila mülusohcho.

¹⁸ Kohro tsü drongra külüpchonü imüyeng tsü amülinglang khütoi khyüchonang sünüsü mümüdhecho.

¹⁹ Yangthsaba Solomon-nü amübükuh la tsü hon-nü hiri külüp yohpücho: bholu ko hümdhse mübü yohpüji tsingthsang;

²⁰ dsimüdongsing ko Amüsauba chongsah bete trüpnung hon amüthsengnü külüpcho dsi;

²¹ amükingcho yungpi, dsi ko amüjüpsing;

²² mihtru pehsing, mütpah-tbhü, müchiji tbhü, ko michüh yohsing aruhfüh. Hiri apüm hon amüthsengnü külüpcho. Amübükuh dongkhu kukhang ko Amüsauba chongsah kukhangtisü hon-nü münohti külüpcho.